ދިވެހިރާއްޖޭގެ ގައުމީ ޔުނިވަރސިޓީ (އެމްއެންޔޫ)ގެ ކެމްޕަހެއް ޅ.ހިންނަވަރުގައި އެޅުމަށް ނިންމާ ހިންނަވަރު ކެމްޕަސް ކުރެހުމަށް ގެންނަން ޖެހޭ ބަދަލުތައް ގެނެސް ބީއޯކިއު ހަދައިދީ ޓެންޑަރ ޑޮކިއުމެންޓް ތައްޔާރުކޮށްދިނުމަށް ހުޅުވާލައިފިއެވެ.
އެމްއެންޔޫއިން ނެރުނު ބަޔާނެއްގައި ބުނީ އެ ޔުނިވަރސިޓީގެ ހިންނަވަރު ކެމްޕަހުގެ ކުރެހުންތަކަށް ގެންނަންޖެހޭ ބައެއް ބަދަލުތައް ގެނެސް ވަށާފާރު ފައިނަލް ކުރުމަށްފަހު އެކުރެހުންތަކުގެ މައްޗަށް ބިނާކޮށް ބީއޯކިއު ހަދައިދިނުމަށާއި، ޓެންޑަރ ޑޮކިއުމެންޓް ތައްޔާރު ކޮށްދިނުމަށް އަންދާސީ ހިސާބު ހުށަހެޅުމުގެ ފުރުސަތު ހުޅުވާލާފައިވާ ކަމަށެވެ. އަދި މިކަމަށް ކުރިމަތިލާ ފަރާތްތަކަށް ބާއްވާ މައުލޫމާތު ދިނުމުގެ ބައްދަލުވުން 8 މާރޗް ވާ ހޯމަ ދުވަހުގެ 10:00ގައި ދިވެހިރާއްޖޭގެ ގައުމީ ޔުނިވަރސިޓީގެ އިދާރީ މަރުކަޒުގައި އޮންނާނެ ކަމަށް އެމްއެންޔޫއިން ބުނެއެވެ.
އެމްއެންޔޫއިން ބުނީ މި މަސައްކަތް ހަވާލުކުރުމަށް ހަމަޖެހިފައިވަނީ ހުށަހަޅާފައިވާ ހުށަހެޅުންތަކަށް ބެލުމަށްފަހު ޓެކްނިކަލް އިވެލުއޭޝަނެއް ހެދުމަށްފަހު އޭގެތެރެއިން އެންމެ ރަނގަޅު ފަރާތަކަށް ކަމަށެވެ. އަދި މިކަމަށް އެދި ހުށަހަޅަންޖެހޭ ފޯމުތައް 8 މާރޗްވާ ހޯމަ ދުވަހު ބާއްވާ ބައްދަލުވުމަށް ހާޒިރުވާ ފަރާތްތަކަށް ދެވޭނެ ކަމަށެވެ.
އެމްއެންޔޫއިން ބުނީ ބީލަން ހުށަހެޅުން އޮންނާނީ 15 މާރޗްވާ ހޯމަ ދުވަހުގެ 10:00 ގައި އެމްއެންޔޫގެ އިދާރީ މަރުކަޒުގައި ކަމަށެވެ. އަދި 8 މާރޗްވާ ހޯމަ ދުވަހުގެ ބައްދަލުވުމަށް ހާޒިނުވާ ފަރާތްތަކަށް ބީލަން ހުށަހެޅުމުގެ ފުރުސަތު ނުލިބޭނެ ކަމަށް އެމްއެންޔޫއިން ބުނެއެވެ. އަދި އިތުރު މައުލޫމާތެއް ސާފުކުރުމަށް ބޭނުންވާނަމަ އެމްއެންޔޫގެ ނަމްބަރު 3345190 މި ނަންބަރަށް ގުޅުމުން ނުވަތަ އެމްއެންޔޫގެ އީމެއިލް އެޑްރެސް[email protected]އަށް ކުރުމުން ލިބޭނެ ކަމަށް އެމްއެންޔޫއިން ބުނެއެވެ.
ގައުމީ ޔުނިވަރސިޓީގެ ކެމްޕަހެއް ހިންނަވަރުގައި އެޅުން އެއީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވެވަޑައިގެންފައިވާ ވައުދެކެވެ. އަދި މި ކެމްޕަސްގެ ސަބަބުން ޅ. އަތޮޅުގެ ހުރިހާ ރަށަކަށް އެކަމުގެ ފައިދާ ލިބިގެންދާނެ ކަމަށް ސަރުކާރުން ވަނީ މީގެ ކުރިން ހާމަކޮށްފައެވެ.
