ޔުއެފާ ޗެމްޕިއަންސް ލީގުގެ ދެވަނަ ބުރުގެ ފުރަތަމަ ލެގުގައި ރަށުން ބޭރުގައި އެޓަލާންޓާ އަތުން ފަހު ވަގުތު ރެއާލް މެޑްރިޑް މޮޅުވެއްޖެއެވެ.

ބުދަ ދުވަހުގެރޭ ކުޅުނު މެޗުން ރެއާލް މޮޅުވީ 1-0 ގެ ނަތީޖާއަކުންނެވެ. މި މެޗުން ރެއާލް މޮޅުވިއިރު، އެ ޓީމަކީ ދެވަނަ ބުރުގެ ފުރަތަމަ ލެގުން މޮޅުވި ސްޕެނިޝް ލީގުގެ ހަމައެކަނި ޓީމެވެ.

އަމިއްލަ ދަނޑުގައި ކުޅުނު މި މެޗުގައި އެޓަލަންޓާއަށް އެންމެ ބޮޑު ގޮންޖެހުމެއް ކުރިމަތިވީ މެޗުގެ ކުރީކޮޅު އެ ޓީމުގެ ކުޅުންތެރިއަކު މަދުވުމާ ގުޅިގެންނެވެ. މެޗުގެ 17 ވަނަ މިނެޓުގައި އެޓަލަންޓާގެ ރެމޯ ފްރެއޮލާއަށް ރެފުރީ ވަނީ ރަތް ކާޑެއް ދައްކާފައެވެ. އޭނާއަށް ކާޑު ދެއްކީ ފާލަންޑް މެންޑީއަށް ކުރި ފައުލަކާ ގުޅިގެންނެވެ.

މި މެޗުގައި ރެއާލުން ގިނަ ހަމަލާތަކެއް އުފައްދާފައިވާއިރު، އެ ޓީމުން ލީޑު ނަގާފައިވަނީ މެޗު ނިމެން ހަތަރު މިނެޓަށް ވެފައި ވަނިކޮށެވެ. މި ލަނޑު ކާމިޔާބުކޮށްދިނީ މެންޑީއެވެ.

މި މޮޅާއެކު މި މުބާރާތުގެ ކުއާޓާ ފައިނަލުގެ ޖާގައެއް ހޯދުމުގެ އުންމީދު ރެއާލުން ބޮޑުކުރިއިރު، ދެވަނަ ލެގުގައި މި ދެ ޓީމު ބައްދަލުކުރާ މެޗު އޮންނާނީ ރެއާލުގެ ދަނޑުގައި އަންނަ މާޗު މަހުގެ 17 ވަނަ ދުވަހުއެވެ.