މޮންޗެންގްލަޑްބަކް ބަލިކޮށް ސިޓީ ކުރިއަށް

ޔުއެފާ ޗެމްޕިއަންސް ލީގުގެ ދެވަނަ ބުރުގެ ފުރަތަމަ ލެގުގައި ރަށުން ބޭރުގައި ފަސޭހަކަމާއެކު ބޮރޫޝިއާ މޮންޗެންގްލަޑްބަކް ބަލިކޮށް، މެންޗެސްޓާ ސިޓީން ޖެހިޖެހިގެން 19 ވަނަ މެޗުން މޮޅުވެއްޖެއެވެ.

ބުދަ ދުވަހުގެރޭ ކުޅުނު މެޗުން ސިޓީ މޮޅުވީ 2-0 ގެ ނަތީޖާއަކުންނެވެ. މި މޮޅާއެކު ސިޓީން ވަނީ ހުރިހާ މުބާރާތެއްގައި އެންމެ ފަހުން ކުޅުނު 19 މެޗުންވެސް މޮޅުވެފައެވެ.

މީގެ ކުރިން ޖަރުމަނުގައި ކުޅެން ތާވަލުކުރި މި މެޗު ކުޅެފައިވަނީ ހަންގޭރީގެ ބުޑަޕެސްޓުގައި ހުންނަ ޕުސްކަސް އެރީނާގައެވެ. މި މެޗު ހަންގޭރީއަށް ބަދަލުކުރީ ކޮވިޑް-19 އާ ގުޅިގެން ޖަރުމަނުން މި ފަހުން ކަނޑައެޅި އުސޫލުތަކާ ގުޅިގެން، މޮންޗެންގްލަޑްބަކުގެ އަމިއްލަ ދަނޑުގައި މި މެޗު ކުޅެވޭ ގޮތް ނުވުމުންނެވެ.

ސިޓީގެ ފަރާތުން މޮޅު ކުޅުމެއް ފެނިގެންދިޔަ މި މެޗުގެ ފުރަތަމަ ހާފުގައި އެ ޓީމުން ވަނީ ލީޑު ނަގާފައެވެ. އެގޮތުން މެޗުގެ 29 މިނެޓުގައި ޔާއޯ ކަންސޭލޯ ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ބެނާޑޯ ސިލްވާއެވެ. އަދި މެޗިގެ 65 ވަނަ މިނެޓުގައި ސިލްވާ ތަނަވަސްކޮށްދިން ފުރުސަތަކުން ގަބްރިއެލް ޖީސޫސް ވަނީ ލަނޑެއް ޖަހައި، ސިޓީއަށް ލީޑު ފުޅާކޮށްދީފައެވެ.

ޗެމްޕިއަންސް ލީގުގެ ދެވަނަ ބުރުގެ ފުރަތަމަ ލެގުގައި ރަށުން ބޭރުގައި ކުޅުނު މެޗުން ސިޓީ މޮޅުވިއިރު، ދެވަނަ ލެގުގައި މި ދެ ޓީމު ބައްދަލުކުރާ މެޗު އޮންނާނީ އިންގްލެންޑުގައި އަންނަ މާޗު މަހުގެ 17 ވަނަ ދުވަހުއެވެ.