ކޮޕަ އެމެރިކާގައި އޮސްޓްރޭލިއާ އާއި ގަތަރު ވާދަނުކުރާނެ

މި އަހަރަށް ތާވަލުކޮށްފައިވާ ދެކުނު އެމެރިކާގެ ޝަރަފުވެރި ފުޓްބޯޅަ މުބާރާތް ކަމަށްވާ ކޮޕަ އެމެރިކާގައި އޭޝިއާއިން ބައިވެރިވާ އޮސްޓްރޭލިއާ އާއި ގަތަރު ވާދަނުކުރާނެ ކަމަށް ދެކުނު އެމެރިކާގެ މައި ފުޓްބޯޅަ އިދާރާ ކޮންމެބޯލްއިން ބުނެފިއެވެ.

މި އަހަރު ބާއްވާ ކޮޕަ އެމެރިކާއަކީ މިދިޔަ އަހަރުގެ ޖޫން މަހުގެ 12 ވަނަ ދުވަހު ފެށިގެން ޖުލައި މަހުގެ 12 ވަނަ ދުވަހުގެ ނިޔަލަށް އާޖެންޓީނާ އާއި ކޮލޮމްބިއާގައި ބާއްވަން ތާވަލުކުރި މުބާރާތެވެ. އެކަމަކު ކޮވިޑް-19 އާ ގުޅިގެން މި މުބާރާތް ވަނީ މި އަހަރުގެ ހޫނު މޫސުމަށް ފަސްކޮށްފައެވެ.

ކޮންމެބޯލްއިން ފަހަކަށް އައިސް ކޮޕަ އެމެރިކާއަށް އޭޝިއާގެ ގައުމުތަކަށް ދައުވަތު ދޭއިރު، މި އަހަރުގެ މުބާރާތުގައި އޭޝިއާއިން ބައިވެރިވާން އޮތީ އޮސްޓްރޭލިއާ އާއި ގަތަރެވެ. އެގޮތުން 2019 ވަނަ އަހަރު މުބާރާތުގެ ގުރުއަތުލުން ބޭއްވިއިރު، އޮސްޓްރޭލިއާ ހިމެނުނީ އާޖެންޓީނާ، ބޮލީވިއާ، އުރުގުއޭ، ޗިލީ އަދި ޕެރެގުއޭއާއެކު ގްރޫޕް އޭގައެވެ. އަދި ގަތަރު ހިމެނުނީ ކޮލޮމްބިއާ، ބްރެޒިލް، ވެނެޒުއޭލާ، އެކުއެޑޯ އަދި ޕެރޫއާއެކު ގްރޫޕް ބީގައެވެ.

އެކަމަކު ފީފާ ވޯލްޑް ކަޕާއި އޭއެފްސީ އޭޝިއަން ކަޕުގެ ޖޮއިންޓް ކޮލިފިކޭޝަން މެޗުތައް ޖޫން މަހަށް ފަސްކުރުމަށް އޭޝިއާގެ މައި ފުޓްބޯޅަ އިދާރާ އޭއެފްސީން ނިންމުމުން، އެ ގައުމުތަކަށް ވަނީ ކޮޕަ އެމެރިކާގައި ވާދަކުރުމުގެ ފުރުސަތު ގެއްލިފައެވެ. ކޮންމެބޯލްގެ ޑެޕިއުޓީ ޖެނެރަލް ސެކްރެޓަރީ ގޮންޒާލޯ ބެއްޔޯސޯ ވިދާޅުވީ އެ ދެ ގައުމަށް ކޮޕަ އެމެރިކާގައި ވާދަކުރުމަށް ދަތިތަކަކާ ކުރިމަތިލާން ޖެހުމުން، މުބާރާތުގައި ދެ ގައުމު ވާދަނުކުރާ ގޮތަށް މިހާރު ނިންމާފައިވާ ކަމަށެވެ.

މި އަހަރުގެ ކޮޕަ އެމެރިކާ ޖޫން މަހުގެ 11 ވަނަ ދުވަހު ފެށިގެން ޖުލައި މަހުގެ 10 ވަނަ ދުވަހުގެ ނިޔަލަށް އާޖެންޓީނާ އާއި ކޮލޮމްބިއާގައި ބާއްވާއިރު، ގްރޫޕް އޭގެ މެޗުތައް ކުޅޭނީ އާޖެންޓީނާގައެވެ. އަދި ގްރޫޕް ބީގެ މެޗުތައް ކުޅޭނީ ކޮލޮމްބިއާގައެވެ. އަދި އެއަށްފަހު މުބާރާތުގެ ފައިނަލް މެޗު ކުޅުމަށް ހަމަޖެހިފައިވަނީ ކޮލޮމްބިއާގެ މެޓްރޯ ސްޓޭޑިއަމުގައެވެ.