ތ. ވޭމަންޑޫ އިންޖީނުގޭގައި އަލިފާނުގެ ބޮޑު ހާދިސާއެއް ހިނގައިފިއެވެ.

އެމްއެންޑީއެފުން ބުނީ މި ހާދިސާއާ ގުޅިގެން އެމްއެންޑީއެފްގެ ސެންޓްރަލް އޭރިއާ ކައްދޫ ފަޔަރ ސްޓޭޝަނުން އެ ސަރަހައްދުގައި މިހާރު ހަރަކާތްތެރިވަމުން އަންނަ ކަމަށެވެ. ނަމަވެސް އަލިފާނުގެ ހާދިސާއާ ގުޅޭ އިތުރު މައުލޫމާތެއް ހިއްސާކޮށްފައެއް ނުވެއެވެ.

ތ. ވޭމަންޑޫ އިންޖީނުގެ ހިންގަނީ ފެނަކައިންނެވެ. ފެނަކައިގެ މެނޭޖިންގ ޑިރެކްޓަރ، އަހުމަދު ސައީދު މުހައްމަދު ރާއްޖެ އެމްވީއަށް ވިދާޅުވީ ހާދިސާ ހިނގި ވަކި ސަބަބެއް އަދި ދެނެގަނެވިފައި ނުވާ ކަމަށެވެ. އެ ހާދިސާ ހިނގީ މެންދުރުފަހު 2:30 ހާއިރު ކަމަށާއި، މިހާރު އިންޖީނުގެ އެއްވެސް ވަރަކަށް ބޭނުން ނުކުރެވޭ ވަރަށް އަނދާފައިވާ ކަމަށް ވިދާޅުވިއެވެ. އޭނާ ވިދާޅުވީ އެއްވެސް މީހަކަށް އަނިޔާވިކަން އަދި ރިޕޯޓުކޮށްފައި ނުވާ ކަމަށެވެ.

ސައީދު ވިދާޅުވީ ހާދިސާއާ ގުޅިގެން ރަށުން ކަރަންޓު ކެނޑިފައިވާ ކަމަށާއި، އާންމުންނަށް ވީ އެންމެ އަވަހަކަށް ފޯރުކޮށްދިނުމަށް ކުރަން ޖެހޭ މަސައްކަތްތައް ކުރަމުން އަންނަ ކަމަށް ވެސް ވިދާޅުވިއެވެ.

އޭނާ ވިދާޅުވީ މި ދަނޑިވަޅުގައި އާންމުންގެ ފަރާތުން ކެތްތެރިކަމާއި އެއްބާރުލުމަށް އެދޭ ކަމަށެވެ.