ލަކްސް ސައުތް އަރިއެޓޯލް ރިސޯޓް އެންޑް ވިލާސްގައި ކޮވިޑް-19ގެ އައުޓްބްރޭކެއް!
22 ފެބުރުއަރީ 2021 | ހޯމަ 05:12މިމަހުގެ 19ގައި 9 މީހުން، މިމަހުގެ 20ގައި 4 މީހުން ޕޮޒިޓިވްވެފައިވޭ
އާދިއްތަ ދުވަހުގެރޭ އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި އެޗްއީއޯސީގެ ތަރުޖަމާނު ޑރ. ނަޒްލާ ރަފީގު ވާހަކަދައްކަވަނީ
ލަކްސް ސައުތް އަރިއެޓޯލް ރިސޯޓް އެންޑް ވިލާސްގައި ކޮވިޑް-19ގެ އައުޓްބްރޭކެއް އައިސްފައިވާ ކަމަށް ހެލްތު އިމަރޖެންސީ އޮޕަރޭޝަން ސެންޓަރު (އެޗްއީއޯސީ)ން ބުނެފިއެވެ.
އާދިއްތަ ދުވަހުގެރޭ އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި އެޗްއީއޯސީގެ ތަރުޖަމާނު ޑރ. ނަޒްލާ ރަފީގު ވިދާޅުވީ ލަކްސް ސައުތް އަރިއެޓޯލް ރިސޯޓް އެންޑް ވިލާސްގައި އައުޓްބްރޭކެއް ކުރިއަށްދާއިރު، މިމަހުގެ 19ގައި 9 މީހުން ، މިމަހުގެ 20ގައި 4 މީހުން ޕޮޒިޓިވްވެފައިވާ ކަމަށެވެ. އަދި ކޮންޓެކްޓުންގެ ގޮތުގައި ފާހަގަކުރެވުނު މީހުންނާއި އަލާމާތްތައް ފެނިގެން ނެގުނު ސާމްޕަލްތަކުގެ ތެރެއިން އާދިއްތަ ދުވަހު 24 މީހަކު ޕޮޒިޓިވްވެފައިވާ ކަމަށް ޑރ. ނަޒްލާ ވިދާޅުވިއެވެ.
އެގޮތުން މިހާތަނަށް އެރިސޯޓުން 37 މީހަކު ޕޮޒިޓިވްވެފައިވާ ކަމަށް ޑރ. ނަޒްލާ ވިދާޅުވިއެވެ.
މީގެ އިތުރުން ޑރ. ނަޒްލާ ވިދާޅުވީ ކޮކީން މޯލްޑިވްސް ރިސޯޓުން އާދިއްތަ ދުވަހު 6 މީހުން ޕޮޒިޓިވްވެފައިވާއިރު، މިހާތަނަށް ޖުމްލަ 45 މީހުން އެ ރިސޯޓުން ޕޮޒިޓިވްވެފައިވާ ކަމަށެވެ.
ރާއްޖޭގެ ކޮވިޑްގެ ހާލަތަށް ބަލާއިރު، ރިސޯޓުތަކުން ފެންނަ ކޭސްތައް ދަނީ އިތުރުވަމުންނެއެވެ. އަދި ރިސޯޓުތަކުން ގިނަ ކޭސްތައް ފެންނަމުންދާތީ އެޗްއީއޯސީން ކަންބޮޑުވުންފާޅު ކޮށްފައިވާއިރު، ރިސޯޓުތަކުން ބަލި ކޮންޓްރޯލް ކުރުމާ ގުޅޭ ގޮތުން ޓޫރިޒަމް މިނިސްޓްރީއާއެކު މަޝްވަރާތައް ކުރިއަށް ގެންގޮސްފައިވެއެވެ.
އެޗްއީއޯސީން ބުނެފައިވަނީ ބަލީގެ އަލާމަތްތައް ހުންނަ މީހުން ތިބި ނަމަވެސް ބައެއް ރިސޯޓުތަކުގައި ޓެސްޓުނުކުރާ ކަމަށެވެ. މާލެއިން ބައެއް ރިސޯޓުތަކަށް މަސައްކަތް ކުރުމަށްދާ މުވައްޒަފުން ކަރަންޓީން ވާން ޖެހޭއިރު، ކަރަންޓީންގެ މުއްދަތު ހަމަނުކޮށް ވަޒީފާއަށް ނުކުންނަމުންދާކަން ފާހަގަކުރެވިފައިވާ ކަމަށެވެ. އަދި ބައެއް ރިސޯޓުތަކުގައި މުވައްޒަފުން އުޅޭ ސަރަހައްދުގައި މާސްކް އެޅުމާއި، ސޯޝަލް ޑިސްޓެންސްއަށް ނުބަލައި ވަރަށް ބޮޑަށް ފަރުވާކުޑަކުރަމުންދާ ކަމަށް އެޗްއީއޯސީން ބުނެއެވެ.
ކުޑަކުޑަ ކަމަކަށް ފަރުވާ ކުޑަކުރެވުނު ކަމުގައިވީ ނަމަވެސް ބަލި ވަރަށް ބޮޑަށް ފެތުރިގެން ހިނގައިދާނެ ކަމަށާއި، ގައިޑްލައިންތަކާ އެއްގޮތަށް އަމަލުކުރުމަށް އެޗްއީއޯސީން އިލްތިމާސްކޮށްފައިވެއެވެ.
ކޮވިޑް-19 އިން ރައްކާތެރިވުމަށް އެޅި ފިޔަވަޅުތަކުގެ ތެރެއިން، ރާއްޖޭގެ ބޯޑަރު، ގާތްގަނޑަކަށް ހަތަރު މަސް ދުވަހަށް ބަންދު ކުރުމަށް ފަހު އަލުން ހުޅުވައިލީ 15 ޖުލައި 2020 ގައެވެ.
