ވެކްސިން ޖެހީމަ ދެން ވާނީ ކިހިނެއް؟
22 ފެބުރުއަރީ 2021 | ހޯމަ 04:11އެންމެ މުހިންމު ކަމަކީ ބަލީގައި ނިޔާވާ މީހުން މަދުކުރުން ކަމަށް ޑރ ފައިސަލް ވިދާޅުވި
ޑރ ފައިސަލް ވިދާޅުވީ ވެކްސިންގެ މައިގަނޑު ޓާގެޓަކީ ބަލީގައި ބޮޑުވަރުވާ މީހުން މަދުކުރުން ކަމަށް
އެންމެ ގިނަ ބައެއްގެ ސުވާލަކަށް މިހާރު ވެގެން ދާނީ ކޮވިޑް-19 ވެކްސިންޖެހުމުން ދެން ވާނެގޮތް ކަމަށް ޓެކްނިކަލް އެޑްވައިޒަރީ ގްރޫޕުގެ ޑޮކްޓަރ އަހުމަދު ފައިސަލް ވިދާޅުވެއްޖެއެވެ.
އާދިއްތަ ދުވަހުގެ ރޭ ހެލްތް އިމަރޖެންސީ އޮޕަރޭޝަންސް ސެންޓަރު (އެޗްއީއޯސީ)ން ބޭއްވި ނޫސްވެރިންގެ ބައްދަލުވުމުގައި ޑރ ފައިސަލް ވިދާޅުވީ ވެކްސިންގެ މައިގަނޑު ޓާގެޓަކީ ބަލީގައި ބޮޑުވަރުވާ މީހުން މަދުކުރުން ކަމަށެވެ. އޭގެ ތެރޭގައި ބަލީގައި ބޮޑުވަރުވެ އެނދުމަތި ކުރާ މީހުން މަދުކުރުމާއި އަދި އައިސީޔޫއަށް ނުވަތަ ވެންޓިލޭޓަރަށްލާ މީހުން މަދުކުރުން ހިމެނޭ ކަމަށް ޑރ. ފައިސަލް ވިދާޅުވިއެވެ.
މީގެ އިތުރުން އެންމެ މުހިންމު ކަމަކީ ބަލީގައި ނިޔާވާ މީހުން މަދުކުރުމާއި ބަލިން ކުރާ އަސަރު ބޮޑުވަރުވުން ކޮންޓްރޯލްކުރުން ކަމަށް ވިދާޅުވެ ޑރ. ފައިސަލް ވިދާޅުވީ ދިރާސާތަކަށް ބަލާއިރު ބަލީގައި ބޮޑުވަރުވާ މީހުންގެ އަދަދު ވެކްސިން ޖަހައިފިނަމަ ސުމަކަށް ދާނެކަމަށެވެ. އަދި ގިނަ ބަޔަކު ވެކްސިން ޖަހައިފިނަމަ މި ބަލި ވަކި ހިސާބަކުން އާއްމު ރޯގާއަކަށް ބަދަލުވެގެން ދާނެ ކަމަށް ޑރ. ފައިސަލް ފާހަގަ ކުރެއްވިއެވެ.
އަދި ވެކްސިން ޖަހަންވާ ފަރާތްތަކުގެ ތެރެއިން ބޮޑު ބަޔަކު ވެކްސިން ޖަހައި، ދެ ޑޯޒް ހަމަ ކުރުމަށްފަހު ގާތްގަނޑަކަށް ދެ ހަފްތާ ފަހުން، ވެކްސިންގެ އެންމެ ފުރިހަމަ ފައިދާ ފެނިގެންދާނެ ކަމަށް ވެސް ޑރ. ފައިސަލް ވިދާޅުވިއެވެ. މީގެ އިތުރުން ބަލި ޖެހޭ މީހުންގެ އަދަދާއި ބަލި ފެތުރޭ ނިސްބަތް ވަރަށް ބޮޑަށް މަދުވެގެން ދާނެ ކަމަށް ޑރ. ފައިސަލް ފާހަގަކުރެއްވިއެވެ.
އިތުރަށް ވާހަކަ ދައްކަވަމުން ޑރ. ފައިސަލް ވިދާޅުވީ ވެކްސިން ނުދެވޭ ފަރާތްތަކެއް ހިމެނޭ ކަމަށާއި އޭގެ ތެރޭގައި މާބަނޑު މީހުންނާއި 18 އަހަރުން ދަށުގެ ކުޑަކުދިން ހިމެނޭ ކަމަށެވެ. ވުމާއެކު އެމީހުންނާ މެދު ވިސްނާ، އެމީހުން ރަައްކާތެރި ކުރަން ވެކްސިންޖެހޭ މީހުން ވެކްސިންޖެހުމަކީ މުހިއްމު ކަމެއް ކަމަށް ޑރ. ފައިސަލް ވިދާޅުވިއެވެ.
މީގެ އިތުރުން ރާއްޖެއިން އެހެން ބައެއް ބަލިތައް ނައްތާލެވި އަނެއްބައި ބަލިތައް ވެކްސިނުގެ ސަބަބުން ކޮންޓްރޯލުކުރެވިފައިވާކަން ފާހަގަކުރައްވައި ޑރ. ފައިސަލް ވިދާޅުވީ ކޮވިޑް ވެސް ވެކްސިނުގެ ސަބަބުން ކޮންޓްރޯލް ކުރެވިގެން ދާނެ ކަމަށާއި، އެކަން އޮތީ މާދުރުގައި ނޫން ކަމަށެވެ.
ޑރ. ފައިސަލް ވިދާޅުވީ ބަލިން ރައްކާތެރިވުމަށްޓަކައި ވެކްސިން އެކަނި ޖެހުމަކުން ނުނިމޭ ކަމަށެވެ. އެގޮތުން ބަލިން ރައްކާތެރި ވުމަށް އެހެން ފިޔަވަޅުތައް ވެސް އަޅަންޖެހޭ ކަމަށާއި އޭގެ ތެރޭގައި މާސްކު އެޅުމާއި އިޖްތިމާޢީ ގައިދުރުކަން ބެހެއްޓުމާއި ގިނަގިނައިން އަތް ދޮވުން ފަދަ ކަންކަން ހިމެނޭ ކަމަށެވެ.
