މާފުށީގައި ގަވާއިދާ ޚިލާފަށް ބޭނުންކުރާ ބިންތައް ހުސްކުރުމަށް އަންގައިފި
21 ފެބުރުއަރީ 2021 | އާދީއްތަ 14:04ބައެއް ބިންތަކުގައި އެކިއެކި ބޭނުންތަކަށް އިމާރާތްކޮށްފައިވޭ
ކ.މާފުށި، ގެސްޓްހައުސް ވިޔަފާރީގައި މަޝްހޫރު ރަށެއް
ކ.މާފުށީގައި ގަވާއިދާ ޚިލާފަށް ބޭނުންކުރާ ބިންތައް ހުސްކުރުމަށް ކައުންސިލުން އަންގައިފިއެވެ.
ކައުންސިލުން ބުނީ ހުއްދަނެތި ގަވާއިދާ ޚިލާފަށް މާފުށީގެ ބިންތަކުގައި އެކިއެކި ބޭނުންތަކަށް އިމާރާތްކޮށް، ތަކެތި ބަހައްޓާފައިވާކަމަށް ފާހަގަކުރެވިފައިވާ ކަމަށެވެ.
އެހެންކަމުން ގަވާއިދާ ޚިލާފަށް ބަހައްޓާފައިހުރި ތަކެއްޗާއި ކޮށްފައިވާ އިމާރާތް، އާދިއްތަ ދުވަހުން ފެށިގެން 07 (ހަތެއް) ދުވަހުގެ ތެރޭގައި ނަގަންޖެހޭ ކަމަށް ކައުންސިލުން ބުނެއެވެ. އަދި ހުއްދަނެތި އެއްވެސް ބޭނުމެއް ކުރަމުންދާނަމަ އެކަމެއް ހުއްޓާލުމަށާއި، ބިންތަކުގައި އެއްވެސް ފަރާތަކުން މަސައްކަތެއް ކުރަމުންދާނަމަ އެކަމެއް ވަގުތުން ހުއްޓާލުމަށް ކައުންސިލުން އަންގާފައިވެއެވެ.
މީގެ އިތުރުން ކައުންސިލުން ބުނީ މި މުއްދަތު ހަމަވުމުން ނުގެންގޮސް ހުރި ތަކެތި އެއިދާރާގެ ފަރާތުން ކަމާގުޅޭ އިދާރާތަކަށް އަންގައި، ކަނޑައެޅިފައިވާ އުސޫލުގެ ތެރެއިން އެތަކެތި އެބިންތަކުން ނަގައި، އެބިންތަކުގައި ހުރި އިމާރާތްތައް ތަޅާލައި ބިން ހުސްކުރާނެ ކަމަށެވެ. އެގޮތުން ބިމުގައި ހުރި ތަކެތި ހުސްކުރުމުގެ ތެރޭގައި އެތަނުން ނުގެންގޮސް ހުރި އެއްޗެއްސަށް ލިބޭ އެއްވެސް ގެއްލުމަކަށް ޒިންމާ ނުވާނެކަމަށް ކައުންސިލުން ބުނެއެވެ.
މާފުށީގައި ގަވާއިދާއި ޚިލާފަށް ބޭނުންކުރާ ބިންތައް ހުސްކުރުމަށް ކައުންސިލުން އަންގާފައިވާއިރު، އެރަށަކީ ގެސްޓްހައުސް ވިޔަފާރީގައި ބޮޑު ކާމިޔާބީއެއް ހޯދާފައިވާ ރަށެކެވެ. ގިނަ ބަޔަކު ގެސްޓްހައުސްގެ ވިިޔަފާރީގައި މަސައްކަތް ކުރަމުންދާއިރު، ބައެއް ފަރާތްތަކުން ހުސްބިންތަކުގައި ބައެއް ވިޔަފާރިތައް ކުރަމުންދާކަމުގެ ޝަކުވާ ކައުންސިލްއަށް ވަނީ ލިބިފައެވެ. ބައެއް ފަރާތްތަކުން ހުސްބިންތައް ބޭނުން ކުރުމަކީ ހަމަހަމަ އުސޫލެއް ކަމަށް ނުވާތީ އެބިންތައް ހުސްކުރަން އެންގީ ކަމަށް ކައުންސިލުން ބުނެއެވެ.
