ރައްޔިތުންގެ މަޖިލީހުގެ ޖަލްސާތަކަށް ހާޒިރު ނުވާ މެމްބަރުންނާއި ވަކި ހަމައެއް ނެތި މާ ގިނައިން ސަލާމް ބުނާ މެމްބަރުން ޖަވާބުދާރީކުރުވައި ފިޔަވަޅު އެޅޭނެ ނިޒާމެއް ގާއިމްކުރަން ޓްރާންސްޕޭރެންސީ މޯލްޑިވްސްއިން ގޮވާލައިފިއެވެ.

ރައްޔިތުންގެ މަޖިލީހުގެ ގިނަ މްމެބަރުންތަކެއް މިދިޔަ ދައުރުގެ ބޮޑުބައެއްގައި ސަލާމް ބުނެފައިވުމާއި ވަކި ގޮތެއް ނާންގައި މަޖިލީހަށް ހާޒިރުނުވާ މައްސަލަ ބޮޑުވެފައިވަނިކޮށް ޓްރާންސްޕޭރެންސީން ކުރި ޓުވީޓެއްގައި ވަނީ މިދިޔަ ދައުރުގައި ރައްޔިތުންގެ މަޖިލީހުގައި މެމްބަރުންގެ ހާޒިރީން އެންމެ ފުލުގައި ތިބި 10 މެމްބަރުންގެ ނަމާއި، ސަލާމުގެ އަދަދު އަދި ވަކި އެއްޗެއް ނާންގާ ހާޒިރު ނުވާ ދުވަސްތަކުގެ އަދަދު ވެސް އާންމުކޮށްފައެވެ.

ޓްރާންސްޕޭރެންސީން ބުނީ މެމްބަރުންނަށް އެ ފުރުސަތު ލިބެނީ މަޖިލީހުގެ ގަވާއިދުތައް އޮންނަ ގޮތުން ކަމަށެވެ. ވަކި އުސޫލެއް ނެތި ބޭނުންވަރަކަށް ސަލާމް ބުނުމުގެ ފުރުސަތު ލިބުމަކީ އެއްވެސް މަސައްކަތެއްނުކޮށް ދައުލަތުގެ އާމްދަނީން ބޮޑު މުސާރަ ނެގުމަށް ލިބޭ ވަރަށް ބޮޑު ލޫޕްހޯލްއެއް ކަމަށް ބުނެފައިވެއެވެ. އަދި އެކަން އެގޮތަށް ކުރާ މެމްބަރުން ޖަވާބުދާރީކުރުވައި ފިޔަވަޅު އެޅޭނެ ނިޒާމެއް ގާއިމުކުރުމަށް ވެސް ގޮވާލާފައިވެއެވެ.

ޓްރާންސްޕޭރެންސީން ކުރި ޓުވީޓުގައި ބުނީ މިދިޔަ ދައުރުގައި އެންމެ ދަށް ހާޒިރީ އޮތީ އިދިކޮޅު މެމްބަރުންގެ ކަމަށެވެ. އިދިކޮޅު މެމްބަރުންނަކީ ސަރުކާރު ޒިންމާދާރުކުރުވުމުގައި މަޖިލީހުގައި އިސްދައުރެއް އަދާކުރާ ބަޔަކަށްވާއިރު ދާއިރާތަކުގެ ރައްޔިތުންގެ ހުރި ކަންބޮޑުވުންތަކަށް ވެސް އެ މެމްބަރުން ޚާއްސަ ސަމާލުކަމެއް ދޭން ޖެހޭނެ ކަމަށް ވެސް ބުނެފައިވެއެވެ.

މިދިޔަ އަހަރު މަޖިލީހުގެ ޖަލްސާތަކަށް ހާޒިރުނުވުމުގެ ރިކޯޑު އޮތް މެމްބަރުންނަކީ އެ ބޭފުޅުން ނިސްބަތްވާ ޕާޓީތަކުގެ ލީޑަރުންނެވެ. ޓްރާންސްޕޭރެންސީން ބުނީ ޕާޓީތަކުގެ ލީޑަރުންގެ އަމަލުތައް އެގޮތަށް ހުރުމުން ޕާޓީ އާއި އެ ދާއިރާގެ ރައްޔިތުން ތަމްސީލްކުރުމުގައި ފެއިލްވެފައިވާ ވަރު ހާމަވާ ކަމަށެވެ. އަދި ރައްޔިތުން ތަމްސީލްކުރުމުގެ ބޮޑު ޒިންމާއެއް ނަގަން ޖެހޭ އިރު މަޖިލީހުގެ ޖަލްސާތަކަށް ހާޒިރުނުވުމުން އެނގެނީ އެ ޒިންމާތަކާ މެދު އެއްވެސް ފަރުވާލެއް ނެތްކަން ކަމަށް ވެސް ޓްރާންސްޕޭރެންސީން ބުނެފައިވެއެވެ.

ރައްޔިތުންގެ މަޖިލީހުގެ މިދިޔަ ދައުރުގައި ޖަލްސާތަކަށް ހާޒިރުނުވާ މެމްބަރުންގެ ލިސްޓަށް ބަލާއިރު މި ލިސްޓުގެ އެންމެ ކުރީގައި އިންނެވީ 17 ވަނަ މަޖިލީހުން ފެށިގެން ވެސް މަޖިލީހުގައި އިންނަވާ މެމްބަރު އަހުމަދު ސިޔާމް އެވެ. ސިޔާމް އަކީ އަބަދުވެސް މަޖިލީހަށް ހާޒިރު ނުވުމުގެ ރެކޯޑު އޮންނަ ބޭފުޅެކެވެ. ޖުމްލަ 97 ޖަލްސާއަށް މެމްބަރު ސިޔާމް ހާޒިރު ނުވާއިރު 91 ޖަލްސާއަށް ހާޒިރުނުވެ މި ލިސްޓުން ދެވަނަ ޖާގަ ހޯދާފައި ވަނީ ޖުމްހޫރީ ޕާޓީގެ ލީޑަރު އަދި ސަރުކާރު ކޯލިޝަންގެ ވެސް އެއް ލީޑަރު ކަމަށްވާ މާމިގިލީ ދާއިރާގެ މެންބަރު ގާސިމް އިބްރާހިމްއެވެ. ތިންވަނައިގައި އިންނެވީ ޕީޕީއެމްގެ މެމްބަރު އަދި މަޖިލީހުގެ މައިނޯރިޓީ ލީޑަރ އޭދަފުށި ދާއިރާގެ މެންބަރު އަހުމަދު ސަލީމްއެވެ.