އަމާޒަކީ މި ދަނޑިވަޅުގައި ވެސް ޒުވާނުންނަށް އާމްދަނީ ލިބޭނެ މަގުފަހިކޮށްދިނުން: މުޣުނީ
18 ފެބުރުއަރީ 2021 | ބުރާސްފަތި 20:49މިނިވަން މަސައްކަތްތެރިއަކަށް ވާން ސްޓެލްކޯގައި ރަޖިސްޓްރީ ކުރެވޭނެ
ސްޓެލްކޯގެ އެމްޑީ ހަސަން މުޣުނީ
ސްޓެކްކޯއިން ހުޅުވާލާފައިވާ ވަގުތީ ވަޒީފާތަކުގެ މައުގަނޑު މަގްސަދަކީ މި ދަނޑިވަޅުގައި ވަޒީފާ ގެއްލިފައި ތިބި ޒުވާނުންނަށް ވަޒީފާގެ ފުރުސަތު ފަހިކޮށްދިނުން ކަމަށް ސްޓެލްކޯގެ މެނޭޖިން ޑިރެކްޓަރ ހަސަން މުޣުނީ ވިދާޅުވެއްޖެއެވެ.
ސްޓެލްކޯއިން ހުޅުވާލާފައިވާ ވަޒީފާގެ ފުރުސަތުތަކަކީ ސްޓެލްކޯގައި ރަޖިސްޓްރީވެ ކުރު މުއްދަތައް ކުރަން ޖެހޭ މަސައްކަތްތައް ކުރެވޭނެ އުސޫލެކެވެ. އެގޮތުން ދެ ހަފްތާއަށް އަދި ހަފްތާއަކަށް ވެސް މަސައްކަތް ކުރެވޭނެ ކަމަށް ސްޓެލްކޯއިން ބުނެފައިވެއެވެ. އަދި އެގޮތަށް ކުރާ މަސައްކަތަށް އުޖޫރަދެނީ ދުވާލަކަށް ވަކި އަދަދެއް ކަނޑައަޅައިގެން ކަމަށް ވެސް ސްޓެލްކޯއިން ބުނެފައިވެއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަދައްކަވަމުން މުޣުނީ ވިދާޅުވީ ސްޓެލްކޯއިން އެ ފުރުސަތު ހުޅުވާލުމުގެ މައިގަނޑު އަމާޒަކީ ވަގުތީގޮތުން މަސައްކަތް ބޭނުންވެފައިވާ ޒުވާނުންނަށް މަސައްކަތް ހޯދައިދީ އާމްދަނީ ލިބޭނެ މަގުފަހިކޮށްދިނުން ކަމަށެވެ. އެގޮތުން މިކަމަށް މާ ބޮޑު ކޮމިޓްމަންޓެއް ވެސް ބޭނުން ނުވާނެ ކަމަށާއި، އެއް ދުވަހަށް އެއް ހަފްތާއަށް އަދި ބޭނުން ނަމަ އެއަށް ވުރެ ކުރު މުއްދަތައް ވެސް މަސައްކަތް ކުރުމުގެ މަގުފަހިކޮށްދީފައިވާނެ ކަމަށް ވިދާޅުވިއެވެ.
މުޣުނީ ވިދާޅުވީ ކޮންޓެރްކްޓް މަސައްކަތްތައް ވެސް ސްޓެލްކޯއިން އަމާޒުކުރަނީ ވަކިން ހާއްސަކޮށް ދިވެހި ޒުވާނުންނަށް ކަމަށެވެ. އޭނާ ވިދާޅުވީ އެގޮތަށް ހަދަން ވިސްނީ ކޮވިޑް-19 ތެރޭގައި ވަރަށް ގިނަ މީހުންގެ ވަޒީފާ ގެއްލި އިގްތިސޯދީ ގިނަ މަސައްކަތްތަކަކަށް ބުރޫ އަރާފައިވާތީ މި ދަނޑިވަޅުގައި މަސައްކަތް ނުކޮށް ތިބި ޒުވާނުންނަށް އަމާޒުކޮށްގެން ކަމަށެވެ.
އޭނާ ވިދާޅުވީ ،މީގެ ކުރިން އެކަހަލަ މަސައްކަތްތައް ނަގާނީ ކޮންޓްރެކްޓް ގްރޫޕްތަކުން ކަމަށާއި، ދެން އެ ގްރޫޕަކުން މަސައްކަތް ހަވާލުކުރާނީ ކޮންމެ ވެސް ބޭރު ބަޔަކަށް ކަމަށެވެ. ސްޓެލްކޯއިން ބޭނުންވަނީ އެ އާދަ ކަނޑުވާލައި އެ ފައިސާ ވެސް ދިވެހިންގެ ތެރޭގައި ރޯލް ކުރުމަށް ކަމަށް މުޣުނީ ވިދާޅުވިއެވެ.
މިޣުނީ ވިދާޅުވީ ސްޓެލްކޯއިން ދިވެހި ޒުވާނުންނަށް މަސައްކަތުގެ މަގު ފަހިކޮށްދޮނުމަށް ކުރާ މަސައްކަތްތަކުގެ ތެރެއިން ޖަލުގައި ތިބި ގައިދީންނަށް ވެސް ކަރްކެޝަންސްއާ ގުޅިގެން އެކި މަސައްކަތްތައް ހަވާލުކޮށް ކުރުވަމުން އަންނަ ކަމަށެވެ.
