ޔުވެންޓަސްގެ މައްޗަށް ޕޯޓޯ ކުރި ހޯދައިފި

ޔުއެފާ ޗެމްޕިއަންސް ލީގުގެ ދެވަނަ ބުރުގެ ފުރަތަމަ ލެގުގައި ޕޯޓޯއިން އަމިއްލަ ދަނޑުގައި ޔުވެންޓަސް ބަލިކޮށްފިއެވެ.

ބުދަ ދުވަހުގެރޭ ކުޅުނު މެޗުން ޕޯޓޯ މޮޅުވީ 2-1 ގެ ނަތީޖާއަކުންނެވެ. މިއީ ޔޫރަޕުގެ މުބާރާތެއްގައި ޕޯޓޯއިން ޔުވެންޓަސް ބަލިކުރި ފުރަތަމަ ފަހަރެވެ.

މި މެޗުގައި ޔުވެންޓަސްއަށް އެންމެ އެދެވޭ ކުޅުމެއް ދެއްކިފައި ނުވާއިރު، މެޗުގެ ވަރަށް ކުރީކޮޅު ޕޯޓޯއިން ވަނީ ލީޑު ނަގާފައެވެ. އެގޮތުން މެޗު ފަށައިގެން 63 ވަނަ ސިކުންތުގައި މި ލަނޑު އެ ޓީމަށް ކާމިޔާބުކޮށްދިނީ މެހްދީ ޓަރޭމީއެވެ. އޭނާ މި ލަނޑު ކާމިޔާބުކުރީ ޔުވެންޓަސްގެ ރޮޑްރީގޯ ބެންޓަކޫރް ހެދި ގޯހެއްގެ ފައިދާ ނަގައިގެންނެވެ.

އަދި މެޗުގެ ދެވަނަ ހާފު ފަށައިގެން 19 ވަނަ ސިކުންތުގައި ޕޯޓޯއިން ވަނީ ލީޑު ފުޅާކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ މޫސަ މަރޭގާއެވެ. އެކަމަކު އޭގެ ފަހުން ޔުވެންޓަސްއިން ކުޅުން ރަނގަޅުކުރިއިރު، މެޗު ނިމެން އަށް މިނެޓަށް ވެފައި ވަނިކޮށް ޔުވެންޓަސްއިން ވަނީ ލަނޑެއް ޖަހައި، ފަރަގު ކުޑަކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ ފެޑެރިކޯ ކިއޭސާއެވެ.

ޗެމްޕިއަންސް ލީގުގެ ދެވަނަ ބުރުގެ ފުރަތަމަ ލެގުގައި ރަށުން ބޭރުގައި ކުޅުނު މެޗުން ޔުވެންޓަސް ބަލިވިއިރު، ދެވަނަ ލެގުގައި މި ދެ ޓީމު ބައްދަލުކުރާ މެޗު އޮންނާނީ ޔުވެންޓަސްގެ ދަނޑުގައި އަންނަ މާޗު މަހުގެ 10 ވަނަ ދުވަހުއެވެ.