ކޮވިޑް-19އަށް ވެކްސިން ޖަހަން އިދިކޮޅު ކޯލިޝަނުން ގޮވާލައިފި
17 ފެބުރުއަރީ 2021 | ބުދަ 14:20އިދިކޮޅުން މީގެ ކުރިން ވެކްސިން ނުޖަހަން ގޮވާލައި މުޒާހަރާ ވެސް ކުރި
ޕީޕީއެމްއިން ވެކްސިންއާ ދެކޮޅަށް ކުރި މުޒާހަރާގެ ތެރެއިން
ކޮވިޑް-19އަށް ރާއްޖޭގައި މިހާރު ޖަހަން ފަށާފައިވާ ކޮވިޝީލްޑް ވެކްސިން ޖަހަން އިދިކޮޅުން ގޮވާލައިފިއެވެ.
ރާއްޖެއަށް އިންޑިއާއިން ހަދިޔާކުރި ކޮވިޝީލްޑް ވެކްސިން މި މަހުގެ އެއް ވަނަ ދުވަހު ޖަހަން ފެށުމާއެކު އިދިކޮޅުން ވަނީ އެކަމަށް ވަރަށް ބޮޑަށް ފާޑުކިޔާފައެވެ. އޭރު އެ ވެކްސިންއަށް ދުނިޔޭގެ ސިއްހަތު ޖަމިއްޔާއިން ހުއްދަ ދީފައި ނުވިނަމަވެސް އެއީ ރައްކާތެރި ވެކްސިނެއް ކަމަށް ބުނެފައިވެއެވެ.
ދުނިޔޭގެވެސް ވެކްސިން އުފައްދާ އެންމެ ބޮޑު ކާރުހާނާ ކަމަށްވާ އިންޑިއާގެ ސިރަމް އިންސްޓިޓިއުޓުން އުފެއްދި ކޮވިޝީލްޑް ވެކްސިންއަކީ އޮކްސްފޮޑް-އެސްޓްރާޒެނެކާ ފޯމިއުލާއަށް ތައްޔާރުކޮށްފައިވާ ވެކްސިންއެކެވެ. ޑަބްލިއުއެޗްއޯއިން މިހާރު ވަނީ މި ވެކްސިން އިމަޖެންސީ ހާލަތުގައި ބޭނުންކުރުމުގެ ހުއްދަ ދީފައެވެ.
އިދިކޮޅު ޕީޕީއެމް / ޕީއެންސީ ކޯލިޝަނުން ނެރުނު ބަޔާނުގައި ބުނީ އޮކްސްފޯޑް-އެސްޓްރާޒެނެކާ މަރުކާގެ ވެކްސިނާއި އިންޑިޔާގެ ސީރަމް އިންސްޓިޓިއުޓުން އުފައްދާ ކޮމިޝީލްޑް މަރުކާގެވެކްސިން، އުމުރުން 18 އަހަރުން މަތީގެ މީހުން އަދި ކުރިން ހުއްދަ ދީފައިވާ ފައިޒަރ-ބަޔޯއެންޓެކް މަރުކާގެ ވެކްސިންގެ އިތުރުން އެ ދެ މަރުކާވެސް ބޭނުންކުރުމަށް އެ ޖަމިއްޔާއިން ގޮވާލާފައިވާތީ، އެކަމަށް އިޖާބަދީ، ވެކްސިން ޖެހުމަށް އެ ކޯލިޝަނުން ހިތްވަރުދޭ ކަމަށެވެ.
އެ ބަޔާނުގައި ބުނީ ކޯލިޝަނުން އަބަދުވެސް އިސްކަން ދޭނީ ރައްޔިތުންގެ ސަލާމަތާއި ރައްކާތެރިކަމަށް ކަމަށެވެ. އެގޮތުން ވެކްސިންތަކުގެ ސަލާމަތްތެރިކަމާއި ރައްކާތެރިކަން ދެނެގަތުމުގެ ފަންނީ ޤާބިލިއްޔަތު ރާއްޖޭގައި ނެތުމުން ޒަމާނުއްސުރެ އެފަދަ ކަންކަމުގައި އަމަލުކުރަމުން އައިގޮތް ކަމުގައިވާ ޑަބްލިއުއެޗްއޯގެ ލަފަޔާއި އިރުޝާދު ބަލައިގަތުމަކީ މިކޯލިޝަނުން ކުރިއަށްއޮތް ތަނުގައިވެސް ކަންކުރާނެގޮތް ކަމަށް ބުނެފައިވެއެވެ. އަދި، އެގޮތަށް އަމަލުކުރުމަށް ކަމާބެހޭ ފަރާތްތަކަށްވެސް ގޮވާލާފައިވެއެވެ.
އިދިކޮޅުން ބުނީ އާންމުންނަށް ވެކްސިން ޖެހުމަށް ހިތްވަރު ދިނުމުގެ ގޮތުން ޕާޓީގެ އިސްވެރިންނާއި، ކައުންސިލް މެމްބަރުން ވެސް ކުރިއަށް އޮތް ދުވަސްތަކުގެ ތެރޭގައި ވެކްސިން ޖަހާނެ ކަމަށެވެ.
އިދިކޮޅު ކޯލިޝަނުން މީގެ ކުރިން ވެކްސިންއާ ދެކޮޅު ވާހަކަދައްކާ މަގުމައްޗަށް އެއްވެ އެ ވެކްސިން ނުޖެހުމަށް ގޮވާލާފައިވާއިރު، އޭރުވެސް އެ ޕާޓީގެ ބައެއް އިސް މެމްބަރުން އައީ ވެކްސިން ޖަހަމުންނެވެ. އެގޮތުން ޕާޓީގެ އެޑްވައިޒަރ އަދި ކުރީގެ ރައީސް ޑރ. މުހައްމަދު ވަހީދު ހަސަން މަނިކާއި، ރައީސް ޔާމީންގެ ގާނޫނީ ވަކީލް އަދި އެ މަނިކުފާނުގެ ވެރިކަމުގައި ފުރަތަމަ ނައިބު ރައީސްކަން ކުރެއްވި ޑރ. މުހައްމަދު ޖަމީލް އަހުމަދު ވެސް ވަނީ ވެކްސިން ޖައްސަވާފައެވެ.
