މިދިޔަ ޑިސެމްބަރު މަހު އަތުލައިގަތް 72 ކިލޯގެ މަސްތުވާތަކެތީގެ މައްސަލައިގައި 10 މީހެއްގެ މައްޗަށް ދައުވާ އުފުލައިފި

ރާއްޖެއަށް 72 ކިލޯގެ މަސްތުވާތަކެތި އެތެރެކުރި މައްސަލައިގައި 10 މީހެއްގެ މައްޗަށް ދައުވާ އުފުލައިފިއެވެ.

ޕްރޮސެކިއުޓަރ ޖެނެރަލް (ޕީޖީ)ގެ އޮފީހުން މައުލޫމާތު ދީފައިވާގޮތުގައި، މި މައްސަލައަކީ މިދިޔަ ޑިސެމްބަރު މަހުގެ 8 ވަނަ ދުވަހު ސ. ހުޅުދޫ، ދޭލިޔާގެ، އިރުފާން ތަޤިއްޔުއާއި، ރ. އިންގުރައިދޫ، އެލެސްކާ، މުޙައްމަދު ވިސާމް އިސްވެހުރެ، "މަސްޖަރީ 2" ނަމަކަށްކިޔާ ދޯންޏެއްގައި، ބަރުދަނުގައި 72 ކިލޯ ހުންނަވަރުގެ މަސްތުވާތަކެތި ދިވެހިރާއްޖެއަށް އެތެރެކޮށް އެތަކެތި ޓްރެފިކްކުރިކަމަށް ތުހުމަތުކުރެވުނު މައްސަލަކެއެވެ. ޕީޖީ އޮފީހުން ބުނީ، އެ މީހުންގެ މައްޗަށް ދަޢުވާތައް ކުރުމަށް 14 ފެބްރުވަރީ 2021 ދުވަހު ކްރިމިނަލް ކޯޓަށް ހުށަހަޅާފައިވާ ކަމަށެވެ.

މަސްތުވާތަކެތީގެ މި މައްސަލާގައި ދައުވާ އުފުލާފައިވާ މީހުންނާއި އެ މީހުންގެ މައްޗަށް އުފުލި ދައުވާގެ ތަފްސީލް ޕީޖީ އޮފީހުން ވަނީ އާންމުކޮށްފައެވެ.

މި މައްސަލާގައި ދައުވާ އުފުލި 10 މީހުން:

1. ސ. ހުޅުދޫ، ދޭލިޔާގެ، ޢިރުފާން ތަޤިއްޔު

2. ރ. އިނގުރައިދޫ، އެލެސްކާ، މުޙައްމަދު ވިސާމް

3. ރ. އިނގުރައިދޫ، އެލެސްކާ، ޢަބްދުﷲ ވިސާމް

4. ދ. މާއެނބޫދޫ، އަނބުގޮސްދޮށުގެ، އަޙްމަދު ނަޞީރު

5. ކ. މާލެ، ހ. ގާރޑްންބިޔުޓީ، މުޙައްމަދު އަކްރަމް

6. ހދ. ނޮޅިވަރަންފަރު، ނޫރީއާގެ، މުޙައްމަދު ޝަރީފް

7. ލ. ގަން-ތުނޑި، ޕެރިސްހޮލިޑޭ، މުޙައްމަދު ފުރުޤާން

8. ރ. ރަސްގެތީމު، ފީރޯޒްގެ، އަޙްމަދު ޝިނާން

9. ތ. ތިމަރަފުށި، ތަނޑިރަތްމާގެ، މުޙައްމަދު ވަޖީޙު

10. ކ މާލެ، މއ. ކަނޑޫގެ، ޢަލީ އަޙުމަދު

އެ 10 މީހުންގެ މައްޗަށް މަސްތުވާތަކެއްޗާބެހޭ ޤާނޫނު ގެ 105 ވަނަ މާއްދާގެ (ހ) އާ ޙަވާލާދީ، އެ މާއްދާގެ (ނ) ގެ ދަށުން ޑައިމޯފިން ޓްރެފިކްކުރުމުގެ ކުށުގެ ދަޢުވާ އުފުލާފައިވެއެވެ.

އަދި މީގެއިތުރުން، މަސްތުވާތަކެއްޗާބެހޭ ޤާނޫނުގެ 115 ވަނަ މާއްދާގެ (ހ) އާއި، 148 ވަނަ މާއްދާއާ ޙަވާލާދީ، އެ ޤާނޫނުގެ 115 ވަނަ މާއްދާގެ (ށ) ގެ ދަށުން ކެނެބިސް ބޭނުންކުރުމުގެ ކުށުގެ ދަޢުވާ، އޭގެތެރެއިން ތިން މީހެއްގެ މައްޗަށް އުފުލާފައިވެއެވެ. އެތިން މީހުންނަކީ، އަހުމަދު ނަޞީރުއާއި މުޙައްމަދު އަކްރަމް އަދި މުޙައްމަދު ޝަރީފްއެވެ.