ސައްޙަ ލިޔެކިޔުން ނެތް ބިދޭސީންނަށް ވެކްސިން ދިނުން ފެބްރުއަރީ 16ގައި ފަށަން ނިންމާފައިވާކަން ހާމަކޮށްފިއެވެ.

މިކަން ހާމަކޮށްފައިވަނީ، އާދިއްތަ ދުވަހުގެ ރޭ ހެލްތް އިމަޖެންސީ އޮޕަރޭޝަން ސެންޓަރ، އެޗްއީއޯސީއިން ބޭއްވި ނޫސްވެރިންގެ ބައްދަލުވުމުގެ ތެރެއިންނެވެ. ނޫސްވެރިންގެ ބައްދަލުވުމުގައި ވާހަކަދައްކަވަމުން ދިވެހި ރެޑްކްރެސެންޓްގެ ސެކެޓްރީ ޖެނެރަލް ފާތިމަތު ހިމްޔާ ވިދާޅުވީ، ކޮވިޑްގެ ޙާލަތު ކޮންޓްރޯލްކުރުމަށާއި، ސަރުކާރުގެ ވެކްސިން ދިނުމުގެ ޕްރޮގްރާމަށް އެހީވުމަށް އެ ޖަމްޢިއްޔާއިން ގިނަ މަސައްކަތްތަކެއް ކުރަމުންދާކަމަށެވެ. އެގޮތުން މި މަސައްކަތުގެ ދަށުން އެމްއާރްސީގެ ދަރުމަވެރިން ދަނީ ނަފްސާނީ އެހީ ފޯރުކޮށްދިނުމާއި، ވެކްސިން ދޭ ތަންތަނުގައި ކަންކަން އިންތިޒާމުކުރުމުގައި އެހީތެރިވަމުންކަމަށެވެ. މި މަސައްކަތުގެ އިތުރުން އުމުރުން ދުވަސްވީ މީހުންނަށާއި، އެނދުމަތިވެފައިވާ ފަރާތްތަކަށް ވެކްސިން ދިނުމަށް މޯބައިލް ވެކްސިނޭޝަން ދިނުމުގެ މަސައްކަތް މިމަހުގެ 13 ވަނަ ދުވަހު ފަށާފައިވާކަން ހިމްޔާ ހާމަކުރެއްވިއެވެ. މި މަސައްކަތުގެ ދަށުން އެމްއާރްސީގެ އެމްބިއުލަންސްއާއި، ޕޭޝަންޓް ޓްރާންސްޕޯޓް ޓީމުން އެހީތެރިވަމުންދާކަމަށް ހިމްޔާ ވިދާޅުވިއެވެ.

ކޮވިޑްގެ ޙާލަތު ރާއްޖޭގައި ކޮންޓްރޯލްކުރުމަށް ކުރަންޖެހޭ މަސައްކަތް އިތުރުކުރަންޖެހިފައިވާކަން ފާހަގަކުރައްވާ ހިމްޔާވިދާޅުވީ، ވެކްސިން ލިބެންޖެހޭ އެންމެނަށް ވެކްސިން ކަށަވަރުކުރުމަށް ސަރުކާރަށް އެހީވުމަށް މަސައްކަތް ފަށާފައިވާކަމަށެވެ. ލިޔެކިޔުން ނެތް ބިދޭސީންނަކީ ރާއްޖޭގައި ގިނަ އަދަދަކަށް އުޅޭބަޔަކަށް ވާއިރު، މުޖުތަމަޢުގެ ރައްކާތެރިކަން ކަށަވަރުކުރުމަށް މި އާބާދީއަށް ވެކްސިންޖެހޭކަން ހިމްޔާ ފާހަގަކުރެއްވިއެވެ. މި މަސައްކަތުގެ ދަށުން ސައްޙަ ލިޔެކިޔުން ނެތް ބިދޭސީންނަށް ވެކްސިން ދިނުން ފެބްރުއަރީ 16ގައި ފަށަން ނިންމާފައިވާކަން ހިމްޔާ ހާމަކުރެއްވިއެވެ. މިގޮތަށް ވެކްސިން ދޭނީ ދަމަނަވެށީގެ ބެނިފިޝަރީ ސިސްޓަމްގައި ރަޖިސްޓްރީވެގެންނެވެ. އެގޮތުން ދިވެހި ރެޑް ކްރެސެންޓްގެ މައިގްރެންޓް ސަޕޯޓްގެ ހޮޓްލައިން ނަންބަރުތަކަށް ގުޅައިގެން މި ސިސްޓަމްގައި ރަޖިސްޓްރީ ވެވޭނެކަމަށް ހިމްޔާ ވިދާޅުވިއެވެ. މި ސިސްޓަމްގެ ދަށުން ފެބްރުއަރީ 16 ވަނަ ދުވަހު ވެކްސިން ޖެހުމުގެ މަސައްކަތް ފަށާފައިވާއިރު، ދުވާލެއްގެ މައްޗަށް 250 މީހުންނަށް ވެކްސިން ޖެހުމަށް އަމާޒު ހިފާފައިވާކަމަށް ހިމްޔާ ވިދާޅުވިއެވެ. ހިމްޔާ ވަނީ ރެޑްކްރެސެންޓްގެ މަސައްކަތްތައް ފުޅާކުރަމުންދާއިރު، މި ޙާލަތުގައި ދަރުމަވެރިން އިންތިހާއަށް ބޭނުންވެފައިވާކަމަށް ވިދާޅުވެފައެވެ.

ލިޔެކިޔުން ނެތް ބިދޭސީން ވެކްސިންޖެހުމުގެ ޕްރޮގްރާމް ފެށުމަށް ތައްޔާރުވެފައިވާއިރު، މިގޮތަށް ރާއްޖޭގައި އުޅޭ ބިދޭސީންގެ އަދަދު ވަރަށް ގިނައެވެ. ކޮވިޑްގެ ކުރިންނާއި ކޮވިޑްގެ ތެރެއިން ވެސް ދިވެހި ސަރުކާރުން ވަނީ މިފަދަ ފަރާތްތަކަށް އެހީވުމަށް ގިނަ މަސައްކަތްތަކެއް ކޮށްފައެވެ. އެގޮތުން އެ ފަދަ ފަރާތްތައް ޤައުމަށް އަނބުރާ ދިއުމުގައި އެހީވުމާއި، ޤަވާއިދުގެ ތެރެއަށް ވައްދާ ރީ-ރަޖިސްޓަރީވުމުގެ ބޮޑު ހަރަކާތެއް ވެސް ގަލޮޅު ދަނޑުގައި ވަނީ ކުރިއަށް ގެންގޮސްފައެވެ.