އައްޑޫ ސިޓީން މިހާތަނަށް 60 މީހަކު ޕޮޒިޓިވްވެއްޖެ
14 ފެބުރުއަރީ 2021 | އާދީއްތަ 17:29341 މީހުން ޑައިރެކްޓް ކޮންޓެކްޓުންގެ ގޮތުގައި ފާހަގަކުރެވިފައިވޭ
އައްޑޫ ސިޓީ، ކޮވިޑް-19 ފެތުރެމުންދާތީ ޚާއްސަ ފިޔަވަޅުތަކެއް މިހާރު ވަނީ އަޅާފައި
އައްޑޫ ސިޓީން މިހާތަނަށް 60 މީހުން ކޮވިޑް-19އަށް ޕޮޒިޓިވްވެއްޖެއެވެ.
އައްޑޫ އެމަރޖެންސީ އޮޕްރޭޝަން ސެންޓަރުން ބުނީ ހޮނިހިރު ދުވަހުގެ އިރުއޮއްސި 6:00ން އާދިއްތަ ދުވަހުގެ އިރުއޮއްސި 6:00ށް އިތުރު ދެމީހަކު ޕޮޒިޓިވްވެ، މިހާތަނަށް 60 މީހުން ޕޮޒިޓިވްވެފައިވާ ކަމަށެވެ. އަދި 341 މީހުން ޑައިރެކްޓް ކޮންޓެކްޓުންގެ ގޮތުގައި ފާހަގަކުރެވިފައިވާ ކަމަށެވެ.
އެސެންޓަރުން އާއްމުކޮށްފައިވާ ތަފާސްހިސާބުތައް ދައްކާ ގޮތުން ހިތަދޫން 20 މީހުން، ފޭދޫން 11 މީހުން، ހުޅުދޫމީދޫން 25 މީހުން އަދި މަރަދޫފޭދޫން 4 މީހުން ޕޮޒިޓިިވްވެފައިވާ ކަމަށެވެ.
އެޑްމިޓްކޮށްގެން 5 މީހަކަށް ފަރުވާ ދެމުންދާއިރު، 185 ގެއެއް ވަނީ ކަރަންޓީންއަށްލާފައެވެ.
އައްޑޫ ސިޓީން ކޮވިޑްގެ ކޭސްތައް ފެންނަމުންދާތީ ސާމްޕަލްތައް ނެގުމުގެ މަސައްކަތްތައް ދަނީ ކުރަމުންނެވެ. އެގޮތުން މިހާތަނަށް 98 ސާމްޕަލެއް ނަގާފައިވެއެވެ.
އައްޑޫ ސިޓީގެ އާއްމު ހަލާތާއި ބެހޭ ގޮތުން ރާއްޖެއެމްވީއަށް އެ ސިޓީގެ މޭޔަރު އަބްދުﷲ ސޯދިގު މީގެ ކުރިން ވިދާޅުވީ އަޅާފައިވާ ފިިޔަވަޅުތަކާ އެއްގޮތަށް ހުރިހާ ރައްޔިތުން ވެސް އަމަލު ކުރަމުންދާ ކަމަށެވެ. އެގޮތުން މާސްކް ނާޅާ ރައްޔިތަކު ނޫޅޭ ކަމަށާއި، ކެފޭ، ރެސްޓޯރަންޓް އަދި ފިހާރަތަކުން ވެސް ގައިޑްލައިންތަކާ އެއްގޮތަށް އަމަލުކުރަމުންދާ ކަމަށް މޭޔަރު ވިދާޅުވިއެވެ.
މޭޔަރު ވިދާޅުވީ އަސާސީ ހުރިހާ ޚިދުމަތެއް ލިބޭ ކަމަށާއި، ބޭނުންވާ މުދާ ވެސް ލިބޭ ކަމަށެވެ. އަދި ބޭހާއި، ކާބޯތަކެތީގެ ދަތިކަމެއް ކުރިމަތިނުވާކަން މޭޔަރު ފާހަގަކުރެއްވިއެވެ.
އައްޑޫ ސިޓީން ދެ ކްލަސްޓަރއެއް ފެނިފައިވެއެވެ. އެއީ ޕްރޮޖެކްޓް ސައިޓަކުން ފެނުނު ކްލަސްޓަރއަކާއި، އޭވިއޭޝަން ކްލަސްޓަރއެކެވެ. ޕްރޮޖެކްޓް ސައިޓް ކްލަސްޓަރއާއި ގުޅިގެން ހުޅުދޫމީދޫން ނެގި ހުރިހާ ސާމްޕަލެއް ވަނީ ނެގެޓިވްވެފައެވެ. އެކްލަސްޓަރ ކޮންޓެއިންވެފައިވީ ނަމަވެސް އޭވިއޭޝަން ކްލަސްޓަރ އޮތީ އެކްޓިވްކޮށެވެ.
