މާދަމާއިން ފެށިގެން މާލެ ސަރަޙައްދުގައި އެއްފަހަރާއި 10 މީހުންށްވުރެ ގިނަ މީހުން އެއްވެ އުޅުން މަނާ
ފިޔަވަޅު ތަންފީޒު ކުރާނީ 13 ފެބްރުއަރީން ފެށިގެން
މާލޭ ސަރަޙައްދުގެ މަގުމަތީގެ މަންޒަރެއް- މިހާރު އަޅަމުންދާ ފިޔަވަޅުތައް ވަނީ އިތުރަށް ވަރުގަދަ ކޮށްފައި
ހޮނިހިރު ދުވަހުން ފެށިގެން މާލެ ސަރަޙައްދުގައި އެއްފަހަރާ 10 މީހުންނަށްވުރެ ގިނައިން އެއްވެ އުޅުން ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން މަނާކޮށްފިއެވެ.
ހުކުރު ދުވަހު އެޗްޕީއޭއިން އާންމުކުރި އިއުލާނެއްގައި ބުނީ، 13 ފެބްރުއަރީން ފެށިގެން، މާލެ ސަރަޙައްދުގައި އެއްފަހަރާ 10 (ދިހައެއް) މީހުނަށްވުރެ ގިނަމީހުން މަގުމައްޗާއި އާންމުތަންތަނަށް އެއްވެ އުޅުން މަނާވާނެ ކަމަށެވެ. އަދި އެ ފިޔަވަޅުތައް ތަންފީޒު ކުރާނީ ފުލުހުންނާއި ކަމާބެހޭ މުއައްސަސާތަކުންކަން އެޗްޕީއޭއިން ފާހަގަ ކޮށްފައިވެއެވެ.
އޭގެ އިތުރުން، ޑިރެކްޓަރ ޖެނެރަލް އޮފް ޕަބްލިކް ހެލްތް މައިމޫނާ އަބޫބަކުރު ކަނޑައަޅުއްވާ ޚާއްސަ ޙާލަތްތަކުގައި އެކަމަނާ އަންގަވާ ގޮތެއްގެ މަތިން އަމަލު ކުރެވޭނެކަން ފާހަގަ ކޮށްފައިވެއެވެ.
އެޗްޕީއޭއިން އެގޮތަށް ނިންމާފައިވާއިރު، މާލެ ސަރަޙައްދުގައި އެއްގަމު އުޅަނދު ދުއްވާ ގަޑިތަކަށްވެސް ވަނީ ބަދަލު ގެނެސްފައެވެ. އެގޮތުން އެއްގަމު އުޅަނދު ދުއްވުން މަނާ ގަޑިތަކުގެ ގޮތުގައި ހަވީރު 06:00ން ފެށިގެން ހެނދުނު 06:00ށް ވަނީ ކަނޑައަޅާފައެވެ.
