މަސްވެރިކަންކުރުމުގައި ހަރަކާތްތެރިވާ އުޅަނދުފަހަރުގެ ފަޅުވެރިން ކޮވިޑް-19ގެ ބަލިމަޑުކަމުގެ ސަބަބުން އަޅާފައިވާ ފިޔަވަޅުތަކާ އެގޮތަށް އަމަލުކުރުމަށް އިލްތިމާސްކޮށްފިއެވެ.

މިނިސްޓްރީ އޮފް ފިޝަރީޒް، މެރީން ރިސޯސަސް އެންޑް އެގްރިކަލްޗަރއިން ބުނީ ކޮވިޑް-19ގެ ބަލިމަޑުކަން ރާއްޖޭގައި ފެތުރޭ މިންވަރު ދަށްކުރުމަށް ހެލްތް ޕްރޮޓެކްޝަން އެޖެންސީގެ ފަރާތުން ގިނަ ފިޔަވަޅުތަކެއް އަޅައި، ރަށްރަށަށް ދަތުރުކުރުމުގައި އަދި މަސައްކަތުގެ މާހައުލުގެ އިންތިޒާމުތައް ބައްޓަން ކުރަންވީ ގޮތުގެ އުސޫލުތައް އާއްމުކޮށްފައިވާ ކަމަށެވެ.

ފިޝަރީޒް މިނިސްޓްރީން ބުނީ ރާއްޖެ ފުރަ ބަންދަކަށް ދިޔަ ހާލަތުގައާއި، އަދި އޭގެ ފަހުގައި ވެސް ވަކި ހަމަތަކެއްގެ މަތިން ރަށްރަށަށް ދަތުރުކުރުމުގެ ހުއްދަތައް ދޫކޮށް، މަސްވެރިކަން ކުރުމުގައި ލައިސަންސް ލިބިގެން ހަރަކާތްތެރިވާ އަދި އެކި ސަރަޙައްދުތަކުގައި ގާއިމުވެފައިވާ މަސް ގަންނަ ކުންފުނިތަކަށް މަސް ވިއްކުމުގައި، އަމަލުކުރަންވީ އުސޫލުތަކަށް މަސްވެރިކަމުގައި ހަރަކާތްތެރިވާ ފަރާތްތަކުގެ ސަމާލުކަން ގެނެސްފައިވާ ކަމަށެވެ.

އެގޮތުން، މަސްވެރިކަން ކުރުމަށްފަހު މަސް ގަންނަ ފަރާތްތަކަށް މަސް ވިއްކުމުގެ މަރުހަލާގައި މަސް ގަންނަ ފެސިލިޓީތަކަށް ނުފައިބާ މަސް ގަތުމުގެ އިންތިޒާމުތައް ހަމަޖެއްސުމަށާއި، އަދި މަސްވެރިކަންކޮށް ނިމުމަށްފަހު އެންބުރި ދާންވާނީ އެ އުޅަނދެއް ނިސްބަތްވާ ރަށަށެވެ. އަދި ހުޅުމާލޭގައި ނުވަތަ މާލެ ސަރަހައްދުގެ ރަށެއްގައި ގާއިމުކޮށްފައިވާ މަސް ގަންނަ ސެންޓަރަކަށް މަސް ވިއްކުމަށް އަންނަ އުޅަނދުފަހަރުގެ ފަޅުވެރިން އެއްގަމަށް ނުފައިބާ މަސް ގަތުމުގެ އިންތިޒާމުތައް ހަމަޖެއްސުމަށް ކުންފުނިތަކަށް އިރުޝާދު ދީފައިވާ ކަަމަށް ވެސް މިނިސްޓްރީން ބުނެއެވެ.

މިކަންކަމަށް ރިއާޔަތްކޮށް، މަސް ގަންނަ ކުންފުނިތަކާއި މަސްވެރިންގެ ފަރާތުން ކޮވިޑް-19ގެ ހާލަތުގައި ވެސް މަސްވެރިކަމުގެ މަސައްކަތް ހުއްޓުމަކަށް ނައިސް ކުރިއަށް ގެންދިއުމަށްޓަކައި ކަނޑައަޅާފައިވާ އުސޫލުތަކާއި އެއްގޮތަށް އަމަލުކޮށްފައިވާކަން ފިޝަރީޒް މިނިސްޓްރީން ފާހަގަކުރެއެވެ. އަދި މިނިސްޓްރީން ބުނީ މިދަނޑިވަޅަކީ ބަލިމަޑުކަމުގެ ހާލަތު ރާއްޖޭގައި އިތުރަށް ގޯސްވަމުންދާ ހާލަތެއް ކަމަށްވާތީ، އުޅަނދުފަހަރުގެ ހަރަކާތްތައް ކޮންޓްރޯލް ކުރުމަށް އިތުރު ފިޔަވަޅުތަކެއް އަޅަންޖެހިއްޖެނަމަ އެކަމުގެ ސަބަބުން މަސްވެރިކަމުގައި ހަރަކާތްތެރިވާ ފަރާތްތަކަށް ބޮޑެތި ގެއްލުންތަކާއި ދަތިތައް ކުރިމަތިވުމުގެ ފުރުސަތު އޮތް ކަމަށެވެ.

އެހެންކަމުން މަސް ގަންނަ ކުންފުނިތަކާއި މަސްވެރި އުޅަނދުފަހަރުން ކުރިން ވެސް އަމަލުކުރަމުން އައި އުސޫލުތަކާއި އެއްގޮތަށް މަސް ގަންނަ ސެންޓަރުތަކަށް ދަތުރުކޮށް މަސް ވިއްކުމުގެ މަރުހަލާގެ ކަންކަން ހަމަޖެއްސުމަށް މިނިސްޓްރީން އެދިފައިވެއެވެ. އަދި ވަކިން ޚާއްސަކޮށް މާލެ ސަރަހައްދުގައި ގާއިމުކޮށްފައިވާ މަސް ގަންނަ ސެންޓަރަކަށް މަސް ވިއްކުމަށް އަންނަ އުޅަނދުފަހަރުގެ ފަޅުވެރިން އެއްގަމަށް ނުފައިބާ މަސް ވިއްކުމުގެ މަރުހަލާ ފުރިހަމަކޮށް، ދޯންޏަށް ބޭނުންވާ ޚިދުމަތްތައް ހޯދުމަށް ވަނީ އިލްތިމާސްކޮށްފައެވެ.