އެސެޓް ރިކަވަރީ ކޮމިޝަންގެ މަސައްކަތްތައް ކުރިއަށްދޭ - ސަރުކާރު
10 ފެބުރުއަރީ 2021 | ބުދަ 21:14އެސެޓް ރިކަވަރީ ކޮމިޝަން އުފެއްދީ ކޮރަޕްޝަންގެ މައްސަލަތައް ބެލުމަށް
ރައީސް އޮފީހުގެ ތަރުޖަމާން މަބްރޫކް އަޒީޒް - ކޮރަޕްޝަންގެ މައްސަލަތައް ބެލުމުގައި ވަކި މީހަކަށް ނުބަލާނެކަމުގެ ޔަގީންކަން ދެއްވާފައިވޭ
ކޮރަޕްޝަންގެ މައްސަލަތައް ބަލަން އުފައްދާފައިވާ ޕްރެޒިޑެންޝަލް ކޮމިޝަން އޮން ކޮރަޕްޝަން އެންޑް އެސެޓް ރިކަވަރީ ކޮމިޝަން (އެސެޓް ރިކަވަރީ ކޮމިޝަން) މިހާރު ވެސް މައްސަލަތަކެއް ބަލަމުންދާ ކަމަށާއި، ކޮރަޕްޝަންގެ އެއްވެސް މައްސަލައެއް ނުބަލާ ދޫކޮށް ނުލާނެ ކަމަށް ސަރުކާރުން ބުނެފިއެވެ.
ރައީސް އޮފީހުން ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާން މަބްރޫކް އަޒީޒް ވިދާޅުވީ މިސަރުކާރު ވެރިކަމަށް އައުމަށް އެންމެ ބޮޑު އެއްކަމެއްގެ ގޮތުގައި ވައުދު ވީ ކޮރަޕްޝަންއާ ދެކޮޅަށް މަސައްކަތް ކުރުން ކަމަށާއި، އެސެޓް ރިކަވަރީ ކޮމިޝަން އުފެއްދީ އެމަގުސަދުގައި ކަމަށެވެ. އަދި އެކޮމިޝަނުންގެ މަސައްކަތްތައް ވެސް ކުރިއަށްދާކަން މަބްރޫކް ފާހަގަކުރެއްވިއެވެ.
މަބްރޫކް ވިދާޅުވީ މޯލްޑިވްސް މާކެޓިން އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރްސީ)ގެ މައްސަލާގެ އިތުރުން ކޮރަޕްޝަންގެ އެހެން މައްސަލަތަކެއް ބެލުމަށް ފޮނުވާފައިވާ ކަމަށާއި، ބަލަމުންދާ މައްސަލައަކަށްވާތީ ސީދާ ތަފްސީލުތައް ހަމަ ހަމާކުރެވޭނީ މައްސަލަތައް ކުރިއަށްދާ ވަރަކުން ކަމަށެވެ.
މީގެ އިތުރުން މަބްރޫކް ވިދާޅުވީ އެމްއެމްޕީއާރްސީގެ ބޮޑު ހިޔާނާތުގެ މައްސަލައަކީ އޭރުގެ ސަރުކާރުގައި ތިބި ބަޔަކާ ގުޅިގެން ހިންގާފައިވާ ހިޔާނާތުގެ ވަރަށް ބޮޑު މައްސަލައެއް ކަމަށެވެ. އަދި އެމައްސަލަ ފޮރުވުމަށް ވެސް އެތައް މަސައްކަތްތަކެއް ކޮށްފައިވާ ކަމަށް މަބްރޫކް ވިދާޅުވިއެވެ.
މަބްރޫކް ވިދާޅުވީ ކޮރަޕްޝަންގެ އަމަލެއް ހިންގާފައިކަމުގައިވާނަމަ ސަރުކާރުން ކޮންމެ މީހެއް ކަމުގައި ވިޔަސް ހުރިހާ އަމަލެއް ސީދާ ސާފުކޮށް ބަލާ އެކަމުގައި ބައިވެރިވި މީހުން ހިފާ ހައްޔަރުކުރުމާއި އަދި އެމީހުންނަށް ދޭން ޖެހޭ އަދަބު ދޭނެ ކަމަށެވެ. އަދި ސަރުކާރުގެ އެވިސްނުމަކަށް ބަދަލެއް ނާންނަ ކަމަށާއި، އެމަސައްކަތް އެގޮތަށް ކުރިއަށްދާނެ ކަމަށް މަބްރޫކް ވިދާޅުވިއެވެ.
