އޮކްސްފޯރޑް އެސްޓްރަޒެނެކާ ކޮވިޑް ވެކްސިނަކީ އުމުރުން ދުވަސްވީ މީހުންގެ ގަޔަށް ޖެހުމަށްވެސް އެންމެ އެކަށީގެންވާ ވެކްސިނެއް ކަމަށް ދުނިޔޭގެ ސިއްޙަތު ޖަމިއްޔާ (ޑަބްލިއުއެޗްއޯ) އިން ބުނެފިއެވެ.

ޑަބްލިއުއެޗްއޯގެ ސައިންސްވެރިންނާ ޙަވާލާދީ ބޭރުގެ ނޫސްތަކުން ރިޕޯޓު ކޮށްފައިވާ ގޮތުން ބޮޑެތި މީހުންނާއި، އުމުރުން ދުވަސްވީ މީހުންގެ ގަޔަށްވެސް އެސްޓްރަޒެނެކާ ވެކްސިން ޖެހުން އެންމެ އެކަށީގެންވެއެވެ. އެގޮތުން އެ ޖަމިއްޔާގެ ސްޓްރެޓެޖިކް އެޑްވައިޒަރީ ގްރޫޕުގެ ތަޖުރިބާކާރު ސައިންސްވެރިން އާންމު ކޮށްފައިވާ ކަރުދާހެއްގައި އެ މައުލޫމާތުތައް ވަނީ ބަޔާން ކޮށްފައެވެ. އަދި 18 އަހަރުން މަތީގެ މީހުންނަށް މި ވެކްސިން ޖެހުން އެންމެ ރަނގަޅުކަމަށް އޭގައި ބަޔާން ކޮށްފައިވެއެވެ.

އަލަށް އާންމު ކޮށްފައިވާ މި ރިޕޯޓުގައި ބަޔާންކޮށްފައިވާ ގޮތުން ފުރަތަމަ ވެކްސިން ޖެހުމަށްފަހު، 8 ހަފްތާއާއި، 12 ހަފްތާއާ ދެމެދުގެ މުއްދަތެއް ދެވިދާނެއެވެ. އަދި އުމުރުން ދުވަސްވީ މީހުންނަށް ވެކްސިން ޖެހި ނަމަވެސް، ވެކްސިން ޖެހުމުގެ ސަބަބުން ޙާލަތު ބޮޑުވެ އެނދުމަތި ކުރަންޖެހޭފަދަ މައްސަލަތައް ފާހަގަވަމުން ނުދާކަމަށްވެސް އެ ރިޕޯޓުގައި ބަޔާން ކޮށްފައިވެއެވެ.

އޭގެ އިތުރުން، ވެކްސިންގެ ފުރަތަމަ ޑޯޒް ޖަހާތާ 22 ދުވަސް ތެރޭގައި ހަށިގަނޑުގެ ދިފާއީ ބާރަށް އެކަމުގެ އަސަރުތައް ފެންނަން ފަށާ ކަމަށްވެސް ރިޕޯޓުގައި ބަޔާން ކޮށްފައިވެއެވެ. އެގޮތުން މި ވެކްސިންގެ އެއް ޑޯޒް ޖެހުމުން ތިން މަސް ދުވަހަށް ވެކްސިންގެ އަސަރު ހުންނަކަމަށް އޮކްސްފޯޑުން އެންމެ ފަހުން ކުރި ދިރާސާއިންވެސް ދައްކާފައިވެއެވެ.

މި ދިރާސާއިން ދައްކާގޮތުން އެސްޓްރަޒެނެކާ ވެކްސިންގެ އެއް ޑޯޒް ޖެހުމުން ތިން މަސް ދުވަހަށް ވެކްސިންގެ އަސަރު ހުންނަވަރު 76 އިންސައްތަ ކާމިޔާބުކަމަށެވެ. އަދި ފުރަތަމަ ޑޯޒް ދިނުމަށްފަހު ދެ ވަނަ ޑޯޒް ދިނުމާ ދެމެދު ގިނަ ދުވަސް ހޭދަކޮށްފިނަމަ ވެކްސިންގެ އަސަރު އިތުރުވާކަމަށް ދިރާސާއިން ދައްކައެވެ.