އެމެރިކާގެ ރައީސް، ޑޮނާލްޑް ޓްރަމްޕްގެ ބޯފުޅު ހިފައިގެން ހުންނަ ގޮތަށް ދޭހަވާ ފޮޓޯއެއް ނެގި މައްސަލައިގައި ސީއެންއެންގެ ދުވަސްވީ ކޮމީޑިއަނެއް ގެއަށް ފޮނުވާލައިފިއެވެ.

މި މައްސަލައިގައި ގެއަށް ވަކިކޮށްފައި ވަނީ ވޭތުވެދިޔަ 10 އަހަރަށް ވުރެ ގިނަދުވަހު އެ ނެޓްވަރކްގެ އާއަހަރުގެ ކަވަރޭޖްގައި އިސް ދައުރެއް ކުޅެމުންދިޔަ، އުމުރުން 56 އަހަރުގެ ކެތީ ގްރިފިންސެވެ. ކެތީ ވަޒީފާއިން ވަކިކުރިކަން ހާމަކޮށް، ސީއެންއެންއިން ކުރި ޓްވީޓެއްގައި ވަނީ އެ ނެޓްވަރކްގެ އާއަހަރުގެ ކަވަރޭޖުން ކެތީ ވަކިކޮށްފައިވާ ކަމަށެވެ. އޭގެ ކުރިން ސީއެންއެންއިން ވަނީ އެ ފޮޓޯއަކީ ޤަބޫލުކުރެވޭނެ ފަދަ އެއްޗެއް ނޫން ކަމަށް ބުނެފައެވެ.

ފޮޓޯގެ މައްސަލައިގައި ކެތީ ހޫނުފެނަށް ވެއްޓިފައިވާއިރު، އޭނާ ވަނީ އެ ފޮޓޯއާ ގުޅިގެން، އެއީ ބޮޑުވަރު ކަމަށް ޤަބޫލުކުރާ ކަމަށް ބުނެ މަޢާފަށް އެދިފައެވެ. އަދި ފޮޓޯ ނެގި ފޮޓޯގްރާފަރ ޓައިލަރ ޝީލްޑްސްގެ ކިބައިން އެ ފޮޓޯ ރިމޫވްކޮށްލުމަށް  އެދިފައި ވެއެވެ.

ފޮޓޯއާ ގުޅިގެން ވަޒީފާއިން ވަކިކޮށް ކެތީ ގެއަށް ފޮނުވާލާފައިވާއިރު، އޭނާއަށް ވަނީ ސީދާ ރައީސް ޓްރަމްޕްގެ ފާޑުވިދާޅުވުމާ ވެސް ކުރިމަތިލާން ޖެހިފައެވެ. މި ފޮޓޯއާ ގުޅިގެން، ކެތީއަށް ފާޑު ވިދާޅުވެ، ރައީސް ޓްރމްޕް ވިދާޅުވެފައިވަނީ، ކެތީ ލަދުގަންނަން ޖެހޭނެ ކަމަށާއި، އެމަނިކުފާނުގެ ބޭފުޅުންނަށް، ޚާއްސަކޮށް  11 އަހަރުގެ ބެރޮންއަށް ފޮޓޮގެ ސަބަބުން ވަރަށް ބޮޑަށް ސިހުން ލިބިވަޑައިގެންފައިވާ ކަމަށެވެ.

މަދުން މެނުވީ ބަޔާނެއް ނުނެރުއްވާ، ޓްރަމްޕްގެ އަނބިކަނބަލުން މެލޭނިއާ ޓްރަމްޕް ވެސް ވަނީ މި މައްސަލައިގައި ކުރު ބަޔާނެއް ނެރުއްވާފައެވެ. އެކަމަނާގެ ބަޔާނުގައި ވިދާޅުވެފައި ވަނީ، މަންމައެއް، އަންބެއް އަދި އިންސާނެއްގެ ހައިސިއްޔަތުން ވެސް މި ފޮޓޯގެ ސަބަބުން ވަރަށް އަސަރު ކުރުވާފައިވާ ކަމަށެވެ.

މި ފޮޓޯއާ ގުޅިގެން ރައީސް ޓްރަމްޕްގެ ސަޕޯޓަރުންނާއި، އިދިކޮޅު ގިނަ ސިޔާސީ ލީޑަރުން ވެސް ވަނީ ކަންބޮޑުވުން ފާޅުކޮށްފައެވެ. އަދި ކެތީއަށް ދީފައިވާ ބައެއް ބްރޭންޑްތަކުގެ އެމްބެސެޑަރކަން ވެސް ވަނީ އަތުލާފައެވެ.