ފުވައްމުލަކުން އިތުރު ތިން މީހުން ކޮވިޑަށް ޕޮޒިޓިވްވެއްޖެ
ފުވައްމުލަކުން ޕޮޒިޓިވްވި ފަރާތްތަކަކީ ދުބާއީ ކްލަސްޓަރގެ ފަރާތްތައް
ފުވައްމުލަކު ސިޓީ
ފުވައްމުލަކު ސިޓީއިން އިތުރު ތިން މީހުން ކޮވިޑަށް ޕޮޒިޓިވްވެފައިވާ ކަމަށް ފުވައްމުލަކު ހޮސްޕިޓަލުން ބުނެފިއެވެ.
ފުވައްމުލަކު ހޮސްޕިޓަލުން ބުނީ އާދީއްތަ ދުވަހު އެ ސިޓީއިން ކޮވިޑް-19އަށް ޓެސްޓު ކުރުމަށް ނެގި 150 ރެންޑަމް ސާމްޕަލްގެ ތެރެއިން ޕޮޒިޓިވްވި ފަރާތަކީ ދުބާއިން އައިސް ފުވައްމުލައް ސިޓީގައި ކަރަންޓީނުގައި ހުއްޓާ ކޮވިޑަށް ޕޮޒިޓިވްވި ފަރާތަކާއި ކޮންޓެކްޓްވި ފަރާތެއްކަން ވަނީ ފާހަގަ ކުރެވިފައި ކަމަށެވެ.
ފުވައްމުލައް ހޮސްޕިޓަލުން އިތުރަށް ބުނީ އާދީއްތަ ދުވަހު ޕޮޒިޓިވްވި ދުބާއީ ކްލަސްޓަރއާއި ގުޅުންހުރި ފަރާތްތަކުގެ ސާމްޕަލް ނަގައި ބުދަ ދުވަހު ހޮސްޕިޓަލުގެ ލެބޯޓަރީގައި ޓެސްޓުކުރިއިރު، އިތުރު 3 ފަރާތަކުން ވަނީ ކޮވިޑަށް ޕޮޒިޓިވްވެފައި ކަމަށެވެ. އެހެންކަމުން ދުބާއީ ކްލަސްޓަރ އިން 4 މީހަކު މިހާތަނަށް ޕޮޒިޓިވްވެފައިވާ ކަމަށް އެ ހޮސްޕިޓަލުން ބުނެއެވެ.
ފުވައްމުލައް ހޮސްޕިޓަލުން ބުނީ އާދީއްތަ ދުވަހު ނެގި ރެންޑަމް ސާމްޕަލިންގގެ ތެރެއިން ޕޮޒިޓިވްވި ކަމަށް ކުރިން ދެއްކި ދެ މީހުންގެ ތެރެއިން އެކަކުގެ ސާމްޕަލްގައި މައްސަލައެއް އުޅޭކަމަށް އެޗްޕީއޭއިން އެންގުމާއިއެކު އެ މީހާ އަލުން ކޮވިޑަށް ޓެސްޓުކޮށްފައިވާ ކަމަށާއި، އަދި މި ޓެސްޓުގެ ނަތީޖާއިން އެމީހާ ނެގަޓިވްވެފައިވާ ކަމަށް ދައްކާ ކަމަށެވެ.
ފުވައްމުލަކުން ކޮވިޑްގެ ކޭސްތަކެއް ފެނިފައިވާއިރު، އެރަށުން ނުލިބޭ ސިއްހީ ޚިދުމަތްތައް ހޯދުމަށާއި، ވިޔަފާރިއަށް އެރަށު ރައްޔިތުން އަންނަނީ އައްޑޫ ސިޓީއަށް ދަތުރުކުރަމުންނެވެ. ނަމަވެސް އައްޑޫ ސިޓީވެސް މޮނިޓަރިންގެ ހާލަތަށް ގެނެވިފައިވުމާއެކު މި ދަތުރުތައްވެސް ވަނީ ހުއްޓުމަކަށް އައިސްފައެވެ.
