ޙާލުގައި އުޅޭ ފަރާތްތަކަށް ފްލެޓް ނުލިބެނީ އެވަރަށް ފްލެޓް ނެތުމުން
ދިރިއުޅުމުގެ ޙާލަތު ބެލުމަށް އެއްވެސް ކެޓަގަރީއެއްގައި ޕޮއިޓް ދޭނެ އުސޫލެއް ނެތުމުން، އުސޫލެއް ވަނީ ކަނޑައަޅާފައި
ހިޔާ ފްލެޓްތައް
ޙާލުގައި އުޅޭ ފަރާތްތަކަށް ފްލެޓް ނުލިބެނީ ހިޔާ ފްލެޓްތައް ދިނުމަށް ކަނޑައަޅާފައިވާ ކެޓަގަރީތައް އޮތް ގޮތުންނާއި އިމާރާތްކުރާ ފްލެޓްތަކުގެ އަދަދު މަދުވުމުންކަމަށް ފްލެޓްތަކުގެ މައްސަލަ ބަލާ ކޮމިޓީން ބުނެފިއެވެ.
ރައީސުލްޖުމްހޫރިއްޔާގެ އޮފީހުން ބޭއްވި ނޫސްވެރިންގެ ބައްދަލުވުމުގައި ރާއްޖެ ޓީވީން ކުރި ސުވާލަކަށް ޖަވާބު ދެއްވަމުން ފްލެޓްތަކުގެ މައްސަލަ ބަލާ ކޮމިޓީގެ މެމްބަރު ތޯހާ މުހައްމަދު ވިދާޅުވީ، އެ ކޮމިޓީއާއި މަސައްކަތް ހަވާލުކުރި ފަހުން ހުޅުމާލެ ދެވަނަ ފިޔަވަހީގައި އަޅާފައިވާ ހިޔާ މަޝްރޫއުގެ ފްލެޓްތައް ލިބޭ ފަރާތްތައް ކަނޑައެޅުމަށް އިވެލުއޭޝަން މަރުޙަލާ ގެންގޮސްފައިވާނީ ވަރަށް އިންސާފުވެރިކޮށްކަމަށެވެ. އެގޮތުން ކޮމިޓީއާއި މަސައްކަތް ހަވާލުކުރިއިރު ދިރިއުޅުމުގެ ޙާލަތު ބެލުމަށް އެއްވެސް ކެޓަގަރީއެއްގައި ޕޮއިޓްދޭނެ އުސޫލެއް ނެތުމުން ހައުސިންގ މިނިސްޓްރީއާއެކު ކުރި މަސައްކަތުގެ ދަށުން އިންސާފުވެރި އުސޫލެއް އެކުލަވާލާ އިވެލުއޭޝަން މަސައްކަތް ކުރިއަށް ގެންދިޔަކަމަށެވެ.
ތޯހާ ވިދާޅުވީ، ދިރިއުޅުމުގެ ހާލަތު ބަލަން ގޮސްފައިވާނީ ފްލެޓްތަކަށް ޝަރުތުހަމަވާ ފަރާތްތައް ދިރިއުޅޭ ގޭގެއަށް އެކަނިކަމަށެވެ. އަދި ކޮމިޓީގެ ފަރާތުން ދިރިއުޅުމުގެ ހާލަތު ބަލަން ގޮސްފައިވާނީ ފުލެޓަށް އެދުނު ފަރާތަށް ފަސޭހަ ގަޑިއެއްގައި، އެފަރާތްތަކަށް ފަސޭހަ ދުވަހެއްގައިކަމަށް ތޯހާ ވިދާޅުވިއެވެ. އެގޮތުން ފެބުރުއަރީ މަހުގެ 1ވަނަ ދުވަހު ހިޔާ މަޝްރޫއުގެ ފްލެޓްތައް ލިބޭ ފަރާތްތަކުގެ ދާއިމީ ލިސްޓް އާއްމުކޮށްފައިވަނީ، މާލެ ސަރަހައްދުން 16912 (ސޯޅަ ހާސް ނުވަ ސަތޭކަ ބާރަ) މީހެއްގެ ގެޔަށާއި، އަތޮޅުތަކުން 2224 (ދެހާސް ދުއިސައްތަ ސައުވީސް) މީހެއްގެ ގެޔަށް ދިރިއުޅުމުގެ ހާލަތު ބަލަން ދިއުމަށް ފަހުގައި ކަމަށް ތޯހާ ވިދާޅުވިއެވެ. މި މަރުޙަލާއަކީ، ދެފުށް ފެންނަ އިންސާފުވެރި މަރުޙަލާއަކަށް ހެދުމަށް އިވެލުއޭޝަން ފޯމްގައި ފްލެޓަށް އެދުނު ފަރާތާއި ޙާލަތު ބަލަން ދިޔަ ކޮމިޓީގެ މެމްބަރުންގެ ސޮއި ނަގާފައިވާކަމަށްވެސް އޭނާ ވިދާޅުވިއެވެ.
ފެބުރުއަރީ މަހުގެ 1ވަނަ ދުވަހު ހިޔާ މަޝްރޫއުގެ ފްލެޓްތައް ލިބޭ ފަރާތްތަކުގެ ދާއިމީ ލިސްޓް އާންމުކޮށްފައިވާއިރު، ފްލެޓަށް އެދުނު މީހުންގެ ތެރެއިން ދިރިއުޅުމުގެ ޙާލަތު ވަރަށް ދަށް މީހުންނަށްވެސް ފްލެޓް ނުލިބޭކަން ފާހަގަކޮށް ރާއްޖެ ޓީވީން ކުރި ސުވާލަކަށް ޖަވާބުދެއްވަމުން ތޯހާ ވިދާޅުވީ ޙާލުގައި އުޅޭ ފަރާތްތަކަށް ފްލެޓް ނުލިބެނީ ހިޔާ ފްލެޓްތައް ދިނުމަށް ކަނޑައަޅާފައިވާ ކެޓަގަރީތައް އޮތް ގޮތުންނާއި އިމާރާތްކުރާ ފްލެޓްތަކުގެ އަދަދު މަދުވުމުންކަމަށެވެ.
މި މަރުޙާލާގެ ޔަޤީންކަން ކަށަވަރުކުރުމަށް ދާއިމީ ލިސްޓްގެ ކުރިން އެކި ކެޓަގަރީތަކުން ވަގުތީ ލިސްޓް އާންމުކޮށް ޝަކުވާ ހުށަހެޅުމުގެ ފުރުސަތު ހުޅުވާލާފައިވާކަމަށް ތޯހާ ވިދާޅުވިއެވެ. އެގޮތުން ފަސްހާހެއްހާ މީހުންގެ ޖުމްލަ 8320 (އަށް ހާސް ތިން ސަތޭކަ ވިހި) ޝަކުވާއެއް ލިބިފައިވާކަމަށާއި މިހުރިހާ ޝަކުވާތަކަށް ޖަވާބުދާރީވެފައިވާކަމަށް ތޯހާ ވިދާޅުވިއެވެ.
ހިޔާ މަޝްރޫއުގެ ފްލެޓުގެ ޖުމުލަ ޢަދަދަކީ 7000 ނަމަވެސް ފްލެޓްތަކުގެ ގްރައުންޑް ފްލޯ، ޓަވަރުތަކުގައި ދިރިއުޅޭ މީހުންގެ އަސާސީ ބޭނުންތަކުގެ ވިޔަފާރިއަށް ޚާއްސަކުރުމުން އެ ޢަދަދު ވަނަ 6720އަށް ބަދަލުކޮށްފައެވެ. ފްލެޓުތަކުގެ ދާއިމީ ލިސްޓު އާންމުކޮށް، ފްލެޓު ކޮމެޓީން ބުނީ ހިޔާ މަޝްރޫއުގެ ދަށުން ދެމަފިރިންނަށް ފްލެޓް ލިބޭ ހާލަތްތަކުގައި ދެމަފިރިންގެ ނަން ހިމެނިފައިވާނީ، ދެމަފިރިންގެ ތެރެއިން ކޮންމެވެސް އެއް ފަރާތެއް ފޯމު ހުށަހަޅާފައިވާ ކެޓަގަރީއެއްގައި ކަމަށެވެ. ހިޔާ މަޝްރޫއަކީ ކުރީގެ ރައީސް ޢަބްދުﷲ ޔާމީން އަބްދުލްގައްޔޫމުގެ ސަރުކާރުގައި ހުޅުމާލޭ ދެވަނަ ފިޔަވަހީގައި ފެށި އެންމެ ފުރަތަމަ އެެއް މަޝްރޫއެވެ.
މިމަޝްރޫއަށް 430 މިލިއަން ޑޮލަރު ހޭދަކޮށްފައިވެއެވެ. ހިޔާ ފްލެޓުތަކުން ނަގާނެ ސީދާ ކުލި އަދި އާންމު ނުކުރި ނަމަވެސް ސަރުކާރުން ބުނެފައިވަނީ ފްލެޓުތަކުގެ ކުލި 7،000 އަށްވުރެ ބޮޑު ނުކުރާނެ ކަމަށެވެ. ހިޔާ މަޝްރޫއުގެ ދަށުން އަޅާފައިވާ 16 ޓަވަރުގައި ހިމެނެނީ ދެ ކޮޓަރީގެ އެޕާޓްމެންޓެވެ.
