ކޮވިޑް އުފެދުނު ގޮތް ޗައިނާއިން ހާމަކުރަން ޖެހޭ: އެމެރިކާގެ ނޫސްތައް
10 ފެބުރުއަރީ 2021 | ބުދަ 13:22ވޮޝިންގޓަން ޕޯސްޓުގެ ނޫސް އެޖެންސީގެ ނޫސްވެރިން ފޮނުވާ ތަހުގީގު ކުރުމަށް ޗައިނާ ސަރުކާރުގެ ކިބައިން ވަނީ އެދިފައި
ޗައިނާގެ ސިޓީއެއްގެ މަގުމަތީގައި އާންމުން ހިނގާބިނގާވެ އުޅުމުގެ ތެރެއިން
ކޮވިޑް-19 އުފެދުނު ގޮތް ފުރިހަމައަށް ޗައިނާއިން ހާމަކުރަންޖެހޭނެ ކަމަށާއި، އަދި ތަހުގީގު ހިންގުމަށް ނޫސްވެރިންނަށް ފުރުސަތު ދިނުމަށް އެމެރިކާގެ ވޮޝިންގޓަން ޕޯސްޓުން ބުނެފިއެވެ.
ވޮޝިންގޓަން ޕޯސްޓުން ނެރުނު ބަޔާނެއްގައި ބުނީ ޗައިނާއަށް ވޮޝިންގޓަން ޕޯސްޓުގެ ނޫސް އެޖެންސީގެ ނޫސްވެރިން ފޮނުވާ ތަހުގީގު ކުރުމަށް ޗައިނާ ސަރުކާރުގެ ކިބައިން އެދިފައިވާނެ ކަމަށާއި، އެކަމަކު ޗައިނާގެ ސަރުކާރުގެ ފަރާތުން އެކަމަށް ފުރިހަމަ އެއްބާރުލުމެއް ނުލިބޭ ކަމަށެވެ.
ކޮވިޑް އުފެދުނު ގޮތް އާންމުންނާއި ހަމައަށް ގެނެސްދިނުމަކީ މިއަދުން މިއަދަށްވެސް ކުރަން ޖެހިފައިވާ ކަމެއް ކަމަށާއި، ނަމަވެސް ޗައިނާ ސަރުކާރުން އެކަމުގައި އޮޅުވާލުންތަކެއް ގެންގުޅެމުން އަންނަ ކަމަށް ލަފާ ކުރެވޭ ކަމަށްވެސް ވޮޝިންގޓަން ޕޯސްޓުން ބުނެއެވެ.
މީގެ ކުރިން ތިން ފަހަރެއްގެ މަތިން ޗައިނާއަށް ވޮޝިންގޓަން ޕޯސްޓުގެ ނޫސްވެރިން ފޮނުވުމަށް މަސައްކަތް ކުރި ކަމަށާއި، ނަމަވެސް އެއިން އެއްވެސް ފަހަރަކު ޗައިނާގެ ސަރުކާރުން ނޫސްވެރިން އެގައުމަށް ދިޔުމަށް ހުއްދަ ދީފައިނުވާ ކަމަށް ވޮޝިންގޓަން ޕޯސްޓުން ބުނެއެވެ.
ވޮޝިންގޓަން ޕޯސްޓުން ބުނީ ޗައިނާ ސަރުކާރުން ކޮންމެ ހުރަހެއް އެޅިކަމުގައި ވިޔަސް ކޮވިޑްގެ އަސްލު ހޯދުމަށް އެ ނޫސް އެޖެންސީން ކުރަމުން އަންނަ މަސައްކަތް ހުއްޓާނުލާނެ ކަމަށާއި، އެކަމުގެ ތެދު ހަގީގަތް ދުނިޔޭގެ އެންމެހާ ރައްޔިތުންނަށް އެ އެޖެންސީން ގެނެސްދޭނެ ކަމަށް ވެސް ވަނީ ބުނެފައިވެއެވެ.
