މިއުޒިކަކީ ގިނަ ދިވެހިންގެ އާންމު ދިރިއުޅުމާ ގުޅިފައިވާ ކަމެއް - ރައީސް ނަޝީދު
10 ފެބުރުއަރީ 2021 | ބުދަ 08:11މިއީ ދިވެހިން ނިކަމެތިކުރުމަށް ކުރެވޭ ކަމެއް
ކުރީގެ ރައީސް އަދި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
މިއުޒިކަކީ ގިނަ ދިވެހިންގެ އާންމު ދިރިއުޅުމާ ގުޅިފައިވާ ކަމެއް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު ކުރެއްވި ޓްވީޓެއްގައި ވިދާޅުވީ މިއުޒިކަކީ ގިނަ ދިވެހިންގެ އާންމު ދިރިއުޅުމާ ގުޅިފައިވާ ކަމެއް ކަމަށާއި ބައެއްގެ އާންމު ދިރިއުޅުން ހަރާމްކަމަށް ގޮވުމަކީ އެބައެއްގެ މުޖުތަމަޢު ރޫޅާލުމަށް ކުރެވޭ މަސައްކަތެއް ކަމަށެވެ.
ރައީސް ނަޝީދު ވަނީ މިއީ ދިވެހިން ނިކަމެތިކުރުމަށް ކުރެވޭ ކަމެއް ކަމަށް ވިދާޅުވެފައެވެ.
ރައީސް ނަޝީދުގެ ޓުވީޓަށް ޖަވާބުދެއްވަމުން ދީނީ އިލްމުވެރިއެއް ކަމަށްވާ ޑރ. މުހައްމަދު އިޔާޒް ވަނީ އާންމު ދިރިއުޅުމާ ގުޅިފައިވީނަމަވެސް މާތްﷲ އާއި މާތް ރަސޫލާ ރުހިވޮޑިނުގަންނަވާ ކަންތައް ނުކުރެވޭނެކަމަށް ވިދާޅުވެފައެވެ. އަދި ދިރިއުޅުން އުފާވެރިވެފައި ބާއްޖަވެރިވާނީ ޤުރުއާނާއި ސުއްނަތަށް އަމަލުކޮށްގެން ކަމަށާއި ބަޔަކު މީހުންގެ ހަވާ ނަފްސަށް ހެއްލެން ވެއްޖެ ނަމަ އެބަޔަކަށް އުފަލެއް ނުލިބޭނެ ކަމަށާއި، ވާނީ އަބާއްޖަވެރިންނަށް ކަމަށް ޑރ. އިޔާޒް ވިދާޅުވިއެވެ.
ޑރ. އިޔާޒް ވަނީ ޖާހިލިއްޔަ ޒަމާނުގައި އިންސާނިއްޔަތާ ޚިލާފު ވަރަށް ގިނަ ކަންތައް ކޮށް އުޅުނު ކަމަށާއި، އެއީ އެމީހުންގެ ދިރިއުޅުމާ ގުޅިފައިވާ ކަންތައް ކަމަށް ފާހަގަކުރައްވާފައެވެ. ނަމަވެސް އިސްލާމްދީނުގައި އެކަންތައްތައް މަނާކޮށްފައި ވަނީ އެކަން އެގޮތަށް ދޫކޮށްލައިފި ނަމަ ގުނާ އަދަދު ނުކުރެވޭހާ ބޮޑެތި ގެއްލުންތައް ވޭނެތީކަމަށް ޑރ. އިޔާޒް ވިދާޅުވިއެވެ.
މިގޮތަށް މިވާހަކަތައް ދެކެވެމުން މިދަނީ ޒުވާނުންނަށް އުފާވެރި މާހައުލެއްގައި ސަމާސާކޮށްލައި އެއްވެ ތިބެވޭނެ މަރުކަޒެއް ގާއިމުކޮށް ދިނުމަށް ސަރުކާރަށް ގޮވައިލާ ހެންވޭރު ހުޅަނގު ދާއިރާގެ މެމްބަރު ހަސަން ލަތީފް މަޖިލީހަށް ހުށަހަޅުއްވާފައިވާ ގަރާރާ ގުޅިގެން ބަހުސްކުރެވެމުންދާ ދަނޑިވަޅެއްގައެވެ. އެގޮތުން މި ގަރާރަށް އެމްޑީޕީގެ މެމްބަރުންގެ ތާއީދު ލިބިފައިވާއިރު، ގިނަ ބައެއްގެ ފާޑުކިއުން ވެސް ވަނީ މިކަމަށް އަމާޒުވެފައެވެ.
