ގދ. ތިނަދޫން އިތުރު މީހަކު ކޮވިޑަށް ޕޮޒިޓިވް ވެއްޖެއެވެ. ކޮވިޑް-19 އާ ގުޅިގެން ގދ. ތިނަދޫ މޮނީޓަރިން ހާލަތަށް ގެނެސް، އެރަށަށް އަރައިފޭބުން ވަނީ މަނާކޮށްފައެވެ.

ހެލްތް ޕްރޮޓެކްޝަން އެޖޭންސީ (އެޗްޕީއޭ)އިން އާދިއްތަ ދުވަހު އަންގާފައިވާ އެންގުމެއްގައި ވަނީ، ކޮވިޑް-19 އާ ގުޅިގެން، ސިއްޙީ ގޮތުން އިތުރަށް ބަލަންޖެހޭ ކަންކަން ބެލުމަށް، ތިނަދޫގައި މިވަގުތު ހުރި އެއްވެސް މީހަކު އެޗް.ޕީ.އޭ.އިން ވަކިގޮތެއް އަންގަންދެން ރަށުން ފޭބުމާއި، އެޗް.ޕީ.އޭ.ގެ ހުއްދަނެތި އެއްވެސް މީހަކު ރަށަށް އެރުންވެސް މަނާކޮށް، ރަށް މޮނީޓަރިން ހާލަތަށް ގެނެވިފައިވާ ކަމަށެވެ.

ކޮވިޑް-19ގެ ކޭސްތަކެއް ތިނަދޫން ފެނިފައިވާއިރު، އެރަށުގައި ކޮވިޑް-19 އަށް ޓެސްޓް ކުރުމަށް ރެންޑަމް ސާމްޕަލް ނެގުމުގެ މަސައްކަތްކުރަމުން ދެއެވެ. މަޢުލޫމާތު ލިބިފައިވާ ގޮތުގައި، މިދިޔަ ހަފުތާގައި ތިނަދޫން މާލެއަށް ދަތުރުކުރި ދެމީހަކު ކޮވިޑް-19އަށް ޕޮޒިޓިވް ވެފައިވެއެވެ. އެކަމާ ގުޅިގެންވެސް ސާމްޕަލް ނެގުމުގެ މަސައްކަތް ކޮށްފައިވެއެވެ. އޭގެފަހުން އައްޑޫ ސިޓީ ހިތަދޫން ޕޮޒިޓިވްވި މީހަކާއި ކޮންޓެކްޓްވި މީހަކު ތިނަދޫން ވެސް ޕޮޒިޓިވްވެފައިވާ ކަމަށްވެއެވެ. ރެންޑަމް ސާމްޕަލް ނެގުމުގެ އެންމެ ފަހުގެ މަޢުލޫމާތު ހިއްސާކޮށް ޑރ. އަބްދުއްސަމަދު މެމޯރިއަލް ހޮސްޕިޓަލުން ކުރި ފޭސްބުކް ޕޯސްޓެއްގައި ވަނީ ގދ.ތިނަދޫގައި ކޮވިޑް-19 ވައިރަސް ފެތުރިފައިވާ މިންވަރު ދެނެގަތުމަށްޓަކައި 07 ފެބްރުއަރީ 2021 ގައި ނެގުނު ރެންޑަމް ސާމްޕަލްއެއް ކޮވިޑަށް ޕޮޒިޓިވް ވެފައިވާކަން ހާމަކޮށްފައެވެ. މިއާއެކު ތިނަދޫން މިފަހަރު ޕޮޒިޓިވްވި މީހުންގެ އަދަދު ވަނީ ޖުމްލަ ތިނަކަށް އަރާފައެވެ.

މި ކޭސްތަކާއި ގުޅިގެން 04 ފެބްރުއަރީ 2021 އިން ފެށިގެން ތިނަދޫ ބަނދަރު ސަރަހައްދުގައިވާ 16 ނަންބަރު ގާޑިޔާލުން ޚިދުމަތް ހޯދާފައިވާ މީހުން ރޫމް އައިސޮލޭޓްވުމަށްފަހު، ހޮސްޕިޓަލުގައި ގާއިމް ކުރެވިފައިވާ ކޮވިޑް-19 ހޮޓްލައިނަށް ގުޅުމަށް ޑރ. އަބްދުއްސަމަދު މެމޯރިއަލް ހޮސްޕިޓަލުން ވަނީ އަންގާފައެވެ.

ކޮވިޑް-19ގެ ހާލަތު ރާއްޖޭގައި އިތުރަށް ގޯސްވެ، މާލެ ސަރަހައްދުން ގިނަ ޕޮޒިޓިވް ކޭސްތަކެއް ދަނީ ފެންނަމުންނެވެ. އަދި ބައެއް ރަށްތަކުންވެސް ޕޮޒިޓިވް ކޭސްތައް ފެންނަމުންދާއިރު، ރިސޯޓްތަކުންވެސް ޕޮޒިޓިވް ކޭސްތައް ދަނީ ފެންނަމުންނެވެ.