އިންޑިއާ ސަރުކާރުގެ އެހީގައި ނޭޕާލުން މަގު ހެދުމުގެ ބޮޑު ޕްރޮޖެކްޓެއް ފަށައިފި
8 ފެބުރުއަރީ 2021 | ހޯމަ 12:11މި ޕްރޮޖެކްޓްގެ ދަށުން ހިމާލިއާގެ މަގުތައް ރަނގަޅު ފެންވަރަކަށް ހެދިގެންދާނެ
ނޭޕާލުގެ ކަތަމަންޑޫގެ ކާރޫ ބާރު ބޮޑު މަގެއް
އިންޑިއާ ސަރުކާރުގެ އެހީގައި ނޭޕާލުން ހިމާލިޔާ ސަރަހައްދުގެ މަގުތައް ހެދުމުގެ ބޮޑު ޕްރޮޖެކްޓެއް ފަށައިފިއެވެ.
މި ޕްރޮޖެކްޓަށް އިންޑިއާ ސަރުކާރުން ވަނީ 44.48 މިލިއަން ރުޕީސްގެ އެހީވެދީފައެވެ. އިންޑިއާގެ ރޯޑްސް ޑިވެލޮޕްމެންޓް ކޯޕަރޭޝަނުން ބުނީ މި ޕްރޮޖެކްޓްގެ ދަށުން ހިމާލިއާގެ މަގުތައް ރަނގަޅު ފެންވަރަކަށް ހެދިގެންދާނެ ކަމަށާއި، އަދި މިހާރު މަގުތަކަށް ދިމާވެފައިވާ ދަތިތައް ކުރިޔަށް އޮތް ތަނުގައިދިމާ ނުވާނެ ކަމަށެވެ. އަދި މިއީ ޒަމާނީ ފެންވަރަކަށް ހަދާ މަގުތަކެއް ކަމުން އެކަމުގެ ފައިދާ ނޭޕާލުގެ ރައްޔިތުންގެ އިތުރުން އެގައުމަށް ޒިޔާރާތްކުރާ ފަތުރުވެރިންނަށް ކުރާނެ ކަމަށް ރޯޑް ޑިވެލޮޕްމަންޓް ކޯޕަރޭޝަނުން ވަނީ ބުނެފައެވެ.
ނޭޕާލު ސަރުކާރުގެ އިސް އޮފިޝަލަކު ވިދާޅުވީ މިއީ ހިމާލިޔާފަދަ ފަތުރުވެރިން ގިނަ ސަރަހައްދަކަށް މިހާރުން މިހާރަށް ކުރަން ބޭނުން ވެފައިވާ ކަމެއް ކަމަށާއި، މިކަމަށް އިންޑިއާ ސަރުކާރުން ވެދެއްވި އެހީއަށް ޝުކުރުއަދާ ކުރާ ކަމަށެވެ. އަދި ކުރިޔަށް އޮތްތަނުގައި އެ ގައުމުގެ ވެރިރަށް ކަތަމަންޑޫގެ މަގުތައް ހެދުމުގެ ބޮޑު ބިޔަ ޕްރޮޖެކްޓެއްގައި އިންޑިއާ ސަރުކާރާއިއެކު ސޮއި ކުރެވިގެންދާނެ ކަމަށް އޮފިޝަލު ވިދާޅުވިއެވެ.
ނޭޕާލުގެ ކަތަމަންޑޫއަކީ ފަތުރުވެރިންގެ ތެރޭގައި މަގުބޫލު މަންޒިލެކެވެ. އެގޮތުން ކޮންމެ އަހަރަކުވެސް އެތައް ހާސް ފަތުރުވެރިންނެއް މައުންޓް އެވަރެސްޓު ފަރުބަދަ ބެލުމަށް ކަތަމަންޑޫއަށް ޒިޔާރާތް ކުރެއެވެ. މީގެ އިތުރުން ކަތަމަންޑޫ ފާހަގަވެގެން ގޮސްފައިވަނީ ފޮޓޯގްރާފުންގެ ތެރޭގައިވެސް މަގުބޫލު މަންޒިލަކަށެވެ.
