ވެކްސިނާއެކު އުއްމީދު އައުވެ، ސިއްހީ ޚިދުމަތްތެރިންގެ ހިތްތަކަށް އުފާވެރިކަން ގެނުވައިފި

އިންޑިއާގެ ސިރަމް އިންސްޓިޓިއުޓުން އުފައްދާފައިވާ އެސްޓްރަޒެނެކާ-އޮކްސްފޯޑް ޔުނިވާސިޓީގެ ކޮވިޝީލްޑް ވެކްސިންގެ އެއް ލައްކަ ޑޯޒް އިންޑިއާއިން ރާއްޖެއަށް ހަދިޔާކުރި ދުވަހަކީ އުފާވެރި ދުވަހެކެވެ. 2020 ވަނަ އަހަރު ދުނިޔެއާއި ކުރިމަތިލި ކޮވިޑް-19ގެ ބިރުވެރި އަދި ދަތި ހާލުން ރާއްޖެއަށް ވެސް އަރައިގަނެވޭނެކަމުގެ ފެހި ސިގްނަލް ލިބުނު ދުވަހެވެ.

އޭގެ ފަހުން ކެތްތެރިކަމެއް ނެތި ރައްޔިތުން އިންތިޒާރު ކުރަމުންދިޔައީ މި ވެކްސިން ޖަހަން ހުއްދަ ދޭނެ ދުވަހަކަށެވެ. ޚާއްސަކޮށް އެކަމަށް އެންމެ ބޮޑަށް އެދެމުން ދިޔައީ ވަރުބަލި ކަމެއްނެތި ކޮވިޑްގެ ވަބާއިން މުޅި ގައުމު ސަލާމަތް ކުރަން އަތުކުރި އޮޅާލައިގެން ތިބި ސިއްހީ މާހިރުންނާއި ޚިދުމަތްތެރިންނެވެ.

ކޮންމެއަކަސް އެދުވަސް ފަހަނައަޅައި ގޮސް، ރާއްޖޭގައި ވެކްސިން ޖަހަން ފެށުނެވެ. އެތައް ބަޔަކަށް އުފާވެރިކަން ގެނުވައި ހިތްވަރު ދެމުންނެވެ. ވެކްސިންޖެހުމުގައި ވެސް މި ރާއްޖެއިން ފެނިގެންދިޔައީ ހިތަށް ފިނިކަން ލިބިދޭ އުފާވެރި މަންޒަރު ތަކެކެވެ. ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙުގެ އިތުރުން، ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދާއި ދިވެހިރާއްޖޭގެ އުއްތަމަ ފަނޑިޔާރު މުޢުތަސިމް އަދުނާން ވެކްސިން ޖައްސަވައި ދިވެހި ރައްޔިތުންނަށް ވެކްސިނުގެ ރައްކާތެރިކަން ކަށަވަރު ކޮށްދެއްވިއެވެ.

މި އުފާވެރިކަމާއި ހިތްހަމަޖެހުން ރައްޔިތުންގެ ކިބައިން ނަގާލަން ބައެއް ފަރާތްތަކުން މަސައްކަތް ކުރިކަމުގައި ވީނަމަވެސް އެމީހުން ވަނީ ފެއިލްވެފައެވެ. އެކަން ހާމަ ވެގެން ދަނީ ވެކްސިން ޖެހުމަށް އެކުލަވާލާފައިވާ ޚާއްސަ ޕޯޓަލްއަށް ރަޖިސްޓަރީވަމުން ދާ މީހުންގެ އަދަދު ދުވަހެއް ދުވަހަކަށް އިތުރު ވަމުންދާ ދިއުމުންނެވެ.

ވެކްސިން ޖަހަން ގޮސް ތިބޭ މީހުންގެ ކިއުތައް ދިގުވެ، މި ބަލިމަޑުކަމާ ހަނގުރާމަ ކުރުމުގައި ދިވެހިން ތިބީ ނުގުޑާ އަޒުމެއްގައިކަން ބުނެދެމުން ކޮންމެ ރައްޔިތަކުވެސް ވެކްސިން ޖަހަން ދަނީ ބަހަނާ ދެއްކުމެއް ނެތިއެވެ. ވެކްސިން ޖެހުމުގެ ޕްރޮގްރާމްގައި ހަރަކާތްތެރިވާ އިންދިރާ ގާނދީ މެމޯރިއަލް ހޮސްޕިޓަލް (އައިޖީއެމްއެޗް)ގެ ކްލިނިކަލް ނަރުހެއް ކަމަށްވާ މައުސޫމާ ވިދާޅުވީ ދުވާލެއްގެ މައްޗަށް 600 މީހުންނާއި 900 މީހުންގެ ގަޔަށް ވެކްސިން ޖަހަމުން ދާކަމަށެވެ. އަދި މިއިން ކޮންމެ މީހެއްވެސް ވެކްސިން ޖަހަން އަންނަނީ ނުހަނު ބޭނުންވެގެން ކަމަށް މައުސޫމާ ވިދާޅުވިއެވެ.

މީގެ އިތުރުން ދާދި ފަހުން ހެލްތް އިމަރޖެންސީ އޮޕަރޭޝަންސް ސެންޓަރ (އެޗްއީއޯސީ) ގެ ތަރުޖަމާނު ޑޮކްޓަރ ނަޒްލާ ރަފީޤު ވިދާޅުވީ ވެކްސިންޖަހާ މީހުންގެ އަދަދު އިތުރުވެ، އެކަމުގެ ސަބަބުން ބަލިމަޑުކަމުން އަރައިގަތުމަށް އައު ހިތްވަރެއް ލިބެމުން ދާކަމަށެވެ. އަދި މުޅި ދުނިޔެއަށް ދިމާވެފައިވާ ޕެންޑެމިކްގެ ނިމުން ﷲގެ އިރާދަފުޅުން ވަރަށް އަވަހަށް އަންނާނެ ކަމަށެވެ.

ވެކްސިނުގެ މުހިއްމުކަމާއި ގުޅޭގޮތުން ވާހަކަ ދައްކަވަމުން ދާދި ފަހުން ޑރ. ނަޒްލާ ވިދާޅުވީ ވެކްސިން ޖަހައިގެން ގައިން ގަޔަށް އަރާ، ނުރައްކާތެރި އެތައް ބައްޔެއް ކޮންޓްރޯލް ކުރެވިފައިވާ ކަމަށެވެ. އަދި ބައެއް ބަލިތައް އެއްކޮށް ނައްތާލެވިފައިވާއިރު އޭގެ ތެރޭގައި ޕޯލިއޯ، ނިއުނެޓަލް ޓެޓްނަސްގެ އިތުރުން މީސަލްސްވެސް ރާއްޖެއިން ނައްތާލެވުނު ކަމަށް ޑރ. ނަޒްލާ ފާހަގަ ކުރެއްވިއެވެ.

މީގެ އިތުރުން ހޯއްގޮވާ ކެއްސުމާއި، ކަރުފޮޅު ފަދަ ބަލިތައް މިހާރު ފެންނަނީ ވަރަށް މަދުންކަން ފާހަގަކުރައްވައި ޑރ. ނަޒްލާ ވިދާޅުވީ ވެކްސިން ޖަހާ މިންވަރު ދަށަށް ހިނގައްޖެނަމަ މި ބަލިތައް އިތުރަށް ރާއްޖެއިން ފެނި، ބަލިތައް ފެތުރުމުގެ ފުރުސަތުވެސް ވަރަށް ބޮޑުކަމަށެވެ.

އެގޮތުން 2020 ވަނަ އަހަރުގެ ކުރީކޮޅު މީސަލްސް އައުޓްބްރޭކުންވެސް ވެކްސިނުގެ މުހިއްމުކަން ހާމަވެގެން ދިޔަކަމަށް ޑރ. ނަޒްލާ ފާހަގަ ކުރެއްވިއެވެ. އަދި ކޮންމެ ވެކްސިނެއްވެސް އެ ވެކްސިން ޖެހުމަށް އެންމެ އެކަށީގެންވާ ވަގުތާއި އުމުރުގައި ޖެހުމަކީ މުހިއްމު ކަމެއްކަމަށް ވިދާޅުވިއެވެ.

ވެކްސިނާއެކު އެތައް ސިއްހީ ޚިދުމަތްތެރިންނަކަށް ހިތްހަމަޖެހުމާއި އުފާވެރިކަން ލިބިފައިވާއިރު ވެކްސިނުގެ ރައްކާތެރިކަން ކަށަވަރުކޮށްދީ ވެކްސިން ޖެހުމުގެ މުހިއްމުކަން އެނގި، އެހެން މީހުންނަށް އެ މައުލޫމާތު ފޯރުކޮށްދިނުމަކީ ކޮންމެ ފަރުދެއްގެވެސް ޒިންމާއެކެވެ.