ކޮވިޑް-19 ވެކްސިންއާ ގުޅޭ ޚަބަރާއި މަޢުލޫމާތު މީޑިއާތަކުން ގެނެސްދިނުމުގައި، ރާއްޖޭގައި ދިނުމަށް ކަމާބެހޭ ފަރާތްތަކުން މިވަގުތު ހުއްދަ ދީފައިވާ ވެކްސިންތަކުގެ ރައްކާތެރިކަމާއި މެދު ރައްޔިތުންގެ މެދުގައި ޝައްކާއި ވަހުމް އުފެދޭގޮތަށް ހަގީގަތާ ހިލާފު ދޮގު ޚަބަރާއި މަޢުލޫމާތު ނުފެތުރުމަށާއި، ވެކްސިންގެ މަޢުލޫމާތު އާއްމުކުރުމުގައި ޞައްޙަ ތެދު މަޢުލޫމާތު ގެނެސްދިނުމަށް މޯލްޑިވްސް މީޑިއާ ކައުންސިލުން އިލްތިމާސް ކޮށްފިއެވެ.

މީޑިއާ ކައުންސިލުން ނެރުނު ނޫސްބަޔާނެއްގައި ބުނީ ކޮވިޑް-19 ވެކްސިންއާ ގުޅޭ ޚަބަރާއި މަޢުލޫމާތު ބައެއް މީޑިއާތަކުން ގެނެސްދިނުމުގައި، ވެކްސިންތަކުގެ ރައްކާތެރިކަމާ މެދު ރައްޔިތުންގެ މެދުގައި ޝައްކު އުފެދި އިތުބާރު ގެއްލޭގޮތަށް ޚަބަރާއި މަޢުލޫމާތު ޝާއިޢުކޮށް ފަތުރަމުންދާކަން އެ ކައުންސިލުގެ ސަމާލުކަމަށް އައިސްފައިވާ ކަމަށެވެ.

މީގެ ސަބަބުން އިޖުތިމާޢީ އެތައް މައްސަލަތަކެއް އުފެދެމުންދާކަމުގެ ޝަކުވާ އާންމުންގެ ފަރާތުން ވެސް ލިބެމުންދާކަމަށް މީޑިއާ ކައުންސިލުން ބުނެއެވެ.

އަދި ކޮވިޑް-19 ވެކްސިންއާ ގުޅޭގޮތުން މަޢުލޫމާތު ފެތުރުމުގައި އޭގެ ޞައްޙަ މަޢުލޫމާތު ދައުލަތުގެ ކަމާބެހޭ އިދާރާތަކުން ކަށަވަރު ކުރުމަށާއި، ވެކްސިންއާ ގުޅޭ މަޢުލޫމާތު ޙަވާލާދޭ މަސްދަރުތަކަކީ ދުނިޔޭގެ ސިއްޙަތު ޖަމްއިއްޔާއާއި ބައިނަލްއަޤްވާމީ އިދާރާތަކުގެ މިންގަނޑުތަކާ އެއްގޮތަށް ޝާއިޢު ކޮށްފައިވާ މަޢުލޫމާތުކަން ކަށަވަރުކުރުމަކީ ނޫސްވެރިންގެ ފަރުދީ އަދި ޕްރޮފެޝަނަލް ޒިންމާއެއްކަމަށް އެ ބަޔާނުގައި ފާހަގަ ކޮށްފައިވެއެވެ.

މީގެ އިތުރުން، ކޮވިޑާ ގުޅޭ ޚަބަރާއި މަޢުލޫމާތު ފެތުރުމުގައި ނޫސްވެރިން ސަމާލުކަން ދޭންވީ ކަންކަމާއި ކޮންމެހެން ހިފަހައްޓަންޖެހޭ އުސޫލުތައް ބަޔާންކުރުމަށް އެ ކައުންސިލުން އެކުލަވާލައިފައިވާ ކޮވިޑް-19 ނޫސްވެރިންގެ އަތްމަތީ ފޮތުގައި ދީފައިވާ އިރުޝާދުތަކަށް ސަމާލުކަން ދިނުމަށް ވެސް މީޑިއާ ކައުންސިލުން އިލްތިމާސް ކުރެއެވެ.

އަދި ކޮވިޑް-19 ވެކްސިނަށް އާންމުން އިތުރަށް ހޭލުންތެރި ކުރުމަށާއި، ޞައްޙަ މަޢުލޫމާތު މިހާރު ވެސް ގެނެސްދޭ މީޑިއާތަކުގެ މަސައްކަތް ފާހަގަކުރުމާއެކު، ގެނެސްދެވޭ ކޮންޓެންޓް މިހާރަށްވުރެ އިތުރުކުރުމަކީ އެ ކައުންސިލުން ބާރުއަޅާ ކަމެއްކަމަށް މީޑިއާ ކައުންސިލުން ބުނެއެވެ.