"ހިޔާ" މަޝްރޫޢުގެ ކެޓަގަރީތަކުގެ ވަގުތީ ލިސްޓުތަކާ ގުޅޭގޮތުން ޝަކުވާ ހުށަހެޅުމަށް ހުޅުވައިލެއްވި ފުރުސަތުގައި ޝަކުވާ ހުށަހަޅުއްވާފައިވާ ފަރާތްތަކުގެ ތެރެއިން މިހާތަނަށް ލިޔުމުން ޖަވާބު ލިބިފައިނުވާ ފަރާތްތަކުން، އެކަން އެންގެވުމަށް ފްލެޓްތަކުގެ މައްސަލަ ބަލާ ކޮމިޓީން އެދިއްޖެއެވެ.

ގެޒެޓުގައި އެ ކޮމެޓީއިން ޝާއިޢު ކުރި އިއުލާނުގައި ބުނީ، ވަގުތީ ލިސްޓުތަކާ ގުޅޭގޮތުން ޝަކުވާ ހުށަހެޅުމަށް ހުޅުވައިލެއްވި ފުރުސަތުގައި ހުށަހަޅުއްވާފައިވާ ހުރިހާ ޝަކުވާތަކެއް ދިރާސާކޮށްފައިވާ ކަމުގައެވެ. އަދި، ހުރިހާ ޝަކުވާއެއްގެ ޖަވާބު، ލިޔުމުން، ޝަކުވާ ހުށަހެޅުއްވި ފަރާތްތަކުން ދެއްވާފައިވާ އީމެއިލް އެޑްރެހަށް އީމެއިލްކޮށްފައިވާ ކަމުގައެވެ. ނަމަވެސް، ބައެއް ފަރާތްތަކުން ދީފައިވާ އީމެއިލް އެޑްރެސްއަށް ފޮނުވާ އީމެއިލް ޑެލިވަރނުވާކަން އެ ކޮމިޓީގެ އިޢުލާނުގައި ފާހަގަ ކޮށްފައިވެއެވެ.

އެހެންކަމުން، ލިޔުމުން ޖަވާބު ލިބިފައިނުވާ ފަރާތްތަކުން، އެކަން އެންގުމަށް ކޮމިޓީން ވަނީ އެދިފައެވެ. މި މަޢުލޫމާތު ކޮމިޓީއަށް ހުށަހަޅުއްވާނީ، އެ ފަރާތެއްގެ ދިވެހި ރައްޔިތެއްކަން އަންގައިދޭ ކާޑުގެ ނަންބަރާއި އީމެއިލް އެޑްރެސް ޖެއްސެވުމަށްފަހު، ފެބްރުވަރީ 8 ވާ ހޯމަ ދުވަހުގެ 15:00 ގެ ކުރިން 7761108 ނުވަތަ 7226016 އަށް އެސް.އެމްއެސް. މެދުވެރިކޮށެވެ. "ހިޔާ" މަޝްރޫޢުގެ ކެޓަގަރީތަކުގެ ވަގުތީ ލިސްޓުތަކަށް ޝަކުވާ ހުށަހެޅުމުގެ ފުރުސަތު ހުޅުވާލައިފައިވާ މުއްދަތުތައްވެސް އެ ކޮމިޓީން ޝާއިޢުކޮށްފައިވާ އިޢުލާނާއެކު ހާމަކޮށްފައިވެއެވެ.