ކޮވިޑް ޖެހި ފަރުވާދެމުން ދިޔަ ދިވެއްސަކު ދުބާއީގައި ނިޔާވެއްޖެ
7 ފެބުރުއަރީ 2021 | އާދީއްތަ 07:25ނިޔާވެފައިވަނީ އެޗް.ޑީީ.ސީގައި މަސައްކަތް ކުރަމުން ދިޔަ އުމުރުން 38 އަހަރުގެ އަބްދުﷲ އިޔާދު އަޙުމަދު
ނިޔާވެފައިވަނީއެޗް.ޑީީ.ސީގައި މަސައްކަތްކުރި ޒުވާނެއް
ކޮވިޑްޖެހި ފަރުވާދެމުން ދިޔަ ދިވެއްސަކު ދުބާއީގައި ނިޔާވެއްޖެއެވެ.
ނިޔާވެފައިވަނީ ހައުސިން ޑިވެލޮޕްމަންޓް ކޯޕަރޭޝަން(އެޗް.ޑީީ.ސީ)ގައި މަސައްކަތް ކުރަމުންދިޔަ އުމުރުން 38 އަހަރުގެ އަބްދުﷲ އިޔާދު އަޙުމަދެވެ. އޭނާ އެޗް.ޑީ.ސީ.ގައި މަސައްކަތް ކުރަން ފަށާފައިވަނީ 2017 ވަނަ އަހަރުގެ މާރޗްމަހުގެ 17 ވަނަ ދުވަހުއެވެ. އެގޮތުން އަބްދުﷲ އިޔާދު އަޙުމަދު ވަނީ އެޗް.ޑީ.ސީގެ މިނިސިޕަލް ސަރވިސަސް، ވެހިކަލް ވޯކްޝޮޕް ޑިޕަޓްމެންޓްގައި 3 އަހަރާއި 10 މަސްދުވަހު ޚިދުމަތްކޮށްފައިކަމަށް އެޗް.ޑީ.ސީ.އިން މަޢުލޫމާތުދެއެވެ. ރާއްޖެ އެމްވީއަށް މަޢުލޫމާތު ލިބިފައިވާ ގޮތުގައި އަބްދުﷲ އިޔާދު އަޙުމަދު ދުބާއީއަށް ގޮސްފައިވަނީ ޗުއްޓީ ހޭދަކޮށްލުމަށެވެ.
ކޮވިޑް19 ދުނިޔޭގެ އެކި ޤައުމުތަކުގައި ހަލުވިކަމާއެކު ފެތުރެމުންދާއިރު، އައު ވޭރިއަންޓްތައް ފެނި ކޮވިޑްގެ ޙާލަތު އަނެއްކާވެސް މިވަނީ ގޯސްވާން ފަށާފައެވެ. އަދި ކޮވިޑް19 ބަލީގައި މަރުވާ މީހުންގެ ރޭޓް ވެސް ވަނީ އިތުރުވެފައެވެ. އެގޮތުން ދުބާއީ ނިސްބަތްވާ އެކުވެރި އަރަބި އިމާރާތް، ޔޫއޭއިން މިހާތަނަށް ތިން ލައްކައަށް ވުރެ ގިނަ މީހުންނަށް ކޯވިޑްއަށް ޕޮޒިޓިވްވެފައިވެއެވެ. އަދި ބަލި ޖެހިގެން 900 އަށް ވުރެ ގިނަ މީހުން ވަނީ މަރުވެފައެވެ.
