އިނގިރޭސި ޕްރިމިއާ ލީގުގައި ހޮނިހިރު ދުވަހުގެރޭ ކުޅުނު މެޗުން އެވަތަނުން ފަހު ވަގުތު މެންޗެސްޓާ ޔުނައިޓެޑާ އެއްވަރުކޮށްފިއެވެ.

ޔުނައިޓެޑުގެ ދަނޑުގައި ކުޅުނު މި މެޗު އެއްވަރުވީ 3-3 ގެ ނަތީޖާއަކުންނެވެ.

މި މެޗުގެ ފުރަތަމަ ހާފުގައި ޔުނައިޓެޑުން މޮޅު ކުޅުމެއް ދެއްކިއިރު، މި ހާފުގައި އެ ޓީމުން ވަނީ ދެ ލަނޑުގެ ލީޑެއް ނަގާފައެވެ. އެގޮތުން މެޗުގެ 24 ވަނަ މިނެޓުގައި އެޑިންސަން ކަވާނީ ޔުނައިޓެޑަށް ލީޑު ނަގައިދިންއިރު، ފުރަތަމަ ހާފުގެ ފަހު މިނެޓުގައި އެ ޓީމަށް ލީޑު ފުޅާކޮށްދިނީ ބްރޫނޯ ފެނާންޑޭސްއެވެ.

އެކަމަކު މި މެޗުގެ ދެވަނަ ހާފުގެ ކުރީކޮޅު އެވަޓަނުން ވަނީ ދެ ލަނޑު ޖަހައި ނަތީޖާ އެއްވަރުކޮށްފައެވެ. އެގޮތުން ދެވަނަ ހާފު ފަށައިގެން ހަތަރުވަނަ މިނެޓުގައި އެވަޓަނަށް ފަރަގު ކުޑަކޮށްދިން ލަނޑު ކާމިޔާބުކޮށްދިނީ އަބްދޫލައި ދުކުރޭއެވެ. އަދި އޭގެ ތިން މިނެޓު ފަހުން ހަމޭސް ރޮޑްރިގޭޒް ވަނީ ލަނޑެއް ޖަހައި، އެވަޓަނަށް ނަތީޖާ އެއްވަރުކޮށްދީފައެވެ.

މި މެޗުގައި ޔުނައިޓެޑުން އަލުން ލީޑު ނަގާފައިވަނީ 70 ވަނަ މިނެޓުގައި ސްކޮޓް މެކްޓޮމިނޭ ކާމިޔާބުކުރި ލަނޑުންނެވެ. އެކަމަކު އިތުރު ވަގުތުގެ ފަހު މިނެޓުގައި އެވަޓަނުން އަނެއްކާވެސް ނަތީޖާ އެއްވަރުކުރިއިރު، މި ލަނޑު އެ ޓީމަށް ކާމިޔާބުކޮށްދިނީ ޑޮމިނިކް ކަލްވެޓް-ލެވިނެވެ.

މި މެޗުން މޮޅުވެގެން ލީގުގެ އެއްވަނައިގައި އޮތް މެންޗެސްޓާ ސިޓީއާ ޕޮއިންޓުގެ ގޮތުން އެއްވަރުކުރުމުގެ ފުރުސަތު ޔުނައިޓެޑަށް އޮތް ނަމަވެސް، އެ ޓީމު އޮތީ ދެވަނައިގައި ކުޅުނު 23 މެޗުން ލިބުނު 45 ޕޮއިންޓާއެކުއެވެ. އަދި ތާވަލުގެ އެއްވަނައިގައި އޮތް ސިޓީއަށް 21 މެޗުން ވަނީ 47 ޕޮއިންޓް ލިބިފައެވެ.