ފްރާންސްގައި ކޮވިޑް ވެކްސިންގެ ތިން ވަނަ ވެކްސިން ޖަހަން ފަށާފާއިވާއިރު އެގައުމުގައި އަލަށް ކޮވިޑް ޖެހޭ މީހުންނާއި ވައިރަސް ޖެހިގެން ހޮސްޕިޓަލްތަކުގައި އެޑްމިޓްކޮށްގެން ފަރުވާދެމުންދާ މީހުންގެ އަދަދުތައް ދަށަށްދާން ފަށާފައިވާކަމަށް އެގައުމުން ހާމަކޮށްފިއެވެ.

ހޮނިހިރު ދުވަހު ފްރާންސްގައި އަލަށް ވައިރަސް ޖެހިފައިވަނީ 20،586 މީހުންނަށެވެ. އޭގެކުރީ ދުވަހު 22،139 މީހުންނަށް އަލަށް ވައިރަސް ޖެހިގެން ވަނީ ރިޕޯޓްކޮށްފައެވެ. ފްރާންސްގައި ދުވާލެއްގެ މައްޗަށް ވައިރަސް ޖެހޭ މީހުންގެ އަދަދުތައް ދަށަށްދާން ފަށާފައިވާތާ ވަނީ ތިން ދުވަސްވެފައެވެ.

އަނެއްކޮޅުން ވައިރަސް ޖެހިގެން ހޮސްޕިޓަލްތަކުގައި އެޑްމިޓްކޮށްގެން ފަރުވާދޭ މީހުންގެ އަދަދުވެސް ވަނީ ދަށަށްދާން ފަށާފައެވެ. އެގޮތުން ޖެހިޖެހިގެން ހަތަރު ދުވަހު އެއަދަދު ދަށަށް ދާން ފަށާފައިވާއިރު ހޮނިހިރު ދުވަހު ހޮސްޕިޓަލްގައި އެޑްމިޓްކޮށްގެން ފަރުވާދެމުން ގޮސްފައިވަނީ 27،369 މީހުންނަށެވެ. މިއީ އޭގެކުރީ ދުވަހާ އަޅާބަލާއިރު 245 މީހުންގެ މަދު އަދަދެކެވެ.

މީގެއިތުރުން ވައިރަސް ޖެހިގެން އައިސީޔޫގައި ފަރުވާ ދެމުންދާ މީހުންގެ އަދަދުވެސް ވަނީ އޭގެކުރީ ދުވަހާ އަޅާބަލާއިރު 20 މީހުން މަދުވެފައެވެ. މިހާރު އައިސީޔޫގައި ފަރުވާ ދެމުން އަންނަނީ 3225 މީހުންނަށެވެ.

ފްރާންސްގައި ކޮވިޑްގެ ހާލަތު ގޯސްވަމުން ދިޔުމުން އަލުން ކޮލްޑައުންއަކަށް ދިޔުމަށް އެގައުމުގެ ސިއްހީ މާހިރުން ގޮވާލަމުންދިޔަ ގޮވާލުމަށް ސަރުކާރުން ވަނީ އިޖާބަނުދީފައެވެ. އެގައުމުގައި ދުވާލެއްގެ މައްޗަށް ވައިރަސްޖެހޭ މީހުންގެ އަދަދު ވަނީ 20،000ށް ވުރެ މަތީގައި ހިފެހެއްޓިފައެވެ.

ފްރާންސްގައި ކޮވިޑް ވެކްސިން ދެމުންދާއިރު ފުރަތަމަ ޑޯޒް ލިބުނު މީހުންގެ އަދަދު 1.86 މިލިއަނަށް އަރައެވެ. އެގައުމުގެ ހެލްތު މިނިސްޓްރީން ހާމަކުރާ ގޮތުގައި މިހާތަނަށް އައިއިރު 247،260 މީހުން ވަނީ ދެވަނަ ޑޯޒް ޖަހާފައެވެ.

ފްރާންސްގައި މިހާރު އަންނަނީ ކޮވިޑަށް އުފައްދާފައިވާ ތިން ވެކްސިނެއް ޖަހަމުންނެވެ. އެއީ ފައިޒަރ އާއި ބައޯއެންޓެކްގެ ވެކްސިނާއި މޮޑާނާ ވެކްސިންގެ އިތުރުން އެސްޓްރަޒެނިކާގެ ވެކްސިނެވެ.

އެންމެ ފަހުން އެގައުމަށް ލިބިފައިވަނީ އެސްޓްރަޒެނިކާގެ ވެކްސިނެވެ. އެވެކްސިންގެ 273،600 ޑޯޒް ލިބިފައިވާކަމަށް ފްރާންސްގެ ހެލްތު މިނިސްޓްރީން ބުނެއެވެ. އަދި މިވެކްސިން ހޮނިހިރު ދުވަހު ޖަހަން ފަށާފައިވާއިރު މިވެކްސިން އެންމެ ފުރަތަމަ ޖަހަނީ ސިއްހީ ދާއިރާގައި މަސައްކަތްކުރާ މީހުންގެ ތެރެއިން 65 އަހަރުން ދަށުގެ މީހުންނަށެވެ.

އެސްޓްރަޒެނިކާ ވެކްސިންގެ ދެވަނަ ބެޗްގައި 304،800 ޑޯޒް ލިބޭނެއެވެ. ދެވަނަ ބެޗް ފްރާންސަށް ލިބޭނީ އަންނަ ހަފްތާގައެވެ.

ވެކްސިން ޖެހުމުގެ ޕްރޮގްރާމް ކުރިޔަށްދާލެއް ލަސްކަމުން ފްރާންސްގެ ސަރުކާރަށް ވަނީ ފާޑުކިޔުން އަމާޒުވެފައެވެ. ފްރާންސް ސަރުކާރުން އުންމީދުކުރާ ގޮތުގައި އެސްޓްރަޒެނިކާގެ ވެކްސިނާއެކު ވެކްސިން ޖެހުމުގެ ޕްރޮގްރާމް މިހާރަށްވުރެ އަވަސް ވެގެންދާނެއެވެ.

ފްރާންސްގައި ހޮނިހިރު ދުވަހު ކޮވިޑް ޖެހިގެން 191 މީހަކު މަރުވެފައިވާއިރު މިއާއެކު އެގައުމުގައި މިބަލީގައި މަރުވި މީހުންގެ އަދަދު ވަނީ 78،794ށް އަރާފައެވެ.