ހިތަދޫން ކޭސްތަކެއް ފެނި އައްޑޫ ސިޓީ މޮނީޓަރިންއަށް
އެރަށުން ޕޮޒިޓިވްވީ އެއް އޮފީހެއްގައި އުޅޭ ދެމީހުން
އައްޑޫ ސިޓީ
އައްޑޫ ސިޓީ ހިތަދޫން ކޮވިޑް-19ގެ ދެ ކޭހެއް ފެނި މުޅި އައްޑޫ ސިޓީ މޮނިޓަރިންއަށް ލައިފިއެވެ.
އައްޑޫ ސިޓީގެ މޭޔަރ އަބްދުﷲ ސޯދިގު (ސޯބެ) ރާއްޖެ އެމްވީއަށް ވިދާޅުވީ ޕޮޒިޓިވްވީ ބަލީގެ އަލާމާތްތައް ހުރެގެން ފްލޫ ކްލިނިކްއަށް ދެއްކި ދެމީހުން ކަމަށެވެ. އެ ދެމީހުންނަކީވެސް އެއްތަނެއްގައި މަސައްކަތްކުރާ ދެމީހުން ކަމަށާއި މިހާތަނަށް ކޮންޓެކްޓުންގެ ގޮތުގައި ފާހަގަވެފައިވަނީ އެމީހުންނާއެކު ދިރިއުޅޭ އާއިލީ މެމްބަރުންނާއި އޮފީސް މީހުން ކަމަށް ބުންޏެވެ.
ނަމަވެސް މުޅި ސިޓީ އެއްކޮށް މޮނިޓަރިންއަށްލީ އެއް ފަސް ގަނޑަކަށް އޮންނާތީއާއި އަދިވެސް ކޮންޓެކްޓް ޓްރޭސިން ނުނިމޭއިރު އެހެން ރަށްރަށުން ވެސް ކޮންޓެކްޓުން ފެނިދާނެކަމަށް ބަލައި ރައްކާތެރިކަމުގެ ގޮތުންކަމަށް ސޯބެ ވިދާޅުވިއެވެ.
އައްޑޫ ހިތަދޫއިން ކޭސްތަކެއް ފެނި މުޅި ސިޓީ މޮނިޓަރިންއަށް ލާފައިވާއިރު އެ އަތޮޅު ހުޅުމީދޫއިން ކޭސްތަކެއް ފެނި އެރަށްވެސް މޮނިޓަރިންގައި އޮންނަތާ ވަނީ ދުވަސްތަކެއް ވެފައެވެ. މިހާރު އެރަށުން ވެސް ޖުމްލަ 28 ކޭސް ވަނީ ފެނިފައެވެ. އެރަށުން ޕޮޒިޓިވްވެފައި ވަނީ އެރަށު އެމްޓީސީސީ މަސައްކަތު ސައިޓުގައި އުޅޭ ބިދޭސީންތަކެކެވެ.
