ލައިޕްޒީގާއި ލިވަޕޫލުގެ މެޗު ހަންގޭރީއަށް ބަދަލުކުރަނީ

ޔުއެފާ ޗެމްޕިއަންސް ލީގުގެ ދެވަނަ ބުރުގެ ފުރަތަމަ ލެގުގައި އާރްބީ ލައިޕްޒީގާއި ލިވަޕޫލް ބައްދަލުކުރަން އޮތް މެޗު ޖަރުމަނުގައި ކުޅެވޭނެ ގޮތް ނުވުމުން، އެ މެޗު ހަންގޭރީގެ ބުޑަޕެސްޓުގައި ކުޅެން މަޝްވަރާކުރަމުން އަންނަ ކަމަށް ރިޕޯޓުތައް ބުނެފިއެވެ.

ޗެމްޕިއަންސް ލީގުގެ ދެވަނަ ބުރުގެ ފުރަތަމަ ލެގުގައި ލައިޕްޒީގާއި ލިވަޕޫލް ބައްދަލުކުރާއިރު، މި މެޗު ކުޅުމަށް ތާވަލުކޮށްފައިވަނީ ޖަރުމަނުގައި މި މަހުގެ 17 ވަނަ ދުވަހުއެވެ. އަދި ދެވަނަ ލެގު އިންގްލެންޑުގައި ކުޅޭނީ އަންނަ މާޗު މަހުގެ 11 ވަނަ ދުވަހުއެވެ.

ޖަރުމަނުގައި ކުޅެން އޮތް މެޗު އެ ގައުމުގައި ކުޅެވޭ ގޮތް ނުވީ ކޮވިޑް-19 އާ ގުޅިގެން ކަނޑައަޅާފައިވާ އުސޫލުތަކާ ގުޅިގެންނެވެ. އެގޮތުން ކޮވިޑުގެ އައު ވޭރިއަންޓުގެ ނުރައްކާ ބޮޑުވުމާ ގުޅިގެން ޖަރުމަނު ސަރުކާރުން އެންމެ ފަހުން އެޅި ފިޔަވަޅުތަކުގެ ތެރޭގައި އިންގްލެންޑް ހިމެނޭ ގޮތަށް އެކި ގައުމުތަކުން އަންނަ މީހުންނަށް ޖަރުމަނަށް އެތެރެނުވެވޭ ގޮތަށް ވަނީ ކަނޑައަޅާފައެވެ. އެހެންކަމުން މި މެޗު ޖަރުމަނުގައި ނުކުޅެވޭނެކަން އެ ގައުމުގެ ސަރުކާރުން ވަނީ ލައިޕްޒީގުގެ އޮފިޝަލުންނަށް އަންގާފައެވެ.

އެހެންކަމުން މި މެޗު ނިއުޓްރަލް ދަނޑެއްގައި ކުޅޭއިރު، ރިޕޯޓުތައް ބުނާ ގޮތުން ޔުއެފާއިން ވަނީ އަންނަ ހޯމަ ދުވަހުގެ ކުރިން މެޗު ކުޅޭނެ ދަނޑެއް ނިންމުމަށް ލައިޕްޒީގަށް އަންގާފައެވެ. އެހެން ނޫންނަމަ އެ މެޗުން ލިވަޕޫލް 3-0 ގެ ނަތީޖާއަކުން މޮޅުވީ ކަމަށް ނިންމަން ޖެހިދާނެ ކަމަށްވެސް ޔުއެފާއިން އަންގާފައިވާ ކަމަށް ރިޕޯޓުތައް ބުނެއެވެ.

އެއާއެކު ހަންގޭރީގެ ބުޑަޕެސްޓުގައި ހުންނަ ޕުސްކަސް އެރީނާގައި މި މެޗު ކުޅެން ލައިޕްޒީގުން މިހާރު މަޝްވަރާކުރަމުން އަންނަ ކަމަށް ރިޕޯޓުތައް ބުނެއެވެ.

ޖަރުމަނުން ކަނޑައެޅި އުސޫލުތަކާ ގުޅިގެން މީގެ ކުރިން ޔުއެފާއިން ވަނީ ދެ ޓީމުން ރުހޭނަމަ ފުރަތަމަ ލެގު ލިވަޕޫލް ދަނޑުގައި ކުޅުމަށްފަހު، ދެވަނަ ލެގު ލައިޕްޒީގުގެ ދަނޑަށް ބަދަލުކުރަން ހުށަހަޅާފައެވެ. އެކަމަކު އެ ގޮތަށް ލިވަޕޫލުން އެއްބަސްވެފައެއް ނުވެއެވެ. އަދި ފަހުން ޔުއެފާއިން ވަނީ ދެ ލެގުގެ ބަދަލުގައި ލައިޕްޒީގާއި ލިވަޕޫލުގެ އެއް ލެގު ނިއުޓްރަލް ދަނޑެއްގައި ކުޅެންވެސް ހުށަހަޅާފައެވެ. އެކަމަކު އެކަމަށްވެސް ދެ ޓީމުން އެއްބަސްނުވާ ކަމަށް ރިޕޯޓުތައް ބުނެއެވެ.

ކޮވިޑާ ގުޅިގެން ޗެމްޕިއަންސް ލީގުގެ މެޗުތަކަށް ބުރޫ އަރާނެ ކަމަށް ބެލެވޭއިރު، ޗެމްޕިއަންސް ލީގުގެ ދެވަނަ ބުރުގެ ކުޅުން ފެށުމަށް ތާވަލުކޮށްފައިވަނީ މި މަހުގެ 17 ވަނަ ދުވަހުއެވެ. އަދި މި ސީޒަނުގެ ޗެމްޕިއަންސް ލީގުގެ ފައިނަލް މެޗު އޮންނާނީ މެއި މަހުގެ 29 ވަނަ ދުވަހު ތުރުކީގެ އިސްތަންބޫލުގައެވެ.