އެކްޓިވް ކޭސްތަކުގެ އަދަދު 2،000ން މައްޗަށް! މިއަދުގެ ނަންބަރު 137ގައި
ޕޮޒިޓިވްވި މީހުންގެ ޖުމްލަ އަދަދު ވަނީ 16،547ށް އަރައިފައި
ކޮވިޑް-19ށް ޓެސްޓުކުރުމަށް ރޭންޑަމް ސާމްޕަލް ނަގަނީ
ރާއްޖެއިން ކޮވިޑް-19އަށް އިތުރު 137 މީހުން ޕޮޒިޓިވްވެފައިވާކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ން ބުނެފިއެވެ.
އެޗްޕީއޭއިން އާއްމު ކޮށްފައިވާ ތަފާސްހިސާބުތައް ދައްކާ ގޮތުން ބުރާސްފަތި ދުވަހުގެ ހަވީރު 06:00ން ފެށިގެން ހުކުރު ދުވަހުގެ ހަވީރު 06:00 އާއި ހަމައަށް 2،982 މީހެއްގެ ސާމްޕަލް ނަގާފައިވާއިރު އޭގެ ތެރެއިން 137 މީހަކު ވަނީ ޕޮޒިޓިވްވެފައެވެ.
އެ އޭޖެންސީން އިތުރަށް ބުނީ މާލެ ސަރަހައްދުން 110 މީހަކު ކޮވިޑަށް ޕޮޒިޓިވްވެފައިވާ ކަމަށާއި އަތޮޅުތެރޭގެ ރަށްތަކުން 20 މީހަކު، އަދި ރިޒޯޓުތަކުން 7 މީހަކު ކޮވިޑަށް ޕޮޒިޓިވްވެފައިވާ ކަމަށެވެ.
އިތުރު 137 މީހަކު ކޮވިޑަށް ޕޮޒިޓިވް ވުމާއިއެކު ޕޮޒިޓިވްވި މީހުންގެ ޖުމްލަ އަދަދު ވަނީ 16،547ށް އަރައިފައެވެ. އަދި އެކްޓިވް ކޭސްގެ އަދަދު 2،014ށް އަރާފައިވާއިރު ރާއްޖެއިން މިބަލީގައި މިހާތަނަށް 54 މީހުން ވަނީ ނިޔާވެފައެވެ. ބަލިން ފަސޭހަވެފައި ވަނީ 14،472 މީހެކެވެ.
ރާއްޖޭގައި ކޮވިޑް-19 ހަލުވިކަމާއިއެކު ފެތުރެމުން އަންނައިރު ކަމާބެހޭ އިދާރާތަކުން ތަކުރާރުކޮށް އިރުޝާދު ދެމުންދަނީ އަޅާފައިވާ ފިޔަވަޅުތަކާއި އުސޫލުތަކަށް ބޯލެނބުމާއިއެކު ގަވައިދުތަކަށް އަމަލު ކުރުމަށެވެ. އަދި ރާއްޖޭގައި ވެކްސިން ދިނުމުގެ ޕްރޮގްރާމް ފަށާފައިވާއިރު ހުރިހާ ރައްޔިތުންވެސް ވެކްސިން ޖެހުމަށް ހާއްސަ ކުރެވިފައިވާ ޕޯޓަލްގައި ރަޖިސްޓްރީވުމަށް އެޗްޕީއޭގެ އިތުރުން ކަމާބެހޭ އިދާރާތަކުން ވަނީ ރާއްޖޭގެ ހުރިހާ ރައްޔިތުންނަށް އިލްތިމާސް ކޮށްފައެވެ.
