ހުކުރު ދުވަހު ރާއްޖެއިން 1003 މީހުންނަށް ކޮވިޑް-19 ވެކްސިން ދީފި
މާލޭ ސަރަޙައްދުން ވެކްސިން ޖަހާފައިވާ 787 މީހަކަށް
ރާއްޖޭގައި ކޮވިޑް-19 ވެކްސިން ޖެހުމުގެ ޕްރޮގްރާމްގެ ތެރެއިން- ރާއްޖެއިން ބޭނުން ކުރަމުންދަނީ އިންޑިއާގެ ސިރަމް އިންސްޓިޓިއުޓުން އުފައްދާފައިވާ ކޮވިޝީލްޑް ވެކްސިން
ހުކުރު ދުވަހު ރާއްޖެއިން އިތުރު 1003 މީހަކަށް ކޮވިޑް-19 ވެކްސިން ދީފިއެވެ.
ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ކޮންމެ ދުވަހަކުވެސް ވެކްސިނޭޝަނާއި ބެހޭ ފަހުގެ މައުލޫމާތުތައް ހިއްސާ ކުރަމުންދާއިރު، ހުކުރު ދުވަހު އިތުރު 1003 މީހަކަށް ވެކްސިން ދީފައިވާ ކަމަށް އެޗްޕީއޭގެ ތަފާސްހިސާބުތަކުން ދައްކައެވެ. އޭގެ ތެރޭގައި މާލޭ ސަރަޙައްދުން ވެކްސިން ޖަހާފައިވާ 787 މީހަކާއި، އަތޮޅުތެރެއިން ވެކްސިން ދީފައިވާ 216 މީހަކު ހިމެނެއެވެ. އެއާއެކު، ރާއްޖެއިން މިހާތަނަށް ކޮވިޑް-19 ވެކްސިން ޖަހާފައިވާ މީހުންގެ ޖުމުލަ އަދަދު ވަނީ 4269ށް އަރާފައެވެ.
އެޗްޕީއޭގެ ތަފާސްހިސާބުތައް ދައްކާ ގޮތުން ހުކުރު ދުވަހުގެ ނިޔަލަށް މާލޭ ސަރަޙައްދުން ކޮވިޑް ވެކްސިން ޖެހި މީހުންގެ އަދަދު މިވަނީ 3573ށް އަރާފައެވެ. އަދި އަތޮޅު ތެރެއިން ކޮވިޑް-19 ވެކްސިން ދީފައިވަނީ 696 މީހަކަށެވެ.
ރާއްޖޭގައި ކޮވިޑް-19ށް ވެކްސިން ދިނުމުގެ ޕްރޮގްރާމް ފަށާފައިވަނީ މިހިނގާ ފެބްރުއަރީ މަހުގެ 1 ވަނަ ދުވަހުއެވެ. މި ޕްރޮގްރާމް ރަސްމީކޮށް ފައްޓަވައިދެއްވީ ރާއްޖޭގެ ރައީސުލްޖުމްހޫރިއްޔާ އިބްރާޙިމް މުޙައްމަދު ސޯލިޙެވެ.
ރާއްޖެއިން ބޭނުންކުރަމުން ދަނީ އިންޑިއާގެ ސިރަމް އިންސްޓިޓިއުޓުން އުފައްދާފައިވާ ކޮވިޝީލްޑް ވެކްސިނެވެ.
ސިރަމް އިންސްޓިޓިއުޓް އޮފް އިންޑިޔާ (އެސް.އައި.އައި) އިން އުފައްދާފައިވާ "ކޮވިޝީލްޑް" ވެކްސިން ދިވެހިރާއްޖޭގައި ބޭނުންކުރުމުގެ ހުއްދަ މޯލްޑިވްސް ފުޑް އެންޑް ޑްރަގް އޮތޯރިޓީ (އެމް.އެފް.ޑީ.އޭ) އިން ވަނީ 2021 ޖަނަވަރީ 26 ވަނަ ދުވަހު ދީފައެވެ. މި ހުއްދަ ދީފައިވަނީ ޙާލަތަށް ރިޢާޔަތްކޮށް "ރެސްޓްރިކްޓެޑް ޔޫސް އިން އިމަޖެންސީ ސިޗުއޭޝަން" ގައި ބޭނުން ކުރުމަށެވެ.
ދިވެހިރާއްޖޭގައި މި ވެކްސިން ބޭނުންކުރުމުގެ ހުއްދަ މި އޮތޯރިޓީން ދީފައިވަނީ، މި ކަމުގައި ބަލަންޖެހޭ ޓެކްނިކަލް ކަންކަން ފުރިހަމައަށް ބަލައި ދިރާސާކުރުމަށްފަހު، އެ އޮތޯރިޓީއަށް ފަންނީ ލަފާދޭ ޓެކްނިކަލް ބޯޑުކަމުގައިވާ "ނޭޝަނަލް ފާރމަސޫޓިކަލް ބޯޑު"ގެ ލަފައާއި މަޝްވަރާއާއި އެކުގައިކަމަށް އެމް.އެފް.ޑީ.އޭ.ގެ ބަޔާނުގައި ބުނެފައިވެއެވެ.
ސެރަމްއިން އުފައްދާ ކޮވިޝީލްޑް ވެކްސިނަކީ އެސްޓްރަޒެނެކާ އާއި އޮކްސްފޯޑް ޔުނިވާސިޓީ ގުޅިގެން ތައްޔާރުކޮށްފައިވާ ރިސާރޗްގެ މައްޗަށް އުފައްދާ ވެކްސިނެކެވެ. މި ވެކްސިންގެ އެންމެފަހުގެ ކްލިނިކަލް ޓްރަޔަލްގެ ނަތީޖާ ދައްކާގޮތުން މިވެކްސިނަކީ 70 އިންސައްތަ އިފެކްޓިވް ވެކްސިނެކެވެ. ޔޫކޭގެ އިތުރުން ޔޫރަޕިއަން ޔޫނިއަން އަދި އިންޑިއާއިން ވެސް ވަނީ މި ވެކްސިން ބޭނުންކުރުމުގެ ހުއްދަދީފައެވެ.
