ޔާމީން ރަޝީދުގެ މަރުގެ މައްސަލައިގެ އަޑު އެހުމެއް އާދީއްތަ ދުވަހަށް ތާވަލުކޮށްފި
މި މައްސަލާގައި މިހާރު ކުރިޔަށް ދަނީ ހެކިބަސް ނެގުމުގެ އަޑުއެހުންތައް
ތޫނު އެއްޗަކުން ހަމަލާދީ މަރާލައިފައިވާ ޔާމީން ރަޝީދު
ތޫނު އެއްޗަކުން ހަމަލާދީ މަރާލައިފައިވާ ޔާމީން ރަޝީދުގެ މަރުގެ މައްސަލައިގެ އަޑު އެހުމެއް އާދީއްތަ ދުވަހަށް ތާވަލުކޮށްފައެވެ.
ކްރިމިނަލް ކޯޓުގައި މި މައްސަލައިގެ އަޑު އެހުމެއް އާދީއްތަ ދުވަހަށް ތާވަލުކޮށްފައިވާއިރު، މި މައްސަލައިގެ އަޑު އެހުން ކުރިޔަށްދާނީ އާދީއްތަ ދުވަހުގެ މެންދުރު 11:00 ގައެވެ.
މި މައްސަލައިގެ ހެކިން ހާޒިރުކުރުމުގެ އަޑުއެހުންތައް މިހާރު ކުރިޔަށްދާއިރު އާދީއްތަ ދުވަހުގެ އަޑު އެހުމުގައި އޮންނާނީ ހެކިންގެ ހެކިބަހާއި މެދު ވާހަކަ ދެއްކުމެވެ. އަދި އާދީއްތަ ދުވަހުގެ އަޑު އެހުން ކުރިޔަށްދާނީ ދައުވާ ލިބޭ ފަރާތްތައް ކޯޓަށް ހާޒިރު ކޮށްގެންކަމަށް ކްރިމިނަލް ކޯޓުން ބުނެއެވެ.
ޔާމީން މަރާލި މައްސަލައިގައި، ތޫނު އެއްޗެއް ބޭނުންކޮށްގެން ޤަސްދުގައި މީހަކު މެރުމުގެ ކުށުގެ ދަޢުވާ އުފުލާފައި ވަނީ މ. އަންނާރުމާގޭ އިސްމާއިލް ހައިޝަމް ރަޝީދާއި، މ. ކޮޅުފުށީ އީސްޓް ހުސައިން ޒިޔާދާއި، މ. ތާއިފް އިސްމާއިލް ރަޝީދާއި، މ. ކުދެހިގެ ހަސަން ޝިފާޒާއި، ގދ. ގައްދޫ ސިންދުބާދުގޭ މުހައްމަދު ދިފްރާނުގެ އިތުރުން މ. އިރާސްމިކުގެ އަހުމަދު ޒިހާން އިސްމާއިލްގެ މައްޗަށެވެ.
2017 ވަނަ އަހަރުގެ 23 އޭޕްރީލްވީ ހޮނިހިރު ދުވަހުގެރޭގެ މެންދަމުގެ ވަގުތެއްގައި ޔާމީން ރަޝީދު މަރާލައިފައިވަނީ އޭނާ ދިރިއުޅެމުން ދިޔަ ގޭގެ ސިޑި ކައިރިއަށެވެ. މި މައްސަލައިގެ ތަހުގީގު މަރު ކޮމިޝަނުންވެސް އަންނަނީ ކުރަމުންނެވެ.
