ފަތުރުވެރިކަމުގެ ސިނާޢަތުގައި މަސައްކަތް ކުރާ ފަރާތްތަކަށް ކޮވިޑް-19ގެ ވެކްސިން ދޭންފަށައިފިއެވެ.

ބުރާސްފަތި ދުވަހު ސޯޝަލް ސެންޓަރުގައި އޮތް ރަސްމިއްޔާތެއްގައި ފަތުރުވެރިކަމުގެ ސިނާޢަތުގައި މަސައްކަތް ކުރާ މަސައްކަތްތެރިންނަށް ވެކްސިންޖެހުން ފައްޓަވައިދެއްވީ ފަތުރުވެރިކަމާ ބެހޭ ވަޒީރު ޑރ އަބްދުﷲ މައުސޫމްއެވެ.

މި ރަސްމިއްޔާތުގައި ވާހަކަދައްކަވަމުން މައުސޫމް ވިދާޅުވީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، ވިދާޅުވި ފަދައިން ދިވެހިރާއްޖޭގެ ހުރިހާ ރައްޔިތުންނަށް ވެކްސިން އަގަކާ ނުލައި ލިބިގެންދާނެ ކަމަށާއި، އެގޮތުން ބުރާސްފަތި ދުވަހު ފަތުރުވެރިކަމުގެ ސިނާޢަތުގައި ހަރަކާތްތެރިވާ މުވައްޒަފުންނަށް ވެކްސިންޖެހުމުގެ އިންތިޒާމް ހަމަޖެހިގެން ދިޔުމަކީ މި ސިނާޢަތަށް ލިބިގެންދިޔަ ބޮޑު ކުރިއެރުމެއް ކަމަށެވެ.

ވަޒީރު އިތުރަށް ވިދާޅުވީ ކޮވިޑްގެ ހާލަތުގައި އެންމެ ބޮޑު ގުރުބާނީއެއްވި އެއް ބަޔަކީ ފަތުރުވެރިކަމުގެ ސިނާޢަތުގައި ހަރަކާތްތެރިވާ މުވައްޒަފުން ކަމަށެވެ. އެގޮތުން އަނބި ދަރީންނާއި ދުރުގައި ފަތުރުވެރިކަމުގެ ސިނާޢަތުގައި ހަރަކާތްތެރިވާ ފަރާތްތަކުން ބޮޑު ގުރުބާނީއެއްވިކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ ފަތުރުވެރިކަމުގެ ސިނާޢަތުގައި ހަރަކާތްތެރިވާ ފަރާތްތަކުގެ ތެރެއިން އެންމެ ފުރަތަމަ ވެކްސިންޖެހުމަށް ނިންމާފައިވަނީ ފަތުރުވެރިންނާ އެންމެ ގާތުން ޚިދުމަތްދޭ ފަރާތްތަކަށް ކަމަށެވެ. އެގޮތުން ސަފާރީތަކުގައި މަސައްކަތްކުރާ މުވައްޒަފުންނާއި، ގެސްޓް ހައުސްގައި މަސައްކަތް ކުރާ މުވައްޒަފުންނާއި ރިސެޕްސަންގައި މަސައްކަތްކުރާ މުވައްޒަފުންނަކީ އެންމެ ފުރަތަމަ ވެކްސިންޖެހުމަށް ނިންމާފައިވާ ފަރާތްތައް ކަމަށް ވަޒީރު ވިދާޅުވިއެވެ.

ފަތުރުވެރިކަމުގެ ދާއިރާގެ ފްރަންޓްލައިން މަސައްކަތްކުރާ 10،000 (ދިހަ ހާސް) ސްޓާފުންނަށް ވެކްސިން ޖެހުމުގެ އިންތިޒާމު ހަމަޖައްސާފައިވާއިރު، މި ފުރުސަތުގެ ދަށުން ވެކްސިން ޖަހަން ރަޖިސްޓްރީވުމަށް ވަނީ އަންގާފައެވެ. އެގޮތުން އެންމެ ފުރަތަމަ ވެކްސިން ޖަހާނީ ގްރޭޓާ މާލެ ސަރަހައްދުގެ ޓުއަރިސްޓް ފެސިލިޓީތަކުން ފްރަންޓްލައިންގައި މަސައްކަތްކުރި މުވައްޒަފުންނަށް ކަމަށް އެ މިިނިސްޓްރީން މަޢުލޫމާތުދެއެވެ.