ޓީސީ ބަލިކޮށް ވެލެންސިއާ ދެވަނައަށް

ދިރާގު ދިވެހި ޕްރިމިއާ ލީގުގައި އަންގާރަ ދުވަހުގެ ހަވީރު ޓީސީ ސްޕޯޓްސް ކުލަބު ބަލިކޮށް ލީގު ތާވަލުގެ ދެވަނައަށް ކުލަބު ވެލެންސިއާ ޖެހިލައިފިއެވެ.

ގައުމީ ފުޓްބޯޅަ ދަނޑުގައި ކުޅުނު މެޗުން ވެލެންސިއާ މޮޅުވީ 2-0 ގެ ނަތީޖާއަކުންނެވެ.

މި މެޗު ފަށައިގެން ވެލެންސިއާއިން ފުލުފުލުގައި ގިނަ ހަމަލާތަކެއް އުފައްދާފައިވާއިރު، އެ ޓީމުގެ އިތުބާރު ފޯވާޑް އަލީ އަޝްފާގު (ދަގަނޑޭ) އާއި އަލީ ފާސިރު (ސެންޓޭ) އަށް ވަނީ ލަނޑު ޖަހަން ރަނގަޅު ފުރުސަތުތަކެއް ލިބި ބޭކާރުވެފައެވެ. އޭގެ ފަހުން ޓީސީގެ މެލްކަމް ކޮނޭލިއަސް ސްޓެވާޓަށް ލަނޑު ޖަހަން ރަނގަޅު ފުރުސަތެއް ލިބުނު ނަމަވެސް، ވެލެންސިއާގެ ޑިފެންޑަރުން ވަނީ އޭނާ ފޮނުވާލި ހަމަލާ ދިފާއުކޮށްފައެވެ.

މެޗުގެ ދެވަނަ ހާފު ފަށައިގެން ވެލެންސިއާއިން އެޓީމުގެ ކުޅުން ރަނގަޅުކުރިއިރު، މެޗުގެ 57 ވަނަ މިނެޓުގައި އެ ޓީމުން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ސެންޓޭއެވެ. އަދި އޭގެ ފަހުންވެސް މި މެޗުގައި ވެލެންސިއާއިން ރަނގަޅު ކުޅުމެއް ދެއްކިއިރު، މެޗުގެ 72 ވަނަ މިނެޓުގައި އެ ޓީމުގެ އެންޓޯނިއޯ ސޮލާ ފޮނުވާލި ހަމަލާއެއް ވަނީ ގޯލުގެ އަރިމަތީ ދަނޑިއަށް އަމާޒުވެފައެވެ. އަދި މެޗުގެ 82 ވަނަ މިނެޓުގައި ސެންޓޭއަށް ވަނީ ލީޑު ފުޅާ ކުރުމަށް ހުސް ފުރުސަތެއް ލިބި ބޭކާރުވެފައެވެ.

މި މެޗުގައި ވެލެންސިއާއިން ލީޑު ފުޅާކޮށްފައިވަނީ މެޗު ނިމެން ފަސް މިނެޓަށް ވެފައި ވަނިކޮށެވެ. މި ލަނޑު އެޓީމަށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި އަޙްމަދު އިމާޒް (އާއްކޮ) އެވެ.

މި މެޗުގެ ކުރިން ވެލެންސިއާގެ ކޯޗު މުޙައްމަދު އާތިފް (އާތީ) ކަރަންޓީނުކުރުމާ ގުޅިގެން އޭނާ ދަނޑަށް ހާޒިރުވެފައެއް ނުވެއެވެ. މި މެޗަށްފަހު ވާހަކަ ދައްކަމުން ވެލެންސިއާގެ އެސިސްޓަންޓް ކޯޗު ހުސެއިން އިބްރާހީމް އިލްމާއު ބުނީ އެ ޓީމުން މެޗަށް ނުކުތީ ތިން ޕޮއިންޓް ހޯދުމަށް ކަމަށާއި، އެކަން ހާސިލުވުމުން ހިތްހަމަޖެހޭ ކަމަށެވެ.

އަންގާރަ ދުވަހުގެ މެޗަކީ ޓީސީގެ ކޯޗުގެ މަގާމާ މުޙައްމަދު ނިޒާމް (ނިޒާމްބެ) ހަވާލުވި ފަހުން އެ ޓީމުން ކުޅުނު ފުރަތަމަ މެޗެވެ. މި މެޗަށްފަހު ނިޒާމްބެ ބުނީ މެޗުން ބަލިވި ނަމަވެސް، ކުޅުންތެރިން ދެއްކި ކުޅުމާ ދޭތެރޭ ހިތްހަމަޖެހޭ ކަމަށެވެ. އަދި ކުރިއަށް ހުރި މެޗުތަކުގައި ނަތީޖާ ރަނގަޅުކުރަން މަސައްކަތް ކުރާނެ ކަމަށްވެސް ވަނީ ބުނެފައެވެ.

މި މޮޅާއެކު ވެލެންސިއާއިން ލީގު ތާވަލުގެ ދެވަނައަށް ޖެހިލީ ކުޅުނު ނުވަ މެޗުން ލިބުނު 15 ޕޮއިންޓާއެކުގައެވެ. ލީގު ތާވަލުގެ ތިންވަނައިގައި އޮތް ދަ ގްރާންޑޭ ސްޕޯޓްސް ކުލަބަށް އަށް މެޗުން 15 ޕޮއިންޓް ލިބިފައިވާއިރު، ލީގުގައި އަންގާރަ ދުވަހުގެރޭ މާޒިޔާ ސްޕޯޓްސް އެންޑް ރެކްރިއޭޝަން ބަލިކޮށް ދެވަނައަށް އަލުން އެރުމުގެ ފުރުސަތު ދަ ގްރާންޑޭއަށް އެބައޮތެވެ. މީގެ އިތުރުން ވެލެންސިއާ އަތުން ބަލިވި ޓީސީ އޮތީ ތާވަލުގެ ފަސްވަނައިގައި ނުވަ މެޗުން ނުވަ ޕޮއިންޓާއެކުއެވެ.