އުމުރުން 70 އަހަރުން މަތީގެ ފަރާތްތަކަށް، ބުދަ ދުވަހު ވެކްސިން ދޭން ފަށަނީ
2 ފެބުރުއަރީ 2021 | އަންގާރަ 13:32މާލޭގައި ވެކްސިން ދެނީ ހަތަރު ތަނަކުން
ކުޅުދުއްފުށީގައި ކޮވިޑް-19 އަށް ވެކްސިން ދިނުމުގެ ތެރެއިން
ފެބްރުއަރީ ތިން ވަނަ ދުވަހުން ފެށިގެން މާލޭގައި ދިރިއުޅޭ އުމުރުން 70 އަހަރުން މަތީގެ މީހުންނަށް ކޮވިޑް-19 ވެކްސިން ދޭން ފަށާނެކަމަށް ހެލްތު ޕްރޮޓެކްޝަން އެޖެންސީން ބުނެފިއެވެ.
އެޗްޕީއޭއިން ނެރުނު ބަޔާނެއްގައި ބުނެފައި ވަނީ އުމުރުން 70 އަހަރުން މަތީގެ ފަރާތްތަކަށް، ބުދަ ދުވަހު ވެކްސިން ދިނުމުގެ މަސައްކަތް ފަށާނެ ކަމަށާއި އެ ފަރާތްތައް ވެކްސިން ޖެހުމަށް ދާންޖެހޭ ތަނާއި ގަޑި އެޗްޕީއޭއިން ހިއްސާކުރާނެ ކަމަށެވެ.
މިވަގުތު މާލޭގައި ކޮވިޑް-19 އަށް ވެކްސިން ޖެހުމުގެ މަސައްކަތް ކުރިއަށް ގެންދިއުމަށް ހަމަޖެހިފައިވަނީ ސޯޝަލް ސެންޓަރ، އޭޑީކޭ ހޮސްޕިޓަލް އަދި ވިލިމާލެ ހޮސްޕިޓަލްގެ އިތުރުން ސެނެހިޔާގައިކަމަށް އެޗްޕީއޭއިން ބުނެއެވެ.
އެޗްޕީއޭއިން ބުނީ ވެކްސިން ޖަހަން ދާއިރު، އައިޑީ ކާޑު ނުވަތަ ކާކުކަން އަންގައިދޭ ރަސްމީ ލިޔުމެއް ގެންދަން ޖެހޭނެ ކަމަށެވެ. އަދި ވެކްސިން ޖަހަންދާ މީހާއަކީ ބަލީގެ އެއްވެސް އަލާމާތެއް ހުރި މީހަކަށް ވެގެން ނުވާނެ ކަމަށާއި ކަރަންޓީންގައި ތިބި ފަރާތްތަކަށްވެސް ވެކްސިން ޖެހޭނީ ކަރަންޓީން ނިމުމުން ކަމަށް އެޗްޕީއޭއިން ބުނެއެވެ.
މީގެ އިތުރުން ވެކްސިން ޖަހަން ދާއިރު، ރަނގަޅަށް ކައިގެން ދިއުމަށް އެޗްޕީއޭއިން އިލްތިމާސްކުރެއެވެ. އަދި ވެކްސިން ޖަހަން ދާއިރު، އެކަކަށް ވުރެ ގިނަ މީހުން އެކުގައި ނުދިނުމަށާއި ވެކްސިން ޖަހަން ދާއިރު، އަމިއްލަ ފެންފުޅިއެއް ގެންދިއުމަށް އިލްތިމާސްކުރެއެވެ.
މިވަގުތު ރާއްޖޭގައި ސިރަމް އިންސްޓިޓިއުޓްގެ ކޮވިޝީލްޑް ވެކްސިން އެމެޖެންސީކޮށް ބޭނުން ކުރުމުގެ ހުއްދަ ދީފައިވާއިރު، މި ވެކްސިނަކީ 70 އިންސައްތަ ކާމިޔާބު ވެކްސިނެކެވެ. އަދި މިވެކްސިންގެ އެންމެ ފަހުގެ ނަތީޖާތައް ދައްކާގޮތުން މިވެކްސިނަކީ އުމުރުން ދުވަސްވީ މީހުންނަށް ރަނގަޅު ވެކްސިނެކެވެ. މިވެކްސިން ޖެހުމުން ޒުވާނުންގެ ދިފާއީ ބާރު މަސައްކަތްކުރާގޮތާއި މާބޮޑު ތަފާތެއް ނެތި އުމުރުން ދުވަސްވީ މީހުންގެ ދިފާއީ ނިޒާމުވެސް ވެކްސިން ޖެހުމުން ބައްޔާ ދެކޮޅަށް މަސައްކަތްކުރާކަމަށް ވެކްސިންގެ ނަތީޖާތައް ދައްކައެވެ.
