އާސެނަލް ދޫކޮށް ޖަރުމަނުގެ ޑިފެންޑަރު ޝޮކްޑްރަން މުސްތާފީ ޝާލްކާއަށް ބަދަލުވެއްޖެއެވެ.

ޓްރާންސްފާ ބާޒާރުގެ ފަހު ދުވަހު މުސްތާފީ ޝާލްކާއަށް ބަދަލުވީ ދާއިމީ އެއްބަސްވުމެއް ދަށުންނެވެ. ޝާލްކާއިން މުސްތާފީގެ ސޮއި ހޯދީ އެ ޓީމަށް ކުޅެމުން އަންނަ ތުރުކީގެ ޒުވާން ޑިފެންޑަރު އޮޒާން ކަބަކް ލޯނު އެއްބަސްވުމެއްގެ ދަށުން ލިވަޕޫލަށް ބަދަލުވުމާ ގުޅިގެންނެވެ.

އާސެނަލް ދޫކޮށް އުމުރުން 28 އަހަރުގެ މުސްތާފީ ޝާލްކާއަށް ބަދަލުވިއިރު، މި ސީޒަނުގައި އޭނާ އާސެނަލަށް ކުޅެދީފައިވަނީ އެންމެ ނުވަ މެޗެވެ. އަދި އިނގިރޭސި ޕްރިމިއާ ލީގުގައި އޭނާ އެންމެ ތިން މެޗު ކުޅެފައިވާއިރު، މި ތިން މެޗުގައިވެސް މުސްތާފީ ކުޅެން އަރާފައިވަނީ ބަދަލު ކުޅުންތެރިއެއްގެ ގޮތުގައެވެ.

އެހެންނަމަވެސް 2016 ވަނަ އާސެނަލާ ގުޅުނު މުސްތާފީ ވަނީ މީގެ ކުރިން އެ ޓީމުގެ ފަހަތުގައި މުހިންމު ދައުރެއް އަދާކޮށްފައެވެ. އެގޮތުން މުސްތާފީ ވަނީ އާސެނަލަށް 151 މެޗު ކުޅެދީ ނުވަ ލަނޑު ޖަހާފައެވެ. އަދި އޭނާ ވަނީ އާސެނަލާއެކު އިނގިރޭސި އެފްއޭ ކަޕް ދެ ފަހަރު ކާމިޔާބުކޮށްފައެވެ.

ޖަރުމަނުގެ ގައުމީ ފުޓްބޯޅަ ޓީމުންވެސް ޖާގަ ހޯދާފައިވާ މުސްތާފީއަކީ 2014 ވަނަ އަހަރު އެ ގައުމުން ފީފާ ވޯލްޑް ކަޕް ކާމިޔާބުކުރި ސްކޮޑުގައި ހިމެނުނު ކުޅުންތެރިއެކެވެ. އެގޮތުން މުބާރާތުގެ ކުރީކޮޅު މުސްތާފީ އެ ގައުމަށް މުހިންމު މެޗުތަކެއް ކުޅެދިން ނަމަވެސް، ފަލަމަސްގަނޑަށް ލިބުނު އަނިޔާއެއް ސަބަބުން އޭނާއަށް މުބާރާތުގެ ފަހު މެޗުތައް ގެއްލުނެވެ.

އާސެނަލުން ފުރުސަތު ލިބުން މަދުވުމާއެކު މުސްތާފީ ޝާލްކާއަށް ބަދަލުވިއިރު، ޖަރުމަން ލީގުގައި ޝާލްކާ އޮތީ ތާވަލުގެ ފުލުގައެވެ. އެގޮތުން އެ ޓީމަށް ކުޅުނު 19 މެޗުން ލިބިފައިވަނީ އެންމެ އަށް ޕޮއިންޓެވެ. ލީގުގައި ޝާލްކާއި ދެން އެންމެ އަވަހަށް ކުޅޭ މެޗުގައި އަންނަ ހޮނިހިރު ދުވަހުގެރޭ ނުކުންނާނީ އާރްބީ ލެއިޕްޒީގާ ދެކޮޅަށެވެ.