ގަވާއިދާ ޚިލާފަށް ހަނިފަރަށް ވަތް ޔޮޓެއް ޖޫރިމަނާކޮށްފި
2 ފެބުރުއަރީ 2021 | އަންގާރަ 08:05ޖޫރިމަނާ ކޮށްފައިވަނީ 6000 ރުފިޔާއިން
ހަނިފަރަށް ވަދެގެން ޖޫރިމަނާކުރި ވިޓާލިއާ 2 ލަންޑަން
ޙިމާޔަތްކޮށްފައިވާ ބ. ހަނިފަރު ސަރަޙައްދަށް ގަވާއިދާ ޚިލާފަށް ވަތް ޔޮޓެއް ޖޫރިމަނާ ކޮށްފިއެވެ.
އެންވަޔަރަމަންޓަލް ޕްރޮޓެކްޝަން އެޖެންސީ (އީޕީއޭ) އިން ބުނީ ޖެނުއަރީ މަހުގެ 4 ވަނަ ދުވަހު "ވިޓާލިއާ 2 ލަންޑަން" ނަމަކަށް ކިޔާ ޔޮޓެއް ޙިމާޔަތްކޮށްފައިވާ ބ. ހަނިފަރު ސަރަޙައްދަށް ގަވާއިދާ ޚިލާފަށް ވަދެ އެ އުޅަނދުގައި ތިބި ފަރާތްތަކުން އެ ސަރަޙައްދުގައި ކައިޓް ސަރފްކޮށް ހަނިފަރަށް އަރައި ޙަރަކާތްތަކެއް ހިންގާފައިވާ ކަމަށެވެ.
އެހެންކަމުން ބ. އަތޮޅު ހަނިފަރު ސަރަޙައްދު ރައްކާތެރިކޮށް ދެމެހެއްޓުމާބެހޭ ގަވާއިދުގެ ދަށުން 6000ރ. (ހަހާސް ރުފިޔާ) އިން އެ އުޅަނދު ޖޫރިމަނާ ކޮށްފައިވާ ކަމަށެވެ. ޖޫރިމަނާ ކޮށްފައިވަނީ ހޯމަ ދުވަހުއެވެ. އީ.ޕީ.އޭ.އިން ބުނީ ޖޫރިމަނާ 30 ދުވަހުގެ ތެރޭގައި އެ އެޖެންސީއަށް ދެއްކުމަށް އެ އުޅަނދުގެ ލޯކަލް އެޖެންޓް އޭޝިއާ ޕެސިފިކް ސްޕަރޔޮޓްސް ޕްރައިވެޓް ލިމިޓެޑަށް އަންގާފައިވާ ކަމަށެވެ.
ބ. އަތޮޅު ހަނިފަރު ސަރަޙައްދު ރައްކާތެރިކޮށް ދެމެހެއްޓުމާބެހޭ ގަވާއިދަށް އެންމެ ފަހުން ގެނެސްފައިވާ އިޞްލާޙުގައި ބުނެފައިވަނީ މޫދު ކުޅިވަރުގައި ބޭނުންކުރާ އިންޖީނުލީ އުޅަނދާއި، އިންޖީނު ނުލާ އުޅަނދު ފަދަ ތަކެތީގައި ސްނޯކުލް ކުރަން އުޅޭ މީހުން ނުވަތަ ފަތާފައި އުޅޭ މީހުން އެ ސަރަޙައްދުގައި ހަރަކާތްތެރިވުމަކީ މަނާ ކަމެއް ކަމަށެވެ. މީގެ އިތުރުން ބ.އަތޮޅު ހަނިފަރު ސަރަޙައްދަށް ވަދެ ނުކުމެވޭނީ ހަމައެކަނި އެ ސަރަޙައްދަށް ވަނުމުގެ ހުއްދަ ދޫކޮށްފައިވާ އުޅަނދުފަހަރަށާއި ރޭންޖަރުން ބޭނުންކުރުމަށް ޚާއްޞަކޮށްފައިވާ އުޅަނދުފަހަރަށެވެ. އަދި މި ސަރަޙައްދުގައި ހަރަކާތްތެރިވެވޭނީ އީ.ޕީ.އޭ.އިން ހުއްދަ ލިބިގެން ކަމަށާއި، އަދި ހުއްދަ ލިބިފައިވާ ފަރާތްތައް އެ ސަރަޙައްދަށް ވަނުމުގެ ކުރިން ރޭންޖަރުންނަށް އަންގަންވާނެ ކަމަށް ވެސް ބުނެފައިވެއެވެ.
