ދިރާގު ދިވެހި ޕްރިމިއާ ލީގުގެ ދެވަނަ ބުރުގައި އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނާ ދެކޮޅަށް ނުކުންނަ މެޗަކީ އުނދަގޫ މެޗެއް ކަމަށާއި، އެކަމަކު އެ މެޗުން މޮޅުވުމުގެ ފުރުސަތު އެބައޮތް ކަމަށް ދަ ގްރާންޑޭ ސްޕޯޓްސް ކުލަބުގެ ކޯޗު އިސްމާޢީލް މަހަފޫޒް (އިންމަ) ބުނެފިއެވެ.

ލީގުގެ ދެވަނަ ބުރުގައި މާޒިޔާ އާއި ދަ ގްރާންޑޭ ބައްދަލުކުރާއިރު، ފުރަތަމަ ބުރުގައި މި ދެ ޓީމު ބައްދަލުކުރި މެޗު ނިމުނީ 2-2 ން ދެ ޓީމު އެއްވަރުވެގެންނެވެ. އެ މެޗުގައި މާޒިޔާއަށް އިރުޝާދު ދީފައިވަނީ އެސިސްޓަންޓް ކޯޗު އަޙްމަދު ސުޒައިރެވެ.

ލީގުގައި އަންގާރަ ދުވަހުގެރޭ މާޒިޔާއާ ދެކޮޅަށް ނުކުތުމުގެ ކުރިން ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން އިންމަ ބުނީ މާޒިޔާއަކީ ހުރިހާ ގޮތަކުންވެސް ވަރުގަދަ ޓީމެއް ކަމަށާއި، އެކަމަކު މި މެޗަށް ދަ ގްރާންޑޭ އޮތީ ވަރަށް ރަނގަޅަށް ތައްޔާރުވެފައި ކަމަށެވެ. އަދި މާޒިޔާއާ ކުރިމަތިލާއިރު ވިސްނަން ޖެހޭ ވަރަށް ބައިވަރު ކަންކަން ހުންނާނެ ކަމަށާއި، ގައުމީ ފުޓްބޯޅަ ޓީމުގެ އެހާ ގިނަ ކުޅުންތެރިން ތިބި ޓީމަކާ ދެކޮޅަށް ނުކުތް ނަމަވެސް، މެޗުން މޮޅުވެވޭނެ ކަމަށާއި، މި މެޗުން މޮޅުވުމަށް ކުޅުންތެރިން މަސައްކަތް ކުރާނެ ކަމުގެ ފުރިހަމަ ޔަގީންކަން އެބައޮތް ކަމަށްވެސް އިންމަ ވަނީ ބުނެފައެވެ.

ލީގުގެ ފުރަތަމަ ބުރުގައި މި ދެ ޓީމު ބައްދަލުކުރި މެޗަށްފަހު މާޒިޔާއިން ބިދޭސީ ކޯޗެއް ހަމަޖައްސާފައިވާއިރު، އިންމަ ބުނީ އައު ކޯޗާއެކު މާޒިޔާއިން އެ ޓީމުގެ ކުޅުމުގެ ވައްޓަފާޅި ވަރަށް ތަފާތު ކަމަށާއި، މާޒިޔާއަކީ މިހާރު ރީތި ފުޓުބޯޅައެއް ކުޅޭ ޓީމެއް ކަމަށެވެ.

ދަ ގްރާންޑޭ މެޗުގެ ކުރިން މާޒިޔާގެ ކޯޗު ރިސްޓޯ ވިޑަކޮވިޗް ބުނީ ދަ ގްރާންޑޭއިން ފަހަކަށް އައިސް ރަނގަޅު ކުޅުމެއް ދައްކަމުން އަންނަ ކަމަށާއި، މި މެޗަށް ނުކުންނައިރު މާޒިޔާއަށް އޮތް އެންމެ ބޮޑު މައްސަލައަކީ ބައެއް މުހިންމު ކުޅުންތެރިން އަނިޔާގައި ތިބުން ކަމަށެވެ.

އަދި މި މެޗަކީ ލީގު ތާވަލުގެ އެއްވަނައިގައި ލީޑު ދެމެހެއްޓުމަށް މާޒިޔާއަށް ވަރަށް މުހިންމު މެޗެއް ކަމަށާއި، އެހެންކަމުން މި މެޗަށް މާޒިޔާއިން ނުކުންނާނީ ވަރަށް ރަނގަޅަށް ތައްޔާރުވެގެން، ރީތި ފުޓްބޯޅައެއް ކުޅުމަށް ކަމަށްވެސް ވިޑަކޮވިޗް ބުންޏެވެ.

ދަ ގްރާންޑޭ މެޗަށް ނުކުންނައިރު، ލީގުގައި މިހާތަނަށް އެއްވެސް މެޗަކުން މާޒިޔާ ބަލިވެފައެއް ނުވެއެވެ. އެއާއެކު ތާވަލުގެ އެއްވަނައިގައި މާޒިޔާ އޮތީ ކުޅުނު އަށް މެޗުން ލިބުނު 18 ޕޮއިންޓާއެކުއެވެ. އަދި ދެވަނައިގައި އޮތް ދަ ގްރާންޑޭއަށް އަށް މެޗުން ވަނީ 15 ޕޮއިންޓް ލިބިފައެވެ. އެހެންކަމުން މި މެޗުން މޮޅުވެ މާޒިޔާއާ ޕޮއިންޓުގެ ގޮތުން އެއްވަރުކުރުމުގެ ފުރުސަތު ދަ ގްރާންޑޭއަށް އެބައޮތެވެ.

ދިރާގު ދިވެހި ޕްރިމިއާ ލީގުގައި މާޒިޔާ އާއި ދަ ގްރާންޑޭ ބައްދަލުކުރާ މެޗު ފަށާނީ އަންގާރަ ދުވަހުގެރޭ 21:00 ގައެވެ.