ޖަޕާނުގައި އިޢުލާންކޮށްފައިވާ ސިއްޙީ ކުއްލި ހާލަތުގެ މުއްދަތު އިތުރު ކުރާނެ ކަމަށް ބެލެވޭ- ރިޕޯޓުތައް

ކޮވިޑް-19 އާ ގުޅިގެން ޖަޕާނުގައި އިޢުލާނުކޮށްފައިވާ ސިއްޙީ ކުއްލި ހާލަތުގެ މުއްދަތު އިތުރުކުރާނެކަމަށް ރިޕޯޓުތައް ބުނެފިއެވެ.

ޖަޕާނުގެ ސިއްޙީ ކުއްލި ހާލަތުގެ މުއްދަތު އިތުރުކުރުމާ ގުޅޭ ބައްދަލުވުމެއް ބޭއްވުމަށް ނިންމާފައިވާއިރު އެގައުމުގެ ބޮޑުވަޒީރު ޔޮޝިހިޑޭ ސޫގާގެ ނޫސް ކޮންފަރެންސެއް ބޭއްވުމަށް އަންގާރަ ދުވަހަށް ތާވަލުކޮށްފައިވާ ކަމަށް ވެސް ރޮއިޓަރސްއިން ވަނީ ރިޕޯޓުކޮށްފައެވެ.

ޖަޕާނުގެ ސަރުކާރުން ފާއިތުވި ޖެނުއަރީ މަހު 11 ސަރަޙައްދަކަށް އެއް މަސް ދުވަހަށް ސިއްޙީ ކުއްލި ނުރައްކަލުގެ ހާލަތު އިޢުލާން ކޮށްފައިވާއިރު މީގެ ތެރެއިން ބައެއް ސަރަޙައްދުތަކަށް މިފަހަރު ކުއްލި ހާލަތު އިޢުލާން ނުކުރާނެކަމަށް ބެލެވޭކަމަށް ވެސް ބައެއް މީޑިއާ ރިޕޯޓުތައް ބުނެއެވެ.

އެގޮތުން މީހުން މަދު، އަދި އާބާދީ މަދު ސަރަޙައްދުތަކަށް ކުއްލި ހާލަތު އިޢުލާން ނުކުރާނެ ކަމަށް ގިނަ ބަޔަކު ބުނަމުން އަންނަ އިރު އެގައުމުގެ ކަމާބެހޭ އިދާރާތަކުން ދަނީ މިކަމުގެ މަޝްވަރާތައް ކުރިއަށް ގެންދަމުންނެވެ.

އެ ގައުމުގައި ކޮވިޑް-19 ހަލުވިކަމާއެކު ފެތުރެމުން އަންނައިރު އެގައުމުން ދަނީ އަޅާފައިވާ ފިޔަވަޅުތައް އިތުރަށް ހަރުދަނާކޮށް، ފިޔަވަޅުތައް ވަރުގަދަ ކުރަމުންނެވެ. ޖަޕާނުގައި މިހާތަނަށް 390,687 މީހުންނަށް ކޮވިޑް ޖެހިފައިވާ ކަމަށް ރިޕޯޓު ކުރެވިފައިވާއިރު 5,766 މީހަކު މި ބަލީގައި ވަނީ މަރުވެފައެވެ.