ފަތުރުވެރިކަން އިސްތިހާރުކުރުމަށް ކުޅިވަރުގެ ބައިނަލްއަޤްވާމީ މުބާރާތެއް އައްޑޫގައި
ރާއްޖޭގެ ފަތުރުވެރިކަމުގެ ރަން އަހަރުގެ ގޮތުގައި 2022 ފާހަގަކުރަން ވަނީ ނިންމާފައި
ބައިކް ވާރލްޑް ޗެމްޕިއަންޝިޕް އައްޑޫ ސިޓީގައި ބޭއްވުމާއި ގުޅޭގޮތުން މަޝްވަރާކުރުމަށް ބޭއްވި ބައްދަލުވުމުގެ ތެރެއިން
ރާއްޖޭގެ ފަތުރުވެރިކަން އިސްތިހާރުކުރުމަށް އަކުއަ ބައިކް ވާރލްޑް ޗެމްޕިއަންޝިޕް އައްޑޫ ސިޓީގައި ބޭއްވުމާއި ގުޅޭގޮތުން މަޝްވަރާކޮށްފިއެވެ. މި މަޝްވަރާކޮށްފައިވަނީ ޖަނަވަރީ 31 ވަނަ ދުވަހު އައްޑޫ ސިޓީ ކައުންސިލްގައި އޮތް ބައްދަލުވުމެއްގެ ތެރެއިންނެވެ.
އައްޑޫ ސިޓީ ކައުންސިލުން ކުރި ޓުވީޓެއްގައި ވަނީ، މި މަޝްވަރާތައްކުރުމަށް އެޗް2އޯ ރޭސިންގ ލިމިޓެޑްއާއި އައްޑޫ ސިޓީ ކައުންސިލްގެ މެންބަރުންނާ އީކުއޭޓަރ ވިލެޖުގައި ބައްދަލުކޮށްފައިވާކަން ހާމަކޮށްފައެވެ. އެގޮތުން މި ބައްދަލުވުމުގައި، "އަކުއަ ބައިކް ވާރލްޑް ޗެމްޕިއަންޝިޕް 2022" އައްޑޫ ސިޓީގައި ބޭއްވުމާ ގުޅޭގޮތުން މަޝްވަރާކޮށްފައިވާކަމަށް ސިޓީ ކައުންސިލުން މަޢުލޫމާތުދެއެވެ. މި ހަރަކާތުގެ ސަބަބުން ގިނަ އަދަދެއްގެ ފަތުރުވެރިން ގެނެސް ރާއްޖޭގެ އަދި ވަކިން ޚާއްސަކޮށް ދެކުނުގެ ފަތުރުވެރިކަން ކުރިއަރާނެކަމަށް މިހަރަކާތް ހިންގާ އެޗް2އޯ ރޭސިންގ ލިމިޓެޑްއިން މި ބައްދަލުވުމުގައި ވަނީ ފާހަގަކޮށްފައެވެ.
އަކުއަ ބައިކް ވާރލްޑް ޗެމްޕިއަންޝިޕްއެއް 2022ގައި ބޭއްވުމަށް ތައްުޔާރުވަމުންދާއިރު، 2022 ވަނަ އަހަރު ވެގެންދާނީ ރާއްޖޭގެ ފަތުރުވެރިކަމުގެ ރަން އަހަރަށް ކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމް ވަނީ ވިދާޅުވެފައެވެ. ޓުއަރިޒަމް މިނިސްޓަރ ވަނީ، 2022 ވަނަ އަހަރަކީ ރާއްޖޭގެ ފަތުރުވެރިކަމަށް 50 އަހަރު ފުރޭ އަހަރަށްވާއިރު، އެއަހަރު ތެރޭ ފަތުރުވެރިކަމުގެ ގިނަ ހަރަކާތްތަކެއް ރާއްޖޭގައި ކުރިއަށް ގެންދިޔުމަށް ރާވާމުންދާކަމަށް ވިދާޅުވެފައެވެ. އަކުއަ ބައިކް ވާރލްޑް ޗެމްޕިއަންޝިޕްއަކީ ޓުއަރިޒަމް މިނިސްޓްރީއާއި ގުޅުގެން ކުރިއަށްގެންދާ ހަރަކާތެއްކަމަށް މަޢުލޫމާތު ލިބެއެވެ.
އަކުއަ ބައިކް ވާރލްޑް ޗެމްޕިއަންޝިޕްގައި ގިނަ ޤައުމުތަކުން އެތްލީޓުން ދަނީ ބައިވެރިވަމުންނެވެ. މިހަރަކާތް 2020 ވަނަ އަހަރު ބާއްވާފައިވަނީ ކުވައިތުގައިއެވެ.
