ޤާނޫނީ އިމުގެ ބޭރުން ރާއްޖޭގައި އިންތިޚާބެއް ބާއްވަން މަސައްކަތް ކުރާނަމަ އިލެކްޝަންސް ކޮމިޝަންގެ މެންބަރުންނާ ދެކޮޅަށް ބައިނަލްއަޤްވާމީ ފެންވަރުގައި ކެމްޕޭނެއް ފަށްޓަވާނެ ކަމަށް ރާއްޖޭގެ ފުރަތަމަ ޑިމޮކްރެޓިކް ރައީސް މުހައްމަދު ނަޝީދު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ އަންގާރަ ދުވަހު ކުރެއްވި ޓްވީޓެއްގައެވެ.
އިލްެކްޝަން ކޮމިޝަން ޓެގް ކުރައްވާ ރައީސް ނަޝީދު ކުރައްވާފައިވާ މި ޓްވީޓުގައި ވިދާޅުވެފައި ވަނީ ޤާނޫނީ ހަމަތަކުގެ ބޭރުން އިލެކްޝަންސް ކޮމިޝަނުން އިންތިޚާބެއް ބާއްވާނަމަ އެކަމުގެ އަދަބެއްގެ ގޮތުގައި އެކޮމިޝަންގެ މެންބަރުންނާ ދެކޮޅަށް ބައިނަލް އަޤްވާމީ ފެންވަރުގައި ކެމްޕޭނެއް ފައްޓަވާނެ ކަމަށެވެ. އޭގެތެރޭގައި އެމެންބަރުން ރާއްޖެއިން ބޭރަށް ވަޑައި ނުގެންނެވޭ ފަދަ ގޮތަކަށް ޓްރެވަލް ބޭންއެއް ނެރުން ވެސް ހިމެނޭ ކަމަށް ރައީސް ނަޝީދުގެ ޓްވީޓްގައި ވިދާޅުވެފައި ވެއެވެ.
If @ElectionsMv proceeds illegally, we will mount an international campaign to impose punitive measures on them, including travel bans.
— Mohamed Nasheed (@MohamedNasheed) September 5, 2017
ރައީސް ނަޝީދު މިމޭރުމުން ޓްވީޓް ކުރައްވާފައި މިވަނީ ރައްޔިތުންގެ މަޖިލީހުގެ ރައީސްގެ އިތުރުބާރު ނެތް ކަމަށް ހުށަހެޅި މައްސަލައިގާ ސޮއި ކުރެއްވި ޕީޕީއެމްގެ މެންބަރުންގެ ގޮނޑިތައް ހުސްވެއްޖެ ކަމަށް ކަނޑައަޅައި އިލެކްޝަންސް ކޮމިޝަނުން އެދާއިރާތަކުގެ ބައި އިލެކްޝަނެއް ބޭއްވުމަށް އިއްލާން ކުރައްވާފައިވާ ދަނޑިވަޅެއްގައެވެ.
ޕީޕީއެމުން ވަކިވެފައި ވަނިކޮށް އަލުން އެޕާޓީން ވަކިކުރުމަށް ފަހު ރައްޔިތުންގެ މަޖިލީހުގެ 7 މެންބަރުންގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ވަނީ ނިންމާފައެވެ.
ބައި- އިލެކްޝަންތައް ބޭއްވުމަށް އިލެކްޝަންސް ކޮމިޝަނުން ނިންމާފައިވާ ދާއިރާތަކަކީ، މަޑުއްވަރީ ދާއިރާއާއި، ދިއްދޫ ދާއިރާއާއި، ތުލުސްދޫ ދާއިރާއާއި، ވިލިނގިލީ ދާއިރާއާއި ދަނގެތީ ދާއިރާގެ އިތުރުން މައްޗަންގޮޅި ދެކުނު ދާއިރާ އެވެ.
އެ ދާއިރާތަކުގެ މެންބަރުންގެ ގޮތުގައި ތިއްބެވި ބޭފުޅުންގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ބުނީ ޖުލައި 18 ވަނަ ދުވަހު އެވެ.
އެ މެންބަރުންގެ ގޮނޑިތައް ގެއްލުނު ކަމަށް އިލެކްޝަންސް ކޮމިޝަނުން ބުނެފައިވަނީ، ސިޔާސީ ޕާޓީއެއްގެ ޓިކެޓުގައި އިންތިހާބު ކާމިޔާބު ކުރާ މެންބަރުންގެ ތެރެއިން ޕާޓީން ވަކިވާ، އަދި ވަކިކުރާ މެންބަރުންނާއި އަދި ޕާޓީ ބަދަލު ކުރާ މެންބަރުންގެ ގޮނޑި ގެއްލޭނެ ކަމަށް ކަނޑައަޅައި ޖުލައި 13 ވަނަ ދުވަހު ސުޕްރީމް ކޯޓުން ކުރި ހުކުމާ ހަވާލާދީ އެވެ.
ގޮނޑި ގެއްލުނު ކަމަށް އިލެކްޝަންސް ކޮމިޝަނުން ކަނޑައެޅި މައްސަލަ ހަތަރު މެންބަރަކު ސުޕްރީމް ކޯޓަށް ހުށަހެޅުއްވި އެވެ. އެ މައްސަލައިގައި ސުޕްރީމް ކޯޓުން މިދިޔަ އޯގަސްޓް މަހުގެ 27 ވަނަ ދުވަހު ނިންމި ނިންމުމުގައި ބުނެފައިވަނީ މެންބަރުންގެ ގޮނޑި ގެއްލޭނެ ހާލަތްތައް ބަޔާންކޮށް ކުރި ޙުކުމަށް ފަހު، ހުށަހެޅިފައިވާ މައްސަލަތަކުގައި ޤާނޫނުއަސާސީގެ 74 ވަނަ މާއްދާގެ ދަށުން ބަލައި އިތުރު ގޮތެއް ކަނޑައަޅަންޖެހޭ ތަނެއް ނެތް ކަމަށް ސުޕްރީމް ކޯޓުގެ ފަނޑިޔާރުންގެ އިއްތިފާގުން ނިންމާފައިވާ ކަމަށެވެ.
ސުޕްރީމް ކޯޓުގެ އެ ނިންމުމާ ގުޅިގެން އިލެކްޝަންސް ކޮމިޝަނުން ހަމަ އެ ދުވަހު ނެރުނު ބަޔާނުގައި ބުނެފައިވަނީ ރައްޔިތުންގެ މަޖިލީހުގެ ގޮނޑި ހުސްވެފައިވާ ކަމަށް ކަނޑައަޅާފައިވާ ދާއިރާތަކުގެ ބައި-އިލެކްޝަން ބާއްވަން އެ ކޮމިޝަނުން ނިންމާފައިވަނިކޮށް، ސުޕްރީމް ކޯޓަށް މިކަމާ ގުޅޭ ގޮތުން މައްސަލަތަކެއް ހުށަހަޅާފައި ވާތީ އެ ނިންމުންތަކާ މެދު ވަކި ގޮތެއް ނިންމަންދެން އެ ދާއިރާތަކުގެ ބައި-އިލެކްޝަން ބޭއްވުމުގެ މަސައްކަތް މަޑުޖައްސާލާފައި އޮތް ކަމަށާއި އަދި ސުޕްރީމް ކޯޓުގެ ނިންމުމުގައި އިލެކްޝަންސް ކޮމިޝަނުން ކުރިން ނިންމި ނިންމުން ބަދަލުކުރަންޖެހޭނެ ކަމަށް ބަޔާން ކޮށްފައިނުވާ ކަމަށެވެ.