ޗައިނާގެ ކަނޑުގެ ސަރަހައްދު ބަލަހައްޓަމުން އަންނަ ސަބްމެރިންތަކުގެ ކްރޫއިންނަށް ސީރިއަސް ބަލިތަކެއް ޖެހިފައިވާކަމަށް ރިޕޯޓްތައް ބުނެފިއެވެ.

ރިޕޯޓްތައް ބުނާ ގޮތުން ޗައިނާގެ ކަނޑުމަތީ ސިފައިންގެ ތެރެއިން ސަބްމެރިންގައި ހަރަކާތްތެރިވާ ސިފައިންގެ ތެރެއިން 70 އިންސައްތަ ސިފައިންނަކީ ނަފްސާނީ ބަލިމަޑުކަމެއް ހުންނަ ސިފައިންނެވެ. އަދި 20 އިންސައްތަ ސިފައިންނަށް ޖިސްމާނީ ބަލިމަޑުކަން ހުންނަ ބައްޔެއް ހުންނަކަމަށް އެގައުމުގެ ސަރުކާރުން ހެދި ދިރާސާއަކުން ދައްކާކަމަށް ރިޕޯޓްތައް ބުނެއެވެ.

މިކަމާއި ގުޅިގެން ކަނޑުގެ ސަރަހައްދު ބަލަހައްޓަމުން އަންނަ ސިފައިން ދާދިފަހުން އެގައުމުގެ މިލިޓަރީ ހޮސްޕިޓަލުން ފަރުވާ ހޯދާފައިވާއިރު، މިކަމާއި ގުޅިގެން އެގައުމުގެ ކަމާބެހޭ އިދާރާއަކުން ވަކި އެއްޗެއް ބުނެފައެއް ނުވެއެވެ.

އެގައުމުގެ ސަރުކާރުން ހެދި ސާވޭ މިހާތަނަށް އާންމު ކޮށްފައިނުވާއިރު، މި ސާވޭއާ ހަވާލާދީ އެގައުމުގެ މީޑިއާއަކުން ބުނީ ސާވޭއިން ދައްކާ ސީރިއަސް މައްސަލަތަކަށް ހައްލު ހޯދުމަށް އެގައުމުގެ ސަރުކާރުން މަސައްކަތް ކުރަމުން އަންނަ ކަމަށެވެ. އަދި ސަބްމެރިންގައި ހަރަކާތްތެރިވާ ކްރޫން ބަދަލުކުރުމަށް މަސައްކަތް ކުރަމުން އަންނަކަމަށްވެސް ރިޕޯޓްތައް ބުނެއެވެ.