ކޮވިޝީލްޑް ވެކްސިންއިން އެއްވެސް ސައިޑް އިފެކްޓެއް މިހާތަނަށް ފެނިފައެއް ނުވޭ- ސްރީލަންކާ

އިންޑިއާގެ ސިރަމް އިންސްޓިޓިއުޓް އޮފް އިންޑިއާއިން އުފެއްދި ކޮވިޝީލްޑް ވެކްސިނުގެ އެއްވެސް ސައިޑް އިފެކްޓެއް މިހާތަނަށް ފެނިފައި ނުވާކަމަށް ސްރީލަންކާގެ ހެލްތް އޮފިޝަލުން ވިދާޅުވެއްޖެއެވެ.

އެގައުމުގެ އޮފިޝަލުން ވިދާޅުވެފައިވަނީ ގިނަ އަދަދެއްގެ މީހުންނަށް ވެކްސިން ދީފައިވާއިރު އެއްވެސް މީހެއްގެ ފަރާތުން ސައިޑް އިިފެކްޓެއް ފެނިފައިނުވާ ކަމަަށެވެ.

ސްރީލަންކާގައި ވެކްސިންދިނުމުގެ ޕްރޮގްރާމް ހަލުވިކަމާއެކު ކުރިއަށް ދާއިރު އާދިއްތަ ދުވަހު ވެސް އެގައުމުން ވަނީ ފްރަންޓް ލައިންގައި މަސައްކަތްކުރާ 7،500 ސިފައިންނަށް ވެކްސިން ދީފައެވެ.

އެގައުމުގައި އެންމެ ފުރަތަމަ ވެކްސިން ދޭނީ 1،50،000 ފްރަންޓްލައިން މުވައްޒަފުންނާއި 1،15،000 ފުލުހުންނާއި ސިފައިންނަށް ކަމަށް ލަންކާ ސަރުކާރާ ހަވާލާދީ ނޫސްތަކުން ރިޕޯޓްކޮށްފައިވެއެވެ.

ލަންކާގައި އިންޑިއާގެ ސިރަމް އިންސްޓިޓިއުޓް އޮފް އިންޑިއާއިން އުފެއްދި ކޮވިޝީލްޑް ވެކްސިން ދެމުން ދާއިރު އިންޑިއާއިން ވަނީ ކޮވިޝީލްޑް ވެކްސިންގެ ފަސްލައްކަ ޑޯޒް ލަންކާއަށް ފޮނުވާފައެވެ. މިކަމާ ގުޅިގެން ސްރީލަންކާގެ ހެލްތް މިނިސްޓަރ ވަނީ އިންޑިއާގެ ބޮޑުވަޒީރު ނަރެންދްރަ މޯދީއަށް ޝުކުރު ދަންނަވާފައެވެ.

ކޮވިޝީލްޑް ވެކްސިން އުފައްދާފައި ވަނީ ދުނިޔޭގައި ވެސް ވެކްސިން އުފައްދާ އެންމެ ބޮޑު ކުންފުނި ކަމަށްވާ އިންޑިއާގެ ސިރަމް ކުންފުނިންނެވެ. އެ ކުންފުނިން އުފެއްދި ކޮވިޝީލްޑް ވެކްސިން އަކީ ދުނިޔޭގެ އެންމެ ބޮޑު ދިރާސާކުރާ އެއް ޔުނިވަރސިޓީ ކަމުގައިވާ އޮކްސްފޯޑް ޔުނިވަރސިޓީ އާއި ވެކްސިން އުފެއްދުމުގެ ރޭހުގައި ކުރިއަރާފައިވާ އެސްޓްރަޒެނެކާއިން އުފެއްދި ވެކްސިން (AZD1222) ގެ ފޯމިއުލާއަކީ ސިރަމް އިންސްޓިޓިއުޓުން އުފައްދާ ވެކްސިންގައި ބޭނުންކޮށްފައިވާ ފޯމިއުލާއިން ހަދާފައިވާ ވެކްސިންއެކެވެ.

22 މިލިއަންއަށް ވުރެ ބޮޑު އާބާދީއެއް އޮންނަ ސްރީލަންކާއިން މިހާތަނަށް ރިޕޯޓްކޮށްފައިވަނީ 62,445 ކޮވިޑް-19 ކޭސްއެވެ. އޭގެ ތެރެއިން 305 މީހުން ވަނީ މަރުވެފައެވެ.