ޔޫކޭގެ ވެކްސިނޭޝަން ޕްރޮގްރާމް މަޑުޖައްސާލުމަށް ދުނިޔޭގެ ސިއްޙަތު ޖަމުޢިއްޔާއިން އެދެފި

އިނގިރޭސިވިލާތުގައި ކުރިއަށް ގެންދާ ކޮވިޑް-19 ވެކްސިނޭޝަން ޕްރޮގްރާމް މަޑުޖައްސާލަން ދުނިޔޭގެ ސިއްޙަތު ޖަމުޢިއްޔާއިން ގޮވާލައިފިއެވެ.

ޑަބްލިއު.އެޗް.އޯ.އިން ބުނީ ދުނިޔޭގެ ހުރިހާ ގައުމަކަށް ވެސް ހަމަހަމަ ކަމާއެކު ވެކްސިން ފޯރުކޮށްދިނުމަށްޓަކައި އިނގިރޭސިވިލާތުން ކުރިއަށް ގެންދާ ވެކްސިނޭޝަން ޕްރޮގްރާމްގައި އެގައުމުގެ ހައިރިސްކު ކެޓަގަރީގެ މީހުންނަށް ވެކްސިން ދެވުމުން، ޕްރޮގްރާމް މަޑުޖައްސާލުމަށް އިލްތިމާސްކުރާ ކަމަށެވެ.

އެގޮތުން މި އަހަރުގެ ތެރޭގައި ވެކްސިންގެ ދެ ބިލިއަން ޑޯޒް ހަަމަހަމަ ކަމާއެކު ގައުމުތަކުގެ މެދުގައި ބަހާލުމަށް ޑަބްލިއު.އެޗް.އޯ.އިން އަންނަނީ ގޮވާލަމުންނެވެ.

އިނގިރޭސިވިލާތުގެ ބޮޑުވަޒީރު ބޮރިސް ޖޯންސަން ވަނީ ސެޕްޓެމްބަރު މަހާ ހަމައަށް އެގައުމުގެ އާބާދީގެ އުމުރުން 18 އަހަރުގެ ހުރިހާ އެންމެންނަށް ވެކްސިންގެ ފުރަތަމަ ޑޯޒް ދިނުމުގެ މަސައްކަތްކުރާނެ ކަމަށް ވިދާޅުވެފައެވެ. އަދި ފެބްރުއަރީ މަހުގެ 15 ވަނަ ދުވަހު އެގައުމުގެ އެންމެ ހައި ރިސްކް ކެޓަގަރީގެ މީހުންނަށް ވެކްސިން ޖަހައި ނިމޭނެ ކަމަށް ބޮރިސް ވަނީ ވިދާޅުވެފައެވެ.

ޑަބްލިއު.އެޗް.އޯ.ގެ ތަރުޖަމާން މާރގަރެޓް ހެރިސް ވަނީ އިނގިރޭސިވިލާތުގައި ވެކްސިންޖެހުމުގެ ޕްރޮގްރާމް މަޑުޖައްސާލަން އެދިފައެވެ. އަދި ޕްރޮގްރާމް މަޑުޖައްސާލައި ހުރިހާ ގައުމަކަށް ހަމަހަމަ ކަމާއެކު ވެކްސިން ލިބޭނެ މަގުފަހި ކޮށްދިނުމަކީ ކުރުން އެންމެ ރަނގަޅުކަންތައް ކަމަށް މާރގަރެޓް ވަނީ ފާހަގަކޮށްފައެވެ.

މީގެ އިތުރުން ވެކްސިން ޕްރޮގްރާމް މަޑުޖައްސާލައި އެގައުމަށް ލިބިފައިވާ ވެކްސިންގެ ޑޯޒްތައް އެހެން ގައުމުތަކަށް ފޯރުކޮށްދިނުމަކީ އިޤްތިޞާދީ ގޮތުން ވެސް އެންމެ ފައިދާކުރާނެ ގޮތް ކަމަށް މާރގަރެޓް ވަނީ ވިދާޅުވެފައެވެ. އެގޮތުން ކަމާބެހޭ މާހިރުން ވަނީ ހަމަ އެކަނި ތިމަންނާގެ ގައުމުގެ ހުރިހާ ރައްޔިތުންނަށް ވެކްސިން ދީ ނިންމާލުމުން މި ބަލިމަނޑުކަމުން އަރައިގަނެ އިޤްތިޞާދީ ގޮތުން ފައިދާއެއް ނުކުރާނެކަން ފާހަގަކޮށްފައި ކަމަށާއި އެހެން ކަމުން އިނގިރޭސިވިލާތަށް އެންމެ ރަނގަޅުވާނީ އެގައުމަށް ލިބިފައިވާ ވެކްސިންގެ ޑޯޒްތައް ހައި ރިސްކު މީހުންނަށް ދިނުމަށް ފަހު އެހެން ގައުމުތަކަށް ހަމަހަމަ ކަމާއެކު ފޯރުކޮށްދިނުމުގެ މަސައްކަތްކުރުން ކަމަށް މާރގަރެޓް ވިދާޅުވިއެވެ.