ތަރައްޤީ އާއި ކުރިއެރުމަށް އެންމެން އެކުއެކީގައި ގުޅިގެން މަސައްކަތް ކުރަން ޖެހޭ: މިނިސްޓަރު ޝާހިދު
29 ޖެނުއަރީ 2021 | ހުކުރު 07:29ޕެންޑަމިކްގައި ވެސް ހާސިލް ކުރަން ބޭނުންވި ގިނަ ކަންތައްތައް ހާސިލް ކުރެވުނު
ކެޔޮދޫގައި ފުލުހުންގެ ޚިދުމަތްފެށުމުގެ ރަސްމިއްޔާތުގެ ތެރެއިން
ތަރައްޤީއާއި ކުރިއެރުމަށް އެންމެން އެކުއެކީގައި ގުޅިގެން މަސައްކަތް ކުރަން ޖެހޭ ކަމަށް ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެއެވެ.
ކެޔޮދޫގައި ފުލުހުންގެ ޚިދުމަތް ފެށުމުގެ ރަސްމިއްޔާތުގައި މިނިސްޓަރު ޝާހިދު ވިދާޅުވީ 2020 ވަނަ އަހަރަކީ ކޮވިޑް-19އާ ގުޅިގެން މުޅި ގައުމަށް އެކަމުގެ ހިތްދަތިކަން ލިބުނު އަހަރެއް ކަމަށާއި، ނަމަވެސް ގުޅިގެން މަސައްކަތް ކުރުމުން ނަތީޖާ ވަރަށް ރަނގަޅު ކަމަށެވެ. ހާސިލްކުރަން ބޭނުންވި ގިނަކަންތައްތައް ހާސިލް ކުރެވި ތަރައްޤީގެ ގިނަ މަޝްރޫޢުތައް ނިންމުނުކަން މިނިސްޓަރު ފާހަގަކުރެއްވިއެވެ.
ކެޔޮދޫއަކީ ކުރިން މަސްވެރިކަމުގެ ރަށެއްކަން ފާހަގަކުރައްވައި މިނިސްޓަރު ޝާހިދު ވިދާޅުވީ މިހާރު ވެސް އެސިނާޢަތް ކުރިއަރުވަން ރަށުގެ ރައްޔިތުން މަސައްކަތްކޮށްފި ކަމުގައިވާނަމަ ކާމިޔާބުވާނެ ކަމަށެވެ. އަދި މިހާރު ފަތުރުވެރިކަމުގެ ޚިދުމަތުގައި އެންމެ ކުރީ ސަފުގައި ވާދަކުރަމުން އަންނަ އެއް ރަށް ކަމަށްވާއިރު ކުރިއަށް އޮތްތަނުގައި ގުޅިގެން މަސައްކަތް ކުރެވިއްޖެނަމަ ހަޤީޤީ ލަނޑުދަނޑި ހާސިލުކުރެވޭނެ ކަމަށް މިނިސްޓަރު ޝާހިދު ވިދާޅުވިއެވެ.
އެގޮތުން ސަރުކާރުން ދޭ އިރުޝާދާއެކު، ބަލިން ރައްކާތެރިވުމަށް އަޅާ ފިޔަވަޅުތަކަށް ބޯލަނބާ އަމަލުކޮށް ދާއިމަށް ތަންފީޒު ކުރެވިއްޖެކަމުގައިވާނަމަ މިހާރު ވެސް ގިނަ އަދަދެއްގެ ފަތުރުވެރިންނަށް ޒިޔާރަތްކުރެވި، ސިނާޢަތް ވަރަށް ބޮޑުތަނުން ކުރިއަރައިގެންދާނެކަން މިނިސްޓަރު ޝާހިދު ފާހަގަކުރެއްވިއެވެ.
ކެޔޮދޫގައި ހުޅުވި ޕޮލިސް ޕޯސްޓަށް އިޝާރާތް ކުރައްވާ މިނިސްޓަރު ޝާހިދު ވިދާޅުވީ ފުލުހުންގެ ޚިދުމަތް ވެސް ފެށިގެން ދިޔައީ ރަށުގެ ރައްޔިތުން ކުރި މަސައްކަތުން ކަމަށާއި، އެ ޚިދުމަތް ވެސް ކާމިޔާބު ވެގެންދާނީ ރައްޔިތުން އެޚިދުމަތް ބަލައިގަތް މިންވަރަކުން ކަމަށެވެ.
